– ՀՅԴ գերագույն ժողովին նախորդած կուսակցական միջոցառումների ժամանակ դժգոհություններ ու քննադատություններ են հնչել ձեր կուսակցության ղեկավարների նկատմամբ: Ո՞րն է այդ դժգոհոության պատճառը, եւ ի՞նչ քննարկումներ են ընթանում:
– Նման քննարկումներ միշտ էլ եղել են մեծ ժողովներից առաջ, պարզապես մեր հասարակությունը սովոր չի տեսնել ներքին ժողովրդավարական չափանիշներով գործող կազմակերպություն: Որքան էլ մեր մասին խոսում են, թե փակ են, ՀՅԴ-ն այս երկրում միակ ժողովրդավարական կուսակցությունն է: ՀՅԴ Գերագույն ժողովին նախորդում են ստորին մակարդակների ժողովները, որտեղ, բնականաբար, շատ բուռն քննարկումներ են տեղի ունենում: Այդ ժողովների ժամանակ քննադատության ու դժգոհության հիմնական թիրախը ղեկավարությունն է լինում, որովհետեւ նրանք են հաշվետվություն ներկայացնում:
– Ձեր կարծիքով` ԵԽ նախագահ Հերման Վան Ռոմպեյի այցն ու ելույթն ԱԺ-ում ի՞նչ ուղերձներ էին պարունակում ՀՀ իշխանություններին: Նրան ի՞նչ հարցեր պետք է ուղղեր ՀՅԴ խմբակցությունը, որի հնարավորության մասին թեեւ նախապես հայտարարվել էր, սակայն հետո առաջարկվեց դրանք գրավոր ուղղել:
– Հերթական այց է տարածաշրջան, որեւէ առանձնահատուկ բան չկար: Նախապես հայտարարվել էր, որ մենք պետք է հարցեր տալու հնարավորություն ունենայինք: Ինչ վերաբերում է հարցերին, դրանք պետք է տայինք` նրա ելույթից ելնելով: Ինքը ելույթում չանդրադարձավ կամ հպանցիկ անդրադարձավ ընտրական գործընթացներին, գնահատումներ տվեց, որոնք մենք ընդհանրապես չենք կիսում: Դրա հետ կապված հարցեր կտայինք: Տարածաշրջանում լարվածությանը, սահմանային իրադարձությունների հետ կապված երկիմաստ ու բոլորին ուղղված կոչ արեց, որտեղ հայտնի չէ, թե ով է մեղավոր նման խախտումների համար: Ոչ մի շեշտադրում չի արել: Բոլոր հետաքրքիր շեշտադրումները, որ պետք է աներ, դրանք շրջանցեց:
– Ինչպե՞ս եք գնահատում Ռուբեն Հայրապետյանի` պատգամավորական մանդատից հրաժարվելու քայլը:
– Նվազագույնն էր, որ պետք է այս պահին կատարվեր: Բայց դա չի նշանակում, որ մենք պետք է թուլացնենք մեր վերահսկողությունը քաղաքացիական այս խնդրի նկատմամբ, սա պետք է առիթ լինի, որ այսպիսի դեպքերն ընդհանրապես ՀՀ-ում կանխվեն: Եվ դա անելու միակ գրավականն այսօր քաղաքական եւ հասարակական ուժերի ակտիվությունն է: Իսկ հիմա այս գործընթացը պետք է վերցվի ԱԺ վերահսկողության տակ: Դրանից հետո մենք կեզրակացնենք, թե հաջորդ քայլը որը պետք է լինի: Մենք պատրաստվում ենք խորհրդարանական ամբողջական վերահսկողություն իրականացնել այդ գործընթացի վրա, որ կասկած չմնա, թե լիարժեք բացահայտում տեղի կունենա: Որ կպատժվեն բոլորը, ովքեր այս գործի հետ ուղղակի կամ անուղղակի կերպով առնչություն են ունեցել, որ սա դաս լինի նաեւ մյուս բոլորի համար: Այստեղ շատ խնդիրներ կան` կապված թիկնազորային ծառայության ամբողջական կարգը պաշտպանելու, նրանց հովանավորյալների հետ: Այսօր մեր ժողովրդի մոտ առաջացած խնդիրներն այնպիսի մի հոգեկան վիճակ են առաջացրել, որ մարդիկ իրենց պետության մեջ անպաշտպան են զգում:
– Այսինքն` կարծում եք, որ Ռ.Հայրապետյանի հրաժարականը բավարար չէ՞: Նա այլ պատասխանատվությո՞ւն էլ պետք է կրի:
– Եթե ինչ-որ առնչություն ունի, այո, իհարկե, պետք է իրավական պատասխանատվության խնդիր առաջանա: Բայց դա պետք է քննությունը պարզի: Եվ որպեսզի համոզվենք, որ Վահե Ավետյանի մահվան գործի քննությունը օբյեկտիվ է ընթանում, պետք է ԱԺ ուժերի լիարժեք վերահսկողություն այդ գործի նկատմամբ:
– Ի՞նչ նպատակ են հետապնդում Հայաստանի մասին միջազգային կառույցների վերջին բացասական ազդակները` խորհրդարանական ընտրությունների դեպքում ԵԱՀԿ/ԺՀՄԻԳ-ի զեկույցը, ԵԽ ԽՎ-ն նորից բարձրացրեց մարտի 1-ի իրադարձությունները բացահայտելու պահանջը: ԵՄ-ն չգումարեց ՀՀ-ին ֆինանսական միջոցներ հատկացնելու հետ կապված համաժողովը, եւ այլն:
– Չի կարելի շրջանցել այն փաստը, որ ԱԺ վեց խմբակցություններից հինգն այս կամ այն կերպ հայտարարել է կեղծիքների մասին, չորսը հայտարարել է համատարած կեղծիքների մասին: Ուրեմն խոսել, որ այս խորհրդարանը լիարժեք արտահայտում է հասարակության տրամադրությունների արտացոլումը, ճիշտ չէ: Բնականաբար, կասկածի տակ է դրված դա: Միջազգային կառույցները չեն կարող Հայաստանի իրականությունից կտրված հայտարարություններ անել: Վերջնական զեկույցները պետք է ի նկատի ունենան նաեւ հետընտրական զարգացումները: Եվ պարտադիր չէ, որ անպայման բախումներ լինեն, որ ցույց տան, թե ընտրություններում խախտումներ են եղել: Ուժերը հայտարարել են ընտրակեղծիքների մասին, եւ չի կարելի դրա հետ հաշվի չնստել: Դա արդեն այդ կառույցների հեղինակության խնդիր էր: