Հոլիվուդի ռեստորաններից մեկում զինված հարձակման եւ 4 հայերի սպանության մեջ կասկածվում է ծագումով հայաստանցի 28-ամյա Ներսես Գալստյանը: Այդ մասին անցած շաբաթավերջին կայացած ասուլիսում հայտնել է Լոս Անջելեսի ոստիկանապետ Չարլի Բեքը` հավելելով, որ կասկածյալը դեռ ձերբակալված չէ: Ըստ Ոստիկանության վարկածի` ապրիլի 3-ին Գալստյանը «Հոթ սփոթ» ռեստորանում մասնակցել է անցած տարի ավտովթարից մահացած մի ծանոթի ծննդյան օրվան նվիրված հավաքույթին, որի ընթացքում վիճաբանության մեջ է մտել միջոցառման այլ մասնակիցների հետ, եւ վրդովվելով` կրակոցներ է արձակել եւ սպանել 4 մարդու, եւս 2-ին վիրավորել է: Հիշեցնենք, որ միջադեպի հետեւանքով սպանվել են 25-ամյա Հայկ Եգնանյանը, 26-ամյա Սարգիս Քարաջյանը, 28-ամյա Հարութ Բաբուրյանը եւ 31-ամյա Վարդան Թոֆալյանը: Ոստիկանությունը պարզել է, որ նրանց մեծ մասը նույնպես ծագումով հայաստանցիներ են: Իրավապահները հայտարարել են, որ սրճարանում տեղի ունեցածի հետ Գալստյանի կապը հաստատող ապացույց կա, սակայն չեն մանրամասնել: «Ասոշիեյթեդ փրես» գործակալության փոխանցմամբ` դաշնային դատավորը Գալստյանին մեղադրանք է առաջադրել նաեւ առանց արտոնագրի հրազենի հետ կապված գործարքներով զբաղվելու եւ ջնջված համարով զենք պահելու մեջ: Կասկածյալի նկատմամբ հետախուզում է հայտարարվել նրա բնակության վայրերում` Նորթ Հոլիվուդում եւ Գլենդելում:
