Ֆուտզալի մրցաշար Հայաստանում

Հունվարի 29-ից մարտի 5-ը «SYNOPSYS ARMENIA» ընկերության կողմից Հայաստանում առաջին անգամ կազմակերպված «IT FUTSAL CUP» ֆուտզալի սիրողական մրցաշարին մասնակցելու հայտ են ներկայացրել 15 թիմեր, որոնցից երեքը «SYNOPSYS»-ից են:

Թիմային զույգեր կազմելու համար հրավիրվել է գլխավոր հովանավորներից մեկի` «HSBC» բանկի թիմը, որը բանկերի միջեւ անցկացված ֆուտզալի մրցաշարում հաղթող է ճանաչվել: Թիմերի ուժերին ծանոթ չլինելու պատճառով «կույր վիճակահանությամբ» ձեւավորվել է չորս խումբ, յուրաքանչյուրում` չորս թիմ: Երրորդ տեղի համար պայքարելու են «HSBC»-ն եւ «PONTE SOLUTIONS»-ը, իսկ գավաթի համար` «SYNOPSYS SEG»-ը եւ «SYNOPSYS SG»-ն: «Արդեն այլ սպորտաձեւերի շրջանում մրցաշարեր անցկացնելու առաջարկներ ենք ստացել,- ասում է «IT FUTSAL CUP» մրցաշարի կազմկոմիտեի նախագահ Արմեն Թադեւոսյանը:- Մեծ ֆուտբոլ խաղացողները շատ են, իսկ ֆուտզալը Հայաստանում որոշ չափով նորություն է, չնայած` ունենք թիմ, որը Եվրոպայում հաջողությունների է հասել: Մրցաշարի նպատակներից է` ծանոթություն հաստատել IT կազմակերպությունների ներկայացուցիչների միջեւ»:

Ֆուտզալի մասնակից թիմը բաղկացած է չորս խաղացողից եւ դարպասապահից: Խաղին հետեւում են երկու եզրային մրցավարներ, ովքեր Հայաստանի Ֆուտբոլի ֆեդերացիայից են. մրցաշարին մասնակցել է տասը մրցավար: Խաղը տեւում է հիսուն րոպե: Յուրաքանչյուր խաղակեսը քսանհինգական րոպե է: Ընդմիջումը տեւում է մինչեւ տասը րոպե:

Մրցանակային տեղեր զբաղեցրած թիմերը կարժանանան գավաթների, դիպլոմների, հուշանվերների: