Եվրախորհրդի Խորհրդարանական վեհաժողովը Ադրբեջանի իշխանություններին կոչ է արել ազատ արձակել անազատության մեջ գտնվող լրագրողներին` անընդունելի համարելով լրատվամիջոցների նկատմամբ ճնշումները երկրում: «Ադրբեջանի ժողովրդավարական հաստատությունների գործունեության մասին» բանաձեւում, որը անցած շաբաթավերջին ընդունվել է ԵԽ ԽՎ-ի նստաշրջանում, Վեհաժողովը դատապարտում է լրագրողների ձերբակալությունների, ահաբեկման, ֆիզիկական հաշվեհարդարի սպառնալիքների դեպքերը: Վեհաժողովը վկայակոչում է Մարդու իրավունքների եվրոպական դատարանի վճիռը ահաբեկչության մեղադրանքով 8.5 տարվա ազատազրկման դատապարտված լրագրող Էյնուլա Ֆաթուլաեւի բողոքի կապակցությամբ: Հիշեցնենք` այս տարվա ապրիլին Եվրադատարանը եզրակացրել է, որ Ֆաթուլաեւին դատապարտելու որոշումը ապօրինի է, եւ նա պետք է անհապաղ ազատ արձակվի, իսկ Ադրբեջանի կառավարությանը պարտավորեցրել է լրագրողին որպես փոխհատուցում վճարել 25 հազար եվրո: Ադրբեջանի իշխանությունները, սակայն, դեռ չեն կատարել Եվրադատարանի վճիռը: Վեհաժողովը մտահոգություն է հայտնել նաեւ երիտասարդ ակտիվիստներ, բլոգերներ Ադնան Հաջիզադեին եւ Էմին Միլիին խուլիգանության մեղադրանքներով համապատասխանաբար 2.5 եւ 2 տարի ազատազրկման դատապարտելու առնչությամբ: Իրավապաշտպանները Հաջիզադեին եւ Միլիին համարում են քաղբանտարկյալներ: ԵԽ ԽՎ-ի ընդունած բանաձեւում մտահոգություն է արտահայտված նաեւ «Թալիշների ձայն» թերթի գլխավոր խմբագիր Նովրուզալի Մամադովի մահվան առնչությամբ: Պետական դավաճանության մեղադրանքով 10 տարվա ազատազրկման դատապարտված 68-ամյա Մամադովը անցյալ տարվա օգոստոսին մահացել է բանտում: Մեջբերելով Եվրախորհրդարանի դեկտեմբերի 17-ի զեկույցը, ըստ որի` զանգվածային լրատվամիջոցների ազատության հետ կապված իրավիճակը Ադրբեջանում վատացել է, Վեհաժողովը Ադրբեջանի իշխանություններին կոչ է անում ապաքրեականացնել զրպարտության համար պատասխանատվություն սահմանող հոդվածները, իսկ նոյեմբերին երկրում անցկացվելիք խորհրդարանական ընտրություններին ընդառաջ` պայմաններ ստեղծել լրատվամիջոցներում բազմակարծության համար, հավաքների ազատության համար, բարեփոխել Ընտրական օրենսգիրքը: «Առաջիկա խորհրդարանական ընտրությունները պետք է լիովին համապատասխանեն եվրոպական չափանիշներին»,- ասված է Ադրբեջանի վերաբերյալ ԵԽ ԽՎ-ի ընդունած բանաձեւում:
