«ՀԱԿ-ը կարող է համագործակցել «Բարգավաճ Հայաստան» կուսակցության հետ, եթե այս ուժը փորձի «խզել անցյալի հետ իր կապերը եւ պատրաստ լինի ռեժիմի դեմ պայքարի ելնել»,- «Ազատություն» ռ/կ-ի հետ զրույցում ասել է ՀԱԿ համակարգող Լեւոն Զուրաբյանը` պատասխանելով այն հարցին, թե որքանո՞վ է հնարավոր երկու ուժերի համագործակցությունը, եթե Գագիկ Ծառուկյանի գլխավորած կուսակցությունը կոալիցիայից դուրս գա եւ գործի Ռոբերտ Քոչարյանից անկախ: «Դա կախված է նրանց կեցվածքից. եթե նրանք քայլեր անեն, որոնք ցույց են տալիս, որ, այնուամենայնիվ, անցյալի հետ փորձում են խզել իրենց կապերը եւ գիտակցել են, որ այս ռեժիմը վտանգավոր է Հայաստանի պետականության գոյության համար, պատրաստ են գոնե քաղաքականապես աջակցել ռեժիմի դեմ այս համաժողովրդական շարժմանը, այո, ինչո՞ւ չէ»,- հայտարարել է Զուրաբյանը: Հիշեցնենք, որ ՀԱԿ առաջնորդ Լեւոն Տեր-Պետրոսյանը հոկտեմբերի 1-ի հանրահավաքում` անդրադառնալով Հանրապետական եւ «Բարգավաճ Հայաստան» կուսակցությունների հակասություններին եւ համոզմունք հայտնելով, որ «Բարգավաճ Հայաստանը» չի կարող Ռոբերտ Քոչարյանին հենարան դառնալ, միաժամանակ հայտարարել էր. «Որպես կուսակցություն` ես համարում եմ, որ մենք շատ ավելի պետք է հաշվի նստենք ԲՀԿ-ի հետ, որովհետեւ դա, ինչ էլ ասեք, կուսակցություն է. իսկ ՀՀԿ-ն կուսակցություն չէ, դա օպորտունիստների մի խումբ է, որը Քաջ Նազարի բախտով եկել է իշխանության եւ մտածում է, որ հավերժ պետք է պահպանի այդ իշխանությունը»: Հարցին, թե արդյո՞ք սա կոալիցիայի կազմից դուրս գալու կոչ էր` ուղղված ԲՀԿ-ին, Զուրաբյանը պատասխանել է. «Հիմա դուք դա կարող եք վերաբերել միայն ԲՀԿ-ին, բայց ընդհանրապես մենք համարում ենք` այսօր քանի որ գլխավոր խնդիրը Սերժ Սարգսյանի հրաժարականն է, դրանից հետո մենք համարում ենք, որ դուռը կբացվի ժողովրդավարության հաստատման համար, կարող եք համարել սա կոչ բոլոր ուժերին, հասարակության բոլոր շերտերին, կազմակերպություններին, մարդկանց, որոնք անգամ հարմարվել են այս ռեժիմին կամ համագործակցել են նրա հետ: Գալիս են վճռորոշ, օրհասական պահեր պետականության համար, երբ արդեն անգամ կարեւոր էլ չէ, թե անցյալում ինչ վարքագիծ է որդեգրել այս կամ այն ուժը, այսօր պահն է, որ նրանք գիտակցեն, որ այսպես շարունակել հնարավոր չէ, պետք է սկսեն այս ռեժիմի կազմաքանդումը»: Ի պատասխան այն դիտարկմանը, թե արդյո՞ք ԲՀԿ-ն եւս օլիգարխիկ ռեժիմի մաս չի կազմում, Զուրաբյանն ասել է. «Իհարկե, կազմում է, բայց ցանկացած զենք, որ կարելի է օգտագործել, պետք է օգտագործվի: Խոսքը գնում է այն քաղաքական իշխանության կազմաքանդման մասին, որը սպասարկում է օլիգարխիային: Երբ ժողովուրդը այսպիսի անհաշտ պայքարի մեջ է սեփական բռնապետական ռեժիմի հետ, ընդդիմությունը, համաժողովրդական շարժումը պետք է փնտրի ցանկացած հնարավորություն` ռեժիմից ինչ-որ մասեր պոկելու, բերելու համաժողովրդական շարժման կողմը»: Իսկ «Ժառանգություն» կուսակցության փոխնախագահ Ռուբեն Հակոբյանն օրինաչափ համարելով իշխանական դաշտի խմորումները, կարծիք է հայտնել, որ ԲՀԿ-ի կոալիցիայից դուրս գալը եւ առանձին մասնակցությունը ընտրություններին քաղաքական ողջ դաշտին է ձեռնտու: «Ես առաջին հերթին նկատի ունեմ այն, որ բազմաբեւեռ ընտրությունների ժամանակ ընտրությունները համեմատաբար ավելի արդար կլինեն, այսինքն` մրցակցային դաշտը որոշակիորեն արդարության հնարավորություն կստեղծի: Մյուս կողմից, եթե այսքան բանից հետո ստորագրվի նոր հուշագիր, այսպես կոչված` լայն, մեծ կոալիցիա ձեւավորելու համար, ընդդիմությունը գերլարումով պարտադրված է լինելու ինչ-որ տեղ համախմբվել, այլ կերպ հնարավոր չի լինի»,- ասել է Հակոբյանը: Հարցին, թե հնարավո՞ր է, որ «Ժառանգությունը» պատրաստակամություն հայտնի միանալ կամ համագործակցել ԲՀԿ-ի հետ, Ռուբեն Հակոբյանը պատասխանել է. «Ես ընդհանրապես համագործակցություն դիտում եմ բոլոր այն ուժերի հետ, որոնք կողմ կլինեն արդար ընտրություններ անցկացնել: Այստեղ ես տեսնում եմ դաշտ, որ բոլոր ուժերը կարող են համախմբվել»:
