ԱԺ Պետաիրավական հարցերի մշտական հանձնաժողովը երեկ դրական եզրակացություն տվեց Քրեական, Քաղաքացիական եւ Քրեադատավարական օրենսգրքերում փոփոխություններ եւ լրացումներ կատարելու մասին օրինագծերը հաջորդ շաբաթ սկսվող քառօրյա նիստերի օրակարգ ընդունելու հարցին:
Հիշեցնենք, որ ԱԺ ՕԵԿ-ական պատգամավորներ Հովհաննես Մարգարյանի, ԲՀԿ-ական Ռուբեն Գեւորգյանի եւ ՀՀԿ-ական Հովհաննես Սահակյանի հեղինակած այդ օրինագծերը հիմնականում վերաբերում են լրատվական դաշտին: ԵԽ ԽՎ-ն Հայաստանից պահանջել էր ապաքրեականացնել վիրավորանքն ու զրպարտությունը: Եվ իշխանությունները օգտվելով այդ առիթից՝ որոշել են, որ քրեական պատասխանատվության ենթարկելու փոխարեն՝ վիրավորողը կամ զրպարտողը պետք է ենթարկվի վարչական տուգանքի: Առաջին դեպքում առաջարկել են սահմանել նվազագույն աշխատավարձի 250-ապատիկի, 500-ապատիկի եւ 1000-ապատիկի, այսինքն՝ 250.000, 500.000 կամ 1 մլն դրամի չափով, իսկ երկրորդ դեպքում` 500-ապատիկի, 1000-ապատիկի, եւ 2000-ապատիկի` 500.000, 1մն եւ 2մլն դրամի չափով տուգանք: Հանձնաժողովի նախագահ Դավիթ Հարությունյանը դրական համարեց այն քայլը, որ զրպարտանքը եւ վիրավորանքը ապաքրեականացվում են եւ մարդուն հնարավորություն են տալիս ենթարկվել միայն վարչական պատասխանատվության: Սակայն սա, ըստ էության, ծուղակ է, որը կարող է օգտագործվել լրատվամիջոցների դեմ: Եթե մինչեւ այժմ վերը նշված երկու դեպքերում քրեական պատասխանատվությունը գործնականում գրեթե չի կիրառվել, ապա տուգանքների այս չափի սահմանումը լրատվամիջոցին, տվյալ դեպքերում՝ թերթերին ու կայքերին, սնանկացնելու եւ փակվելու վտանգի առաջ կարող է կանգնեցնել: Հատկապես՝ երբ տուգանքի չափը որոշելու է դատարանը: Եվ այդպիսով կարծիք կա, որ իշխանությունները ամեն կերպ փորձում են սահմանափակել իրենց վերահսկողության տակ չգտնվող լրատվամիջոցների ազատությունը, որպեսզի կարողանան առաջիկա համապետական ընտրությունների ժամանակ ճնշումներ կիրառել դրանց նկատմամբ: ԱԺ «Ժառանգություն» խմբակցության անդամ Զարուհի Փոստանջյանը հետաքրքրվեց` դատավորն ինչպե՞ս պետք է որոշի, թե որ վիրավորանքի կամ զրպարտանքի դեպքում հատկապես տուգանքի ո՞ր չափը պետք է սահմանել: Արդյոք այս հանգամանքը օգտագործելով` իշխանությունները իրենց վերահսկողության տակ գտնվող դատարաններին չե՞ն ուղղորդի լրատվամիջոցներին տուգանել իրենց սեփական ցանկություններին համաձայն:
«Իր կոռումպացվածության աստիճանով պատվավոր տեղ զբաղեցնող դատարանին է վերապահված տուգանքի գումարի չափը սահմանելը. ավելի ճիշտ չէ՞ր լինի հստակ չափանիշներ սահմանել: Ես մտավախություն ունեմ, որ այն թերթերը, որոնք սպասարկում են իշխանության շահը, կտուգանվեն 1 դրամ, իսկ այլ տեսակետ գրող թերթերը՝ առավելագույն չափով: Սա հենց իրական կոռուպցիայի տեղ է»,- մտահոգություն հայտնեց պատգամավորը:
Արդարադատության փոխնախագահ Գեւորգ Մալխասյանը չհամաձայնեց ու ավելացրեց, թե կարեւորն այն է, որ բավարարված զգա վիրավորողը կամ զրպարտողը: Իսկ «Ժառանգության» անդամ Անահիտ Բախշյանն էլ հիշեցրեց, որ մարդու պատիվն ու արժանապատվությունը պաշտպանելու համար բազմաթիվ օրենքներ են ընդունվում, բայց դրանք չեն ծառայում իրենց նպատակին, որովհետեւ դրա համար բացակայում է քաղաքական կամքը: Զ.Փոստանջյանը առաջարկեց այս օրինագծի հետ կապված խորհրդարանական լսումներ կազմակերպել: Հանձնաժողովը մերժեց դա, բայց ընդունվեց պատգամավոր Վիկտոր Դալլաքյանի այն առաջարկությունը, ըստ որի՝ ԱԺ-ում առաջին ընթերցումն անցնելուց հետո օրինագիծը նորից պետք է ուղարկել Վենետիկի հանձնաժողովի փորձաքննությանը: Ի դեպ, այս օրինագծի առնչությամբ նույնպես Վենետիկի հանձնաժողովը առաջարկություններ է արել, բայց հեղինակները դրանք չներկայացրեցին: Եվ օրինագիծը առաջիկա քառօրյայի օրակարգ ընդգրկելու համար հանձնաժողովը դրական եզրակացություն տվեց: Դեմ քվեարկեցին միայն Զ.Փոստանջյանը եւ Վիկտոր Դալլաքյանը: Եվ կասկած չկա, որ եթե եկող շաբաթ քննարկվի այս օրինագիծը, անպայման կընդունվի, որովհետեւ դրա նախաձեռնողը ի դեմս հեղինակների` կոալիցիան է: