Ձուկը տապակելիս չի փխլվի, եթե այն աղ դնեք տապակելուց 10-15 րոպե առաջ։
Եթե ձկնապուրին մի քիչ կաթ ավելացնեք, սուր հոտը կվերանա, իսկ ձուկը փափուկ եւ ավելի համեղ կստացվի։
Որպեսզի ձուկը տապակելիս լավ կարմրի, այն պետք է նախքան տապակելը չորացնել շորով, կամ թղթով։
Նախքան ձուկը տապակելը յուղի մեջ մի քիչ աղ գցեք, այն չի կպչի հատակին։
Ձկնեղենի հետ մակարոնը իբրեւ խավարտ չի օգտագործվում։
Խաշած ձկան հետ որպես խավարտ (գարնիր) մատուցվում է խաշած կարտոֆիլ, իսկ տապակածի հետ` խաշած կամ տապակած կարտոֆիլ։ Շոգեխաշած կամ խորոված ձկան հետ կարելի է բրինձ մատուցել։
Ձուկ մատուցելուց հետո ամանները հարկավոր է սկզբում սրբել ծծողական թղթով, հետո ողողել սառը ջրով եւ ապա լվանալ եռման ջրով։ Այդ դեպքում ձկան հոտը կանցնի։
Ինչպե՞ս որոշել` ձուկը թա՞րմ է, թե՞ ոչ։ Թարմ ձկան թեփուկները հարթ են ու փայլուն եւ ամուր կպած են մարմնին, աչքերը դուրս ընկած ու թափանցիկ են, խռիկները` վառ կարմիր, փորը փքված չէ, միսը դժվարությամբ է պոկվում փշերից։ Այդպիսի ձուկը ջրի մեջ գցելիս իջնում է ամանի հատակը։ Լավորակ թարմ ձկան արգանակը թափանցիկ է եւ ախորժաբեր հոտ ունի։
Թարմ ձուկը պետք է պահել սառը տեղում, նախապես փորոտիքը մաքրելուց եւ թեփուկները հեռացնելուց հետո։ Ձուկը պետք է լվանալ եփելուց անմիջապես առաջ։
Սառեցրած ձուկը դրեք պոլիէթիլենային տոպրակի մեջ, ամուր կապեք թելով եւ դրեք տաք ջրի մեջ, այն ավելի արագ կթուլանա։