Թարմ սալաթում C վիտամինը պահպանելու համար խորհուրդ է տրվում կտրատելուց անմիջապես հետո այն համեմել քացախով կամ կիտրոնի հյութով։
Բանջարեղենի եւ մրգերի մեջ պարունակվող վիտամինների կորուստը նվազեցնելու համար խորհուրդ է տրվում դրանք պահել մութ եւ հով տեղում։
Բանջարեղենից սալաթ պատրաստելիս ձեթը կարելի է լցնել նախապես, բայց քացախը պետք է լցնել մատուցելուց անմիջապես առաջ։
Թարմ կանաչեղենի մեջ կարոտինը պահպանվում է միայն 3 օր։
C վիտամինն ամենից լավ պահպանվում է լոլիկի հյութի եւ նրա խյուսի մեջ։
Տակառում պահած թթու կաղամբի մեջ պարունակվող C վիտամինի 50 տոկոսը պահպանվում է մի քանի ամիս։ Օգտագործելուց առաջ այն կարելի է թեթեւակի մզել։ Լվանալ միայն շատ թթվության դեպքում։
Բանջարեղենից կերակուրներ պատրաստելիս պետք է աշխատել հնարավորինս պահպանել վիտամինները։ Ջերմային եւ նախնական խոհարարական մշակման ժամանակ ամենից արագ քայքայվում են A եւ C վիտամինները։ Դրանց կորուստը նվազագույնի հասցնելու համար անհրաժեշտ է.
– Եփել ամուր փակված կաթսայում, աշխատել եփելու ընթացքում կափարիչը մի քիչ բացել։
– Չթողնել, որ բանջարեղենը շատ եփվի։
– Բանջարեղենը չանցկացնել մսաղացով կամ պղնձյա, երկաթյա քերիչով։
– Պատրաստի կերակուրը չթողնել բաց ամանում։
Վիտամիններն ավելի լավ պահպանվում են արծնապատ, հախճապակյա, ճենապակյա ամաններում։
Բանջարեղենի մեջ C վիտամինը պահպանելու համար պետք է դրանք կտրատել ոչ թե լվանալուց առաջ, այլ` հետո եւ լցնել եռացող աղաջրի կամ արգանակի մեջ։ Թարմ կաղամբը եփվում է 30-35 րոպեում, թթու դրածը` 1,5 ժամում, գազարը` 15-25 րոպեում, կարտոֆիլը (խորանարդիկներով կտրատված)` 12-15 րոպեում, սպանախը, թարմ լոլիկը` 6-8 րոպեում։
Ապուրի մեջ բանջարեղենը միաժամանակ կեփվի, եթե դրանք կտրատեք հնարավորինս հավասար հաստությամբ։
Թառամած բանջարեղենը թարմացնելու համար անհրաժեշտ է կարճ ժամանակով դրանք դնել սառը ջրի մեջ, մեկ լիտր ջրին խառնելով 2 ճաշի գդալ քացախ կամ կիտրոնի հյութ։
Որպեսզի սառեցրած բանջարեղենի վիտամինները լավ պահպանվեն, դրանք սառած վիճակում գցեք եռացող ջրի մեջ։
Բանջարեղենով պատրաստված կերակրատեսակները նորից չտաքացնելու համար խորհուրդ է տրվում պատրաստել բուսական յուղով։ Կրկնակի տաքացման դեպքում դրանք կորցնում են վիտամինները, եւ համը նշանակալիորեն վատանում է։
Եթե մի կերակրի մեջ օգտագործում եք տարբեր տեսակի բանջարեղեն, ապա դրանք կաթսայի մեջ լցրեք հաջորդաբար` նախ ճակնդեղը, հետո կաղամբը, ապա կարտոֆիլը եւ գազարը։
Եփած բանջարեղենը չի կարելի թողնել ջրում. այն կորցնում է համը եւ ջրալի է դառնում։ Բացառություն է կազմում ծաղկակաղամբը, որը որոշ ժամանակ կարելի է թողնել ջրի մեջ։