Եթե միսը թարմ չէ, եփելուց առաջ վրան լցրեք մեկ գդալ քացախ կամ մեկ թեյի գդալ կիտրոնի հյութ. դրանք նպաստում են մսի արագ եփվելուն։ Միսն արագ է եփվում նաեւ, երբ նախապես վրան ցանում եք սոդա եւ թողնում 3-4 ժամ։ Եփելուց առաջ լվացեք սառը ջրով։
Եթե ուզում եք որոշել մսի թարմ լինելը, ապա իմացեք` լավորակ միսը կտրելիս գրեթե չոր է լինում, իսկ մատով սեղմելիս, նրա վրա գոյացող փոսիկն արագորեն ուղղվում է։
Թարմ մսից եփած արգանակը հաճելի համ ու հոտ է ունենում։ Ստուգելու համար միսը հոտ ունի, թե ոչ` հարկավոր է դանակը կամ պատառաքաղը տաքացնել եւ միսը ծակել։
Եթե միսը վատորակ է, ապա դանակից կամ պատառաքաղից վատ հոտ է գալիս։
Շնիցելն առանձնապես նուրբ կստացվի, եթե նախքան տապակելը մսի կտորներին քսեք քացախի եւ արեւածաղկի յուղի խառնուրդ եւ այդպես թողնեք 1-2 ժամ։
Շնիցելները եւ թակովի կոտլետները տապակելիս անհրաժեշտ է դրանք հաճախակի շրջել, հակառակ դեպքում հյութն արագ գոլորշիանում է, եւ դրանք դառնում են չոր ու անհամ։
Շնիցել պատրաստելու համար օգտագործեք թիակամիսը կամ ֆիլեն։ Միսը կտրեք բարակ շերտերով, ծեծեք փայտե թակով, երկու կողմից քսեք սեւ պղպեղ, մանանեխ, վրան լցրեք հալած յուղ եւ փակ ամանով 3-4 ժամով դրեք սառնարան, հետո տապակեք։
Տապակելիս մսի կտորները հարկավոր է շրջել միայն այն դեպքում, երբ համոզված եք, որ մի կողմը լավ է տապակվել։
Միսը մեկ-երկու օր պահելու համար այն թաթախեք քացախի եւ աղի լուծույթի մեջ ու դրեք հով տեղ։
Որպեսզի միսը չփչանա, այն պետք է դնել էմալապատ ամանի մեջ, աղցանել եւ երեսին շարել մաքրած սոխ։
Հում միսը կտրելուց հետո օգտագործված դանակն ու տախտակը պետք է խնամքով լվանալ տաք ջրով եւ ապա օգտագործել։
Աղացած մսի մեջ մանրէները շատ արագ են զարգանում, ուստի միսը հարկավոր է աղալ կերակուրը պատրաստելուց անմիջապես առաջ։
Մսի եւ ձկան ոչ ճիշտ մշակման ժամանակ սննդանյութերի նշանակալի կորուստ է տեղի ունենում։ Միսը եւ ձուկը պետք է պատրաստել հետեւյալ ձեւով. կտրատելուց առաջ այն լվանալ սառը ջրով, միայն հարկավոր է հիշել, որ միսը չպետք է թողնել ջրի մեջ, քանի որ այդ դեպքում ջրին են անցնում մսի մեջ եղած հանքային աղերն ու էքստրաակտիվ նյութերը, որոնք կարեւոր նշանակություն ունեն օրգանիզմի նյութափոխանակության համար։