ՀՀԿ նախագահ Սերժ Սարգսյանը երեկ քարոզարշավի շրջանակներում այցելել է Կոտայքի մարզ, որտեղ ընտրողներին կոչ է արել թիվ 28 ընտրատարածքում մեծամասնական ընտրակարգով ձայն տալ «մեր պատգամավոր», ԲՀԿ նախագահ Գագիկ Ծառուկյանին: Հիշեցնենք, որ ՀՀԿ-ն այդ ընտրատարածքում թեկնածու չի առաջադրել: «Մենք այնտեղ, որտեղ թեկնածու չենք առաջադրել, պաշտպանում ենք մեր կոալիցիոն գործընկերներին, եւ այստեղ, բնականաբար, մենք պաշտպանում ենք պարոն Գագիկ Ծառուկյանի թեկնածությունը: Բոլորիդ կոչ եմ անում քվեարկել մեր պատգամավորների օգտին»,- ասել է Ս. Սարգսյանը: Իսկ Չարենցավանում Ս. Սարգսյանը հանդես է եկել բոլոր քաղաքական ուժերին` առանց բացառության, միասին պայքարելու, միասին աշխատելու կոչով` ասելով. «Ինձ համար բոլորն էլ` մերոնք են: Հիմա էլ բոլորին ասում եմ` եկե՛ք միասին պայքարենք, եկե՛ք միասին աշխատենք: Սեփական սխալը վեր հանելը եւ ուղղելը հեշտ բան չէ: Մարդը հեշտությամբ է մատնանշում ուրիշի թերությունը, բայց սեփականը կա՛մ չի տեսնում, կա՛մ էլ չի ուզում տեսնել: Վստահ եմ` սեփական սխալը վեր հանելն ու շտկելը ուժեղին, իսկապես ուժեղին վայել գործ է»:
