Մարդու իրավունքների եվրոպական դատարանը երեկ հերթական որոշումն է կայացրել Հայաստանի վերաբերյալ: Դատարանի կայքում տեղադրված տեղեկատվության համաձայն` դատարանին է դիմել 1958թ. ծնված, Երեւանում բնակվող Վարդան Մամիկոնյանը, ով 2003թ. մեղավոր է ճանաչվել ճանապարհատրանսպորտային կանոնները խախտելու, արդյունքում` անզգուշությամբ սպանություն կատարելու համար: Հիմնվելով Մարդու իրավունքների եվրոպական կոնվենցիայի 6-րդ հոդվածի` արդար դատաքննության իրավունքի վրա, Մամիկոնյանը դիմել է Եվրոպական դատարան` պնդելով, թե Հայաստանի Վճռաբեկ դատարանը չի ուսումնասիրել իր կողմից ներկայացված միջնորդությունները` օրենքի դրույթների վերաբերյալ: Եվրոպական դատարանը գտել է, որ այս դեպքում իսկապես խախտվել է Հայաստանի քաղաքացու` արդար դատաքննության իրավունքը, եւ պարտավորեցրել է Հայաստանին 1000 եվրո փոխհատուցում տրամադրել Վարդան Մամիկոնյանին` պատճառված վնասի համար:
