Օրեր առաջ տեղեկատվություն էր տարածվել այն մասին, որ փետրվարի 2-ից Հայաստանում գործող «Պուտին» ակումբների պաշտպանության հարցում հանդես են եկել ոչ միայն հասարակական կազմակերպություններ, այլեւ 3 քաղաքական ուժեր` Հայաստանի Դեմոկրատական կուսակցության նախագահ Արամ Սարգսյանը, ՀՌԱԿ ատենապետ Հարություն Առաքելյանը եւ ՍԻՄ նախագահ Հայկ Բաբուխանյանը: Երեկ փորձեցինք որոշ հարցերի պատասխաններ ստանալ նրանցից:
Հիշեցնենք, որ խոսքը ՌԴ վարչապետ Վլադիմիր Պուտինի անվամբ ակումբներ բացելու մասին է, որոնց նպատակը Պուտինի գաղափարախոսության զանգվածային տարածումն է Հայաստանում, ինչպես նաեւ, ըստ նախաձեռնության հեղինակների` հայ-ռուսական կապերի ամրապնդումը: Ինչեւէ, ՀԴԿ նախագահ Ա. Սարգսյանն անտեղյակ էր իր` «Պուտին» ակումբներին «պաշտպանության» նախաձեռնության մասին: «Մենք անտեղյակ ենք այդ գաղափարից, եւ ընդհանրապես, որեւէ մեկը մեզ հետ չի խորհրդակցել եւ չի հարցրել` մենք արդյո՞ք համաձայն ենք, թե՞ ոչ: Ես ուղղակի չգիտեմ, թե այդ նախաձեռնողը` Անդրանիկ Նիկողոսյանը, որտեղի՞ց է որոշել, որ Արամ Սարգսյանը եւ Դեմոկրատական կուսակցությունը աջակից են իր այդ նախաձեռնությանը»,- ասաց ՀԴԿ նախագահը` նշելով, որ իրենց «աջակցության» մասին իմացել էին մամուլից, եւ փաստի առաջ են կանգնել: «Ես չեմ կարողանում գտնել այդ անձին, որի հետ կուզեի խոսել, իմանալ, թե ո՞վ է նրան այդ իրավունքը վերապահել, որ մեր անունն այդտեղ հայտարարի: Անկեղծ ասած, առաջին անգամ եմ լսում, որ այդպիսի ակումբ են ուզում բացել»,- ընդգծեց Ա. Սարգսյանը: ՀՌԱԿ ատենապետ Հարություն Առաքելյանի խոսքով` ոչ թե կուսակցությունն է հանդես եկել ակումբների պաշտպանությամբ, այլ` ինքը: «Հարցազրույցն ինձ հետ է արվել, եւ ինքս եմ իմ կարծիքը հայտնել, այնպես որ, կուսակցությունն այդ հարցով առանձին քննարկումներ չի անցկացրել: Բայց կարող եմ ընդհանուր կարծիք ասել` բոլորս էլ կողմ ենք, ի՞նչ է եղել: Եթե Ադենաուերի ակումբ է ստեղծվում, թող մի հատ էլ «Պուտին» ակումբ ստեղծվի` խնդիր չենք տեսնում այդտեղ, բայց քանի որ այն ստեղծվում է Ռուսական գրքի կենտրոններում, կարծում ենք` լավ է, որ մարդիկ գնան, այս գլոբալիզացիոն համակարգչային դարում առնչվեն նաեւ գրքի հետ: Վատ բան չենք տեսնում այդտեղ»,- նշեց Առաքելյանը: Իսկ ՍԻՄ նախագահ Հայկ Բաբուխանյանի փոխանցմամբ` ինքը խնդիր չունի այդ ակումբներին պաշտպանելու: «Եթե դուք ինչ-որ տեղեկատվություն ունեք, որ ես պաշտպանել եմ դրան, ապա նման բան չկա, պարզապես կարծում եմ` մի կողմից` տարօրինակ է այլ պետության ղեկավարի անունով ակումբներ բացելը: Եթե վաղն էլ Սարկոզիի Կամ Օբամայի անունով լինի, էլի կզարմանամ, բայց բոլոր դեպքերում, ինչպես ինձ բացատրեցին, խոսքը բանավիճային ակումբների մասին է, որտեղ պետք է քննարկվեն Պուտինի, այսպես ասած` քաղաքական դոկտրինները»,- նշեց Հ. Բաբուխանյանը` օգտակար համարելով բանավիճային ակումբների ստեղծումը: Վերջինս մեկ անգամ եւս շեշտեց, որ ինքն ակումբների գործունեության եւ նպատակների մասին կարդացել է մամուլում: Ինչեւէ, երեկ որոշ հարցերի պատասխաններ մենք ստացանք ԱՊՀ երկրների երիտասարդական միության կառավարման խորհրդի նախագահ Անդրանիկ Նիկողոսյանից, ով բնակվում է Մոսկվայում: Վերջինիս հետ մենք խոսեցինք հեռախոսով:
– Ինչո՞վ է պայմանավորված «Պուտին» ակումբների ստեղծումը Հայաստանում: Դուք բազմիցս հայտարարել եք, որ այդ ակումբների ստեղծումը քաղաքական որեւէ ենթատեքստ չի հետապնդում, եւ որ դրանք հասարակական նպատակներով են ստեղծվում: Ինչպե՞ս հասկանալ դա, եթե խոսքը քաղաքական գործչի գաղափարների պրոպագանդման մասին է:
– Նախ` «Պուտին» ակումբը հասարակական կենտրոն է: «Պուտին» քաղաքական կենտրոն չենք ստեղծում Հայաստանի Հանրապետությունում: Եվ երկրորդ` «Պուտին» ակումբ հասարակական-մշակութային կենտրոն ստեղծելու հիմնական գաղափարը եղել է Հայաստանի Հանրապետությունից մի շարք շնորհալի երիտասարդների առաջարկով: Նրանք 15-20 օր անընդհատ առաջարկներ են արել, եւ քննարկման արդյունքում որոշում կայացրեցին, որ նմանատիպ ակումբներ ստեղծեն ԱՊՀ բոլոր տարածաշրջաններում, ընդ որում` նաեւ Հայաստանում: Ակումբները հիմնված են հետեւյալ սկզբունքի վրա` հասարակական նոր շփումներ եւ հարաբերություններ հայ եւ ռուս երիտասարդության շրջանում` նոր մտածելակերպի, նոր գաղափարի, բարեկամության ավելի ջերմ եւ սերտ մթնոլորտ ստեղծելու կապակցությամբ: Հիմնական գաղափարը կայանում է դրանում:
– Իսկ ովքե՞ր են այդ շնորհալի երիտասարդները, ովքեր առաջ քաշեցին նշյալ գաղափարը:
– Մի շարք երիտասարդներ են, որոնց անունները կարող եմ տալ, եւ իրենցից կարող եք հարցազրույցները վերցնել, ձեր բոլոր հարցերի պատասխանները կարող եք նրանցից ստանալ: Նրանք շատ լավ կպատասխանեն: Օրինակ, «Եվրասիական ինտեգրացիա» հ/կ-ի նախագահ Բաբկեն Հարությունյանը, Հայ եւ ռուս երիտասարդական խմբավորումից` Արման Հակոբյանը, կա Արարատ Ստեփանյան: Ամսի 2-ին կենտրոնի բացմանը կարող եք այդ հարցերով դիմել նրանց, թե ինչո՞ւ են ցանկանում, որ Հայաստանում լինեն այդ ակումբները: Իսկ ինչո՞ւ` չի՞ կարելի, որ Հայաստանում մարդիկ` նույնիսկ 5 հոգի, 10 հոգի հասարակական նախաձեռնություն անեն, եւ ինչ-որ մի լավ բան ուզենան անել:
– Իսկ, օրինակ, ի՞նչ միջոցառումներ են անցկացվելու այդ կենտրոններում: Ի՞նչ ծրագրեր կան:
– Մանրամասն ծրագրերը մոտակա օրերին կհրապարակենք, թե ինչե՞ր պետք է տեղի ունենան, ի՞նչ հասարակական նախաձեռնություններ պետք է լինեն, ի՞նչ ծրագրեր պետք է տեղի ունենան այդ ակումբներում: Հիմա ակտիվ աշխատանքներ են գնում վերջնական տեսքի բերելու ուղղությամբ: Մոտակա օրերին ամբողջ փաթեթը կլուսաբանվի, որովհետեւ նախաձեռնությունը Հայաստանում է եղել, եւ Հայաստանում էլ հիմա աշխատում են դրա ուղղությամբ:
– Քանի՞ ակումբ է բացվելու Հայաստանում:
– Առայժմ կբացվի մեկ ակումբ Երեւանում, իսկ մնացած տեղերում ՍՊՀ-ում շատ-շատ են բացվելու: Բայց առայժմ մեկ ակումբ կբացենք Հայաստանում, որից հետո դեռ կորոշենք` կշարունակե՞նք, թե՞ ոչ:
– Ակումբը ղեկավար ունենալո՞ւ է:
– Այո՛:
– Եվ ո՞վ է լինելու ղեկավարը:
– Արարատ Ստեփանյանը, ով արդեն նշանակվել է մեր եւ ԱՊՀ տարածաշրջանային կենտրոնի ղեկավար Երեւանի մասնաճյուղում:
– Իսկ ԱՊՀ ո՞ր երկրներում են բացվելու նման ակումբներ:
– Բոլոր երկրներում անխտիր:
– Դուք` որպես ԱՊՀ երկրների երիտասարդական միության կառավարման խորհրդի նախագահ, ո՞ր երկրների երիտասարդական միություններին եք ներկայացրել առաջարկը:
– ԱՊՀ տարածաշրջանի բոլոր երիտասարդական կազմակերպություններին ներկայացրել ենք, կոչով ենք հանդես եկել: Եվ ունենք բազմահազար առաջարկներ, որոնք գտնվում են քննարկման փուլում, եւ մոտակա օրերին բոլորս իրականացած կտեսնենք հարյուրավոր նմանատիպ ակումբների ստեղծման արարողություն:
– Այնուամենայնիվ, ո՞ր երկրներում եք ներկայացրել Ձեր առաջարկը:
– Բոլոր:
– Օրինակ:
– Անխտիր բոլոր երկրներում: Առաջինն սկսել ենք Ղազախստան, հետո Բելառուս, ու այդպես շարունակվելու է, որովհետեւ բոլոր երկրներից էլ ունեմ նման նախաձեռնություններ եւ առաջարկներ:
– Իսկ ֆինանսական ի՞նչ միջոցներ եք ծախսել ակումբների ստեղծման համար, եւ ովքե՞ր են տրամադրելու ֆինանսական միջոցները:
– Ակումբները գործելու են հիմնականում հասարակական սկզբունքներով, եւ նպաստելու են երիտասարդության փոխադարձ, համատեղ նոր ծրագրերի իրականացմանը: Այն ծրագրերը, որոնք հավանություն կստանան, այն ժամանակ կմտածենք, թե ի՞նչ միջոցներով կիրականացնենք: Իսկ ակումբների բացման համար նախապես սարսափելի որեւիցե միջոցներ չեն ծախսվել:
– Ի դեպ, ՌԴ վարչապետ Վլադիմիր Պուտինը տեղյա՞կ է այս նախաձեռնության մասին:
– Կարծում եմ, որ տեղյակ կլինի:
– Այսինքն` չեք տեղեկացրել:
– Պաշտոնապես տեղեկացվել է:
– Եվ արձագանք չե՞ք ստացել նրանից:
– Առայժմ` ոչ:
– Ինչո՞ւ: Գաղափարը հավանության չի՞ արժանացել:
– Վստահ եմ, որ գաղափարը հավանել է: Իմ կարծիքով` պատասխանը ամբողջ ԱՊՀ տարածաշրջանի խոսակցության մասին կլինի, որովհետեւ առաջարկն ամբողջությամբ նոր ենք ներկայացրել:
– Իսկ ինչո՞ւ` «Պուտին», եւ ոչ` «Մեդվեդեւ» ակումբ:
– Երկուսն էլ շատ հարգելի անձնավորություններ են ինձ համար: Քանի որ Պուտինը նաեւ նախագահի թեկնածուն է, առանձնապես որեւիցե բան չկա, եւ չեմ ուզում, որ մեր երիտասարդությանը նման հարցերի պատասխանների մեջ ներգրավեմ:
– Չե՞ք կարծում, որ ակումբի ստեղծումը ձեւավորելու է նաեւ անձի պաշտամունք:
– Այսինքն` եթե ես այդ մարդու հանդեպ ունեմ իմ կարծիքը, մտածելակերպն ու մտահղացումները, պաշտամո՞ւնք է առաջանում: Եթե վաղը Հայաստանում հայտնվեն 10 երիտասարդներ եւ ուզենան «Սարկոզի» ակումբ բացել, եթե մի 10 հոգի էլ հայտնվեն եւ ուզեն «Լեւոն Տեր-Պետրոսյան» կամ «Օբամա» ակումբներ բացել, դրա մասին ի՞նչ կասեք: Դա մարդկանց իրավունքն է, ընդամենը հասարակական նախաձեռնություն է:
– Իսկ Հայաստանի քաղաքական կուսակցություններին ներկայացրե՞լ եք նշյալ նախաձեռնությունը:
– Որեւիցե կուսակցության նման առաջարկ կամ նախաձեռնություն մեր կողմից չի առաջարկվել, եւ որեւիցե կուսակցության նախագահի հետ նման հարց եւ պատասխան չի քննարկվել: Ես անձամբ որեւիցե մեկի հետ նման բան չեմ խոսել:
– Եվ վերջում` խոսակցություններ կան, որ Դուք եք ֆինանսավորում «Չենք լռելու» քաղաքացիական ակտիվ նախաձեռնությունը: Ի՞նչ կասեք այս մասին:
– Ես «Չենք լռելու»-ի հետ ընդհանրապես կապ չունեմ: Դրանք բացարձակ չեն համապատասխանում իրականությանը: