-Պարոն Արզաքանցյան, ԱԺ գործարար պատգամավորների մոտ կարծես մոդա է դարձել կուսակցություն ստեղծելը: Դուք պատրաստվո՞ւմ եք հետեւել այդ մոդային ու Ձեր սեփական կուսակցությունը ստեղծել:
– Ոչ:
– Իսկ ինչպե՞ս եք վերաբերվում գործարարների կողմից կուսակցություններ ստեղծելուն:
– Դե, գործարարները համաձայնության են եկել, եւ իրենց պետք է դա ստեղծելը, թող ստեղծեն: Դա իրենց խնդիրն է: Ես էլ` որպես «Գրեյթ Վելլի» ընկերության խորհրդի նախագահ` տարբեր տեսակի ու տարբեր ուղիներով աշխատանքներ ունեմ, ես գործերին հետեւում եմ եւ կարիք չեմ զգում կուսակցության:
– Ըստ ձեզ` ինչո՞ւ են գործարարները կուսակցություն ստեղծում:
– Այդ հարցը ստեղծողներին տվեք: Իսկ ես կարող եմ իմ համար պատասխանել: Ես ուզում եմ մեծամասնական ընտրվեմ իմ ծննդավայրում` Գավառում: Դնելու եմ ու մեծամասնականով գնամ: Հետո, ես պահելու եմ Հանրապետականի շահերը, որովհետեւ ես առաջուց գնացել եմ Հանրապետականով եւ ես Հանրապետականին չեմ դավաճանի:
– Խորհրդարանը համարվում է քաղաքական մարմին, սակայն ԱԺ-ում քաղաքական գործիչները քիչ են ներկայացված եւ այսօր ավելի շատ գործարարներն են դառնում պատգամավոր: Դուք, որպես գործարար, ինչպես կմեկնաբանեք այդ փաստը:
– Որովհետեւ բոլորն ուզում են գալ խորհրդարան, որ կարողանան իրենց մեծ փորձից ելնելով, բիզնեսի գոտում գտնված մարդիկ, ովքեր զբաղվել են, գիտեն էկոնոմիկան ինչ է, մի բանով խորհրդարանում կարողանան մեր բիզնեսի զարգացմանը, մեր էկոնոմիկային օգուտ տան:
– Տեսակետ կա, որ պատգամավորի մանդատը բիզնեսն ապահովագրելու համար է: Դուք կիսո՞ւմ եք այդ տեսակետը:
– Ամեն մարդ իր տեսակետը, իր ձեւը, մտածողությունն ունի: Մանդատը, ճիշտ է, լավ է, իր ամեն ինչերը ունի: Բայց ինձ թվում է, որ եթե ուզում ես լուրջ բիզնեսով զբաղվես, ուրեմն պիտի լուրջ բիզնեսով զբաղվես, եթե ուզում ես քաղաքականությամբ զբաղվես, ուրեմն պիտի զբաղվես քաղաքականությամբ, հետո պաշտպանես քո երկրի բիզնեսմեններին, էկոնոմիկան, որպեսզի աճի, զարգանա ու ապագա ունենա երկիրը:
– Առանց պատգամավորի մանդատի, հնարավո՞ր է արդյոք հաջող բիզնես կազմակերպել Հայաստանում:
– Առանց մանդատի ես բիզնեսմեն եմ եղել, լավ էլ հաջողություններ եմ ունեցել: