Մեղք չի՞ թռչունը

ՀՀ Բնապահպանության նախարարության աշխատակիցները երեկ կեսօրին տուն են ուղարկվել 40 աստիճանը գերազանցող շոգի պատճառով։ Ամենայն հավանականությամբ, աշխատակիցներին տուն ուղարկելուց հետո նախարար Վարդան Այվազյանն իր առանձնասենյակում նստել ու սկսել է մտածել մի որեւէ հով տեղ հանգստանալու մասին ու հիշել է Սեւանը։ Իսկ Սեւանի մասին հիշելիս, ինչպես գիտեք, մարդու գլխում միանգամից ծագում է որսորդությամբ զբաղվելու միտքը՝ ասենք` ճայերի որս, այն էլ` ատրճանակով։ Սակայն մեր նախարարներն օրենքը խախտել չեն սիրում. որսորդությամբ զբաղվելու համար պետք է թույլտվություն լինի։ Եվ պրն Այվազյանը երեկ հրաման է ստորագրել, որով թույլատրվել է սիրողական որսը ՀՀ տարածքում։ Համաձայն այդ հրամանի` օգոստոսի 19-ից հոկտեմբերի 29-ը կարող եք որսալ լոր, օգոստոսի 19-ից հոկտեմբերի 29-ը՝ կտցար, հոկտեմբերի 2-ից դեկտեմբերի 31-ը`աղավնիներ (թխակապույտ եւ անտառային, տատրակ), ջրլող թռչուններ՝ բադեր (կռնչան բադ, կարմրագլուխ սուզաբադ, սուլող եւ ճքճքան մրտիմներ) եւ ջրհովվիկներ (փառփար, եղեգնահավ)` 2006 թ. սեպտեմբերի 15-ից 2007 թ. մարտի 15-ը, նապաստակ` 2006 թ. նոյեմբերի 1-ից դեկտեմբերի 31-ը, քարակաքավ` նոյեմբերի 1-ից դեկտեմբերի 31-ը, աղվես` 2006թ. նոյեմբերի 15-ից 2007թ. փետրվարի 28-ը: Իհարկե, «Սիրողական որս-2006»-ին կարող եք մասնակցել, եթե թռչնագրիպից չեք վախենում, գիտեք` որն է մրտիմը, եւ ամենակարեւորը՝ տարբերում եք, թե որոնք սուլել գիտեն, որոնք ոչ։ Համենայնդեպս, այսպես է գրված Վարդան Այվազյանի ստորագրած հրամանի մեջ: Նշենք, որ ճայերի մասին հրամանում ոչինչ չկա։