Իշխանական վերնախավում արդեն այսօր շատ թեժ քննարկումներ են ընթանում առաջիկա ՏԻՄ ընտրությունների վերաբերյալ, որպեսզի 2008թ. նախագահական ընտրություններում իշխանությունները կարողանան ունենալ իրենց վստահելի համայնքապետերին: Իսկ սա նշանակում է, որ պայքարը շատ լուրջ ու վտանգավոր է լինելու: Հիմնական ընտրությունները տեղի են ունենալու հոկտեմբերին, սակայն մինչ այդ՝ հունիսի առաջին տասնօրյակում, բոլորս ականատես կլինենք երեք համայնքների՝ Նորք-Մարաշի, Մալաթիա-Սեբաստիայի եւ Դավիթաշենի, «մարտարշավին»:
ԱԺ նախկին պատգամավոր Ռուբեն Գեւորգյանը մեզ հետ զրույցում վստահեցրեց, որ ինքն անպայման առաջադրելու է իր թեկնածությունը Դավիթաշեն համայնքում, եւ մրցակցելու է գործող թաղապետ Սուրիկ Ղուկասյանի հետ: Վերջինս արդեն երրորդ անգամն է առաջադրում իր թեկնածությունը (երկու անգամ ընտրվել է), եւ հույս ունի, որ իր մշտական կարգախոսը՝ «Իմ վստահությունն իմ ժողովուրդն է», նորից գործելու է:
– Երկու անգամ արդեն ժողովրդի կողմից այդ վստահությանն արժանացել եմ, եւ կարծում եմ, վեց տարիների աշխատանքային իմ գործունեության ընթացքում ժողովրդի հետ հասցրել ենք անել այն, ինչ պետք է օջախին, ընտանիքին: Միշտ ասել եմ, որ ես թաղապետ չեմ, այլ օջախի ղեկավար եմ, որին վստահված է ղեկավարել այդ ընտանիքը: Եվ, կարծում եմ, իմ ղեկավարած ժամանակահատվածում այս մեծ օջախից միշտ պատվով եմ դուրս եկել: Երբեւիցե իմ անձի նկատմամբ բողոքներ չեն եղել բարձր ատյաններում՝ սկսած նախագահի վերահսկողության բաժնից, ԱԺ-ից ու վարչապետի Վերահսկողական ծառայությունից: Մենք ժողովրդի հետ նույն մարդն ենք:
– Գաղտնիք չէ, որ ընտրություններում հաղթում է նա, ով վայելում է իշխանությունների համակրանքը: Դուք ՀՀԿ եւ «Նիգ-Ապարան» հայրենակցական միության անդամ եք: Աջափնյակ համայնքի նախորդ ընտրություններում այս երկու թեւերը բախվեցին: Հիմա այս երկու ուժերը ձե՞զ են պաշտպանելու:
– Երկուսն էլ միանշանակ ինձ են պաշտպանելու: Բացառված է, որ ՀՀԿ-ն մեկ այլ թեկնածուի պաշտպանի, որովհետեւ ես ՀՀԿ տարածքային կառույցի ղեկավարն եմ: Նույնը կարող եմ ասել «Նիգ-Ապարանի» մասին, որովհետեւ այդ միության վարչության անդամ եմ, ու նրանք նույնպես ինձ են սատարելու:
– Այսինքն՝ որեւէ բախում չի՞ լինի:
– Բացառվում է:
– Ձեր կարծիքով՝ Գալուստ Սահակյանը մոռացե՞լ է, թե ինչ արեց «Նիգ-Ապարանն» իր որդու դեպքում՝ անցկացնելով Արծրուն Խաչատրյանին:
– Ե՛վ Գ. Սահակյանն է իմ ընկերը, եւ՛ Արծրուն Խաչատրյանը, այնպես որ, նրանք այս անգամ կլինեն նույն շտաբում, նույն մարդու կողքին:
– Իսկ վստա՞հ եք, որ կոալիցիոն մյուս ուժերը՝ «Օրինաց երկիրն» ու ՀՅԴ-ն կսատարեն ձեզ, եւ չի կրկնվի Եղվարդի ընտրությունների դեպքը, որտեղ դուք պաշտպանում էիք Արայիկ Հայրապետյանին, իսկ «ՕԵԿ»-ը՝ Արտակ Սարգսյանին:
– Կարծում եմ, որ ոչ միայն՝ որպես կոալիցա, այլեւ՝ որպես առանձին կուսակցություններ, նրանք պաշտպանելու են իմ թեկնածությունը, որովհետեւ այստեղ նրանք էլ ունեն տարածքային կազմակերպություններ, եւ ես՝ լինելով Հանրապետական, երբեւիցե տարբերություն չեմ դրել նրանց միջեւ: Նրանք էլ դա չեն զգացել: Եթե տեղ է պետք եղել՝ տեղ եմ տրամադրել… Այնպես որ, համագործակցում ենք եւ միանշանակ նրանք էլ են իմ կողմը:
– Ձեր համայնքում պատրաստվում է իր թեկնածությունն առաջադրել նաեւ ԵԿՄ անդամ Ռուբեն Գեւորգյանը, եւ ասում են, որ այս համայնքում բախումներն անխուսափելի են, եւ անպայման կլինեն ԵԿՄ-ՀՀԿ-«Նիգ-Ապարան» փոխհրաձգություններ:
– Արդեն ասացի, որ ՀՀԿ-ն ու «Նիգ-Ապարանը» միանշանակ իմ կողքին են, իսկ ինչ վերաբերում է «Երկրապահին», ապա կարող եմ ասել, որ ես էլ եմ ԵԿՄ անդամ: Այնպես որ, այդ «Երկրապահի» տղաների մասին չի կարելի միանշանակ ասել՝ կլինեն ի՞մ կողքին, թե՞ Ռ. Գեւորգյանի: Այդ տղաներն, այսպես թե այնպես, կիսվելու են: Զոհված ազատամարտիկների նույն ընտանիքների համար կարող եմ ասել, որ ես ավելի շատ բան եմ անում, ու չես կարող ասել, թե նրանք ո՞ւմ հետ են լինելու: Ժողովուրդն է ընտրում, եւ ում քվե կտան, նա էլ կդառնա թաղապետ:
– Ռ. Գեւորգյանը լուրջ մրցակի՞ց է ձեզ համար:
– Մրցակիցների հասցեին ոչինչ ասել չեմ ուզում: Մրցակցություն է, ով հաղթի՝ նա կդառնա թաղապետ: Ժողովուրդն իմաստուն է եւ ընտրում է նրան, ով իրեն պետք է:
– Այդ դեպքում ինչո՞ւ էիք բողոքում, թե Եղվարդում կեղծիքներով է ընտրվել Արտակ Սարգսյանը:
– Այո՛, երբեմն այդպես չի լինում: Բայց, համենայդեպս Դավիթաշենում, չեմ կարծում, թե նույն կերպ կլինեն ընտրությունները:
– Ռուբեն Գեւորգյանի հետ ի՞նչ հարաբերություններ ունեք:
– Մենք չենք առնչվում, չենք շփվում:
– Մտավախություն չունե՞ք, որ կոնկրետ իր հետ պրոբլեմներ կունենաք ընտրությունների ժամանակ:
– Ի՞նչ պրոբլեմ, ի՞նչ թշնամություն… Կան իշխանություններ եւ նրանք պարտավորություն ունեն բոլորի առջեւ ու պետք է այնպես անեն, որ մեր ընտրությունների ժամանակ ոչ մի բախում տեղի չունենա: Կա ոստիկանություն, անվտանգություն, այնպես որ՝ իմ մտքով նման բան չի անցնում: Երբեւէ որեւէ մեկին թթու խոսք ասած չկամ եւ չեմ էլ պատրաստվում ասել: Կարծում եմ, եթե մյուս թեկնածուն էլ ընտրությունների ժամանակ այդպես վարվի, ամեն ինչ հանգիստ, նորմալ կանցնի:
– Չե՞ք կարծում, որ այս ընտրությունները շատ վճռորոշ են լինելու իշխանությունների համար, եւ յուրաքանչյուր քաղաքական ուժ պայքարելու է՝ ամեն կերպ անցկացնել իր թեկնածուին, որպեսզի 2008թ. ընտրություններում ամուր դիրքեր ունենա:
– Ինձ համար շատ սովորական է այս ամենը: Պարզ է, որ քաղաքական ուժերը ձգտելու են անցկացնել այնպիսի ընտրություններ, որպեսզի հետագայում կարողանան ԱԺ-ում մեծամասնություն ունենալ: Բայց այն մարդիկ, ովքեր աշխատել են այս տարիների ընթացքում եւ արժանի են վերընտրվելու, ուրեմն՝ այդպես էլ կլինի: Իսկ ովքեր արժանի չեն վերընտրվելու, չեն վերընտրվի, ու դրանում իրենք են մեղավոր: