Today.az-ի փոխանցմամբ՝ Ադրբեջանի ԱԳՆ մամուլի խոսնակ Թ. Թաղիզադեն ասել է, որ նախատեսված է «Կասպիական հեռանկարներ-2008» խորհրդաժողովին մասնակցելու նպատակով Սլովենիայի Բլեդ քաղաքում գտնվող Ադրբեջանի արտգործնախարար Էլմար Մամեդյարովի հանդիպումը ԵԱՀԿ Մինսկի խմբի համանախագահ Մեթյու Բրայզայի եւ ԵԱՀԿ գործող նախագահող Կարել դը Գուխտի հետ: Խորհրդաժողովին մասնակցելու նպատակով Բլեդում է գտնվում նաեւ Հայաստանի արտգործնախարար Վարդան Օսկանյանը: ՀՀ ԱԳՆ մամլո խոսնակի պաշտոնակատար Վլադիմիր Կարապետյանի փոխանցմամբ՝ Վ. Օսկանյանն արդեն հանդիպել է ԵԱՀԿ Մինսկի խմբի ամերիկացի համանախագահի հետ, իսկ հանդիպման ընթացքում քննարկվել են բանակցային գործընթացի ներկա փուլն ու առաջիկա անելիքները: Միաժամանակ Մամեդյարովը հայտարարել է, թե իրեն Վ. Օսկանյանի հետ հանդիպելու առաջարկ չի արվել: Today.az-ը տեղեկացնում է նաեւ, որ երեկ նախատեսված էր Իլհամ Ալիեւի այցը Սլովենիա, որտեղ նախատեսված է նրա հանդիպումը Մեթյու Բրայզայի հետ:
