«ԼՂՀ հակամարտության կարգավորման դեպքում կա երկու մոտեցում: Մոտեցում, որին դեմ է Ադրբեջանը, եւ մոտեցում, որին դեմ է Հայաստանը: Այդ մոտեցումներից մեկը գալիս է Մինսկի խմբից, հիմնականում Արեւմուտքից` Մադրիդյան սկզբունքների հիման վրա: Երկրորդը գալիս է Մոսկվայից, եւ դա Մադրիդյան նորացված սկզբունքների հիման վրա է»,- երեկ մեր թղթակցի հետ զրույցում ասել է «Հանրապետություն» կուսակցության նախագահ Արամ Սարգսյանը` անդրադառնալով Աստանայում տեղի ունենալիք ԵԱՀԿ գագաթաժողովին: «Թե այս կողմերից որն ավելի ճնշող կլինի, ըստ դրա էլ կփորձեն լուծել ԼՂՀ հարցը»,- ավելացրել է նա: Ի դեպ, Ա.Սարգսյանը դեկտեմբերի 6-11-ը մեկնելու է ԱՄՆ: Նա ելույթ է ունենալու Ատլանտյան խորհրդի անվտանգության կենտրոնում եւ հանդիպումներ է ունենալու ամերիկյան պաշտոնյաների հետ: Ա.Սարգսյանը հանդիպելու է նաեւ ԱՄՆ-ի հայկական համայնքի ներկայացուցիչների հետ:
