– Պարոն Բոստանջյան, ինչպե՞ս եք գնահատում «Ժառանգություն» կուսակցության շուրջ վերջին զարգացումները, մասնավորապես՝ այն, որ իշխանությունների ջանքերով ԵԽ ԽՎ-ում հայկական պատվիրակության մշտական կազմի ներկայացուցիչ Զարուհի Փոստանջյանը հեռացվեց:
– Ընդհանրապես «Ժառանգության» գործունեությունը շատ դեպքերում ուզում եմ բացասաբար գնահատել: «Ժառանգության» կողմից կատարվում են գործողություններ, որոնք հաճախ համալիր ձեւով քննարկված, դիտակված, իմաստավորված չեն, ընդ որում` ոչ միայն առաջին անգամ: Այսինքն` արվում է մեկ քայլ, կամ երկու քայլ, որն, ըստ էության, ոնց պտտվում ես` մեր երկրի համար ցանկալի չի լինում: Սկսում ես մտածել, որ կարող է պատահի՝ քաղաքական ուժն իր նպատակների համար ընդհուպ քայլեր կատարի, որոնց պարագայում երկրի շահերը կարող են վտանգվել: Այդ պարագայում ես չեմ ողջունում այդ քայլերը, լինի դա քաղաքական ուժ, թե առանձին մարդ:
– Ի՞նչ քայլերի մասին է խոսքը: Չե՞ք կարծում, որ Զ. Փոստանջյանն ընդամենը ԵԽ ԽՎ-ում ներկայացնում էր ընդդիմության տեսակետը, ինչը չի կարող անել դաշնակցական Արմեն Ռուստամյանը:
– Դուք տեսաք, թե ինչ տեղի ունեցավ, երբ Զ. Փոստանջյանի կողմից քայլեր կատարվեցին մեր պատվիրակությանը չհաստատելու ուղղությամբ: Հետո մեր թշնամիների հետ ստորագրված ինչ-որ թղթերգ Պայքարը կարելի է, եւ պայքարը պետք է, բայց պայքարը պետք է լինի այնպիսին, որ ինչը եւ ում դեմ որ պայքարում ես, նա էլ հասկանա, որ դու ճիշտ ես անում: Իսկ եթե դու անում ես չիմաստավորված, չարժեքավորված քայլեր, բոլոր դեպքերում դա արդեն, անկախ իշխանություններից, անկախ ամեն ինչից, ցանկալի չէ: Մինչեւ անգամ, որոշ պարագաներում, ինչո՞ւ չէ, նաեւ դատապարտելի է: Բոլոր դեպքերում ես չեմ կարող ընդունել այդ քայլերը, երբ, ասենք, տղաներ են կանչում, ինչ-որ հարցեր դրսին մատուցում, սեւ գույներով նկարագրում: Է՜, հասկացանք: Կարելի է չհամակերպվել, բայց մինչեւ անգամ եթե տան զավակի վարքագիծը այնպիսին չէ, ինչպիսին դու ես ուզում, դու չես կարող վեր կենալ բոլորին պատմել այդ մասին: Դրանով ի՞նչ ես ուզում անել: Ես ասում եմ, որ չի կարելի սեփական ժողովրդին, սեփական պետությանը սեւացնել հանուն միայն սեւացնելու:
– Որպես տնտեսագետ, ի՞նչ եք կարծում՝ ճգնաժամը ո՞ր փուլում է գտնվում մեր երկրում: ԿԲ-ն վերջերս բարձրացրեց վերաֆինանսավորման տոկոսադրույքը 0.5 տոկոսային կետով` պայմանավորելով դա գնաճային ճնշումների ուժեղացմամբ:
– Վերաֆինանսավորման տոկոսադրույքի բարձրացնելը ցույց է տալիս, որ ճգնաժամի ամենածանր շրջանից դուրս ենք եկել: Մեր տնտեսությունում արդեն նկատվում է ոչ միայն փողի պահանջարկի աճի միտում, այլ նաեւ գնաճային ճնշումներով պայմանավորված սցենարներ: Սա նշան է այն բանի, որ ֆինանսական ճգնաժամը, անկախ բոլոր տեսակի վատ կանխագուշակումներից եւ այն իրավիճակից, որ ներկայացնում է ընդդիմությունը, հաղթահարվում է, երկրից դուրս է գալիս: Դա ակնհայտ է:
– Եթե ճգնաժամն արդեն հաղթահարվում է, ինչո՞վ է պայմանավորված այն, որ Դուք պաշտպանում եք կառավարության կողմից բացասական եզրակացության արժանացած ՀՅԴ-ական պատգամավոր Արա Նռանյանի ներկայացրած օրենսդրական նախագիծը` այլ հավասար պայմաններում հայրենական արտադրողներին նախապատվություն տալու վերաբերյալ:
– Բոլորի կողմից էլ ընդունված է, որ այլ հավասար պայմաններում ամեն մի երկիր պետական գնումների ժամանակ նախապատվությունը տալիս է սեփական տնտեսվարող սուբյեկտներին` դրանով խթանելով նրանց գործունեությունը: Արտահանումը, իհարկե, ավելի կարեւոր է, բայց տնտեսվարողների համար պետք է ստեղծվեն նման պայմաններ: Նռանյանի կողմից արված այդ առաջարկն ինձ համար ընդունելի է: Խնդիրը կայանում էր նրանում, որ նման սկզբունքը կարող էր ընդունվել քննարկումների արդյունքում, ներառել տարբեր կողմեր, որոնք միգուցե նախագծում հաշվի առնված չեն: Բայց մենք միայն հետաձգել ենք մեկ ամսով, որպեսզի նախագծում չարտացոլված որոշ պահեր ներառենք, եւ օրինագիծը, կարծում եմ, անպայման կքննարկվի ու կընդունվի ԱԺ-ում: