Հունիսի 6-ին Լոս Անջելեսի Ժամանակակից արվեստի թանգարանում (MOCA) բացվեց «Արշիլ Գորկի. Հետահայաց» խորագրով ցուցահանդեսը, որ կգործի մինչեւ սեպտեմբերի 20-ը: Ցուցադրված են ամերիկահայ աշխարհահռչակ նկարչի 73 գեղանկարներ, 49 գծանկարներ: Արվեստաբանները Արշիլ Գորկուն համարում են աբստրակտ էքսպրեսիոնիզմի եւ սյուրռեալիզմի առաջատար նախահայրերից մեկը:
Մինչ ցուցահանդեսը` հունիսի 5-ին, թանգարանը հատուկ միջոցառում էր կազմակերպել մշտական անդամների, հատուկ հրավիրյալների համար: Ռոք երաժիշտ Սերժ Թանգյանը երգեց ցուցահանդեսի բացմանը:
Մասնակցում էին նաեւ ամերիկահայ երաժիշտներ, որոնք Սերժ Թանգյանի գլխավորությամբ հանդես եկան մի քանի կատարումներով: Խորհրդանշական խմբի անդամներն էին ամերիկահայ հայտնի ուդահար Անդրանիկ Կիզիրյանը, Ատոմ Էգոյանի «Արարատ» ֆիլմից հայ հանրությանը ծանոթ Դեյվիդ Ալփայը, որ նաեւ ջութակահար է (Ալփայը նկարահանվում է նաեւ Հոլիվուդում` «Տարվա Մարդը» ֆիլմում խաղացել է Ռոբին Ուիլյամսի հետ, իսկ «Թյուդորներ» պատմական հեռուստանովելում մարմնավորել է Մարկ Սմետոնին): Նրանք ներկայացրեցին հայկական ժողովրդական մի քանի մեղեդիներ, հնչեց մեկ երգ «System of a Down» խմբի երգացանկից, իսկ Ս. Թանգյանը կատարեց նաեւ իր երգացանկից «Sky is Over» երգը: Bravo.am-ի հետ զրույցում «Մատանիների տիրակալը», «Ալիսը հրաշքների աշխարհում», «Բյուզանդիայից արեւելք-451 մ.թ.ա.» ֆիլմերի պրոդյուսեր Ռոջեր Կուպելյանը ասել է. «Այս միջոցառումը մեծ նշանակություն ունի նաեւ Լոս Անջելեսի հայ համայնքի համար: Հպարտություն է, որ նման կարգի նկարիչը հայ է եւ երբեք չի թաքցրել այդ հանգամանքը, ինչպես դա հաճախ պատահում է հաջողության հասնելու ճանապարհին: Արշիլ Գորկին իր գործերով, որ տիեզերական են, համամարդկային, ներկայացրել է նաեւ հայոց պատմությունը»:
«Ուրախ եմ, որ այս թանգարանում եւս ցուցադրվեցին Արշիլ Գորկու նկարները: Ցեղասպանությունից փրկված հայ, որ նոր ամերիկյան արվեստում նոր ուղղություն սահմանեց: Հրավեր ստացա երգելու այսօրվա միջոցառմանը, եւ մի խումբ երաժիշտ ընկերներով որոշեցինք մի քանի ստեղծագործություն ներկայացնել ժողովրդական, ինչպես նաեւ՝ իմ անհատական երգացանկից»,- ասել է Ս. Թանգյանը: Հիշեցնենք, որ վերջինս օգոստոսի 12-ին Երեւանում անհատական համերգով հանդես կգա` «Elect the Dead Symphony» խորագրով շրջագայության շրջանակներում:
Ըստ Bravo.am-ի