Բնապահպանական ուղղվածություն ունեցող ծրագրերի վերաբերյալ քաղաքապետարանի Բնապահպանության վարչության պետ Ռոմիկ Կոսեմյանը մասնավորապես անդրադարձավ Նուբարաշենի աղբավայրի ջերմոցային գազերի մեթանի արտանետումների նվազեցմանն ուղղված եւ մեթանի օգտահանման ու էլեկտրաէներգիայի արտադրության ծրագրին: Ճապոնական կողմի հետ մեկ ամիս առաջ հանդիպում է եղել փաստաթղթերը համաձայնեցնելու ուղղությամբ: «Մենք սպասում ենք նրանց այցին, որոշ խնդիրներ կան, որոնք նրանք պետք է կարգավորեն,- ասաց Ռ. Կոսեմյանը։ -Քաղաքապետարանը պատրաստ է այդ ծրագրին մասնակցել, եւ նրանց այցից հետո կոնկրետ համաձայնագիր կստորագրվի, կսկսվեն 2 փուլով իրականացվող աշխատանքները»: Երեւանյան լճի տիղմային մաքրման աշխատանքների հետ կապված նա նշեց, որ կկատարվեն որոշ հետազոտություններ, որոնց հիման վրա արդեն կմշակվեն տիղմերի տեղափոխման իրագործման ծրագրերը:
