Առցանց դիմումների ներկայացման վերջնաժամկետ` 2009թ. դեկտեմբերի 11:
Հայաստանում Ամերիկայի Միացյալ Նահանգների դեսպանատան Հասարակայնության հետ կապերի բաժինը հայտարարում է 2010-2011 ուսումնական տարվա Ֆուլբրայթ կրթաթոշակի մրցույթ:
Ֆուլբրայթ ծրագրով դրամաշնորհներ են տրվում օտարերկրացի գիտնականներին` ԱՄՆ համալսարաններում մեկ ուսումնական տարի կամ մեկ կիսամյակ հետ-ատենախոսական հետազոտություններ կատարելու նպատակով: Ծրագիրը կրում է Արկանզասի սենատոր Ջ. Ուիլյամ Ֆուլբրայթի անունը, որը 1946թ. նախաձեռնեց այն` «խորացնելու ԱՄՆ-ի ու աշխարհի այլ ժողովուրդների միջեւ փոխըմբռնումը»: Բոլոր դրամաշնորհները հաստատվում են Ֆուլբրայթի օտարերկրյա կրթաթոշակային խորհրդի կողմից, որն ունի 12 անդամ, որոնք նշանակվում են Միացյալ Նահանգների նախագահի կողմից:
ԿՐԹԱԹՈՇԱԿԻ ԴԻՄԵԼՈՒ ՀԱՄԱՐ ԱՆՀՐԱԺԵՇՏ ՀԻՄՆԱԿԱՆ ՊԱՅՄԱՆՆԵՐ
– ՀՀ քաղաքացու եւ մշտական բնակչի կարգավիճակ
– Աշխատանք Հայաստանում
– Դոկտորական կամ թեկնածուական (Ph.D.) գիտական կոչում
– Անգլերենի իմացություն
– Առցանց լրացված դիմում
– Երաշխավորագրեր
– Ֆիզիկական ու առողջական լավ վիճակ
ԴԻՄՈՒՄՆԵՐ ԸՆԴՈՒՆՎՈՒՄ ԵՆ ՀԵՏԵՎՅԱԼ ՈԼՈՐՏՆԵՐՈՒՄ
– Քաղաքագիտություն, տնտեսագիտություն, սոցիոլոգիա
– Միջազգային հարաբերություններ, ժուռնալիստիկա, իրավագիտություն
– Ամերիկագիտություն (ԱՄՆ պատմություն, գրականություն, հասարակություն եւ մշակույթ)
– Քիմիա, հանրային առողջապահություն ու բժշկություն
ԴԻՄԵԼՈՒ ԿԱՐԳՆ ՈՒ ՄՐՑՈՒԹԱՅԻՆ ԺԱՄԿԵՏՆԵՐԸ
Հետաքրքրված դիմորդները պետք է լրացնեն առցանց (on-line) դիմում http://apply.embark.com/student/fulbright/scholars/30/ կայքում: Պետք է ստեղծել user name եւ գաղտնաբառ, այնուհետեւ հերթով լրացնել դիմումի էջերը: Յուրաքանչյուր էջը լրացնելուց հետո պահպանեք տեղեկությունները: Պահպանելուց հետո, եթե կարիք կա, դուք կարող եք դուրս գալ կայքից եւ հետագայում նորից կկարողանաք վերադառնալ ձեր դիմումին եւ շարունակել լրացնել: Երաշխավորագրերը եւս պետք է լրացվեն առցանց: Դիմումի մեջ դուք պետք է լրացնեք երաշխավորողի էլեկտրոնային փոստի հասցեն, որով էլ երաշխավորագրի ձեւը կհասնի նրան, իսկ գրված երաշխավորագիրը հասանելի կլինի ծրագրի համակարգողին: Ձեր առցանց դիմումը ուղարկեք ՄԻԱՅՆ երբ ամբողջապես լրացված է եւ բոլոր լրացուցիչ տեղեկությունները կցված են: Դիմումը ուղարկելուց հետո այն ձեզ հասանելի չի լինի եւ փոփոխություններ կատարել չեք կարողանա:
Հաշվի կառնվեն միայն առցանց լրացված դիմումները:
Դիմումները պետք է լրացնել անգլերեն լեզվով: Ձեռագիր, ոչ ամբողջությամբ լրացված կամ ուշ ներկայացված դիմումները քննության չեն առնվում: Վերջին 5 տարիների ընթացքում Ֆուլբրայթ կրթաթոշակ ստացած մասնագետների դիմումները նույնպես քննության չեն առնվի: Բոլոր դիմումները, այդ թվում` երաշխավորագրերը, քննության են առնվում եւ տեխնիկական, եւ ակադեմիական տեսանկյուններից: Բոլոր պայմաններին համապատասխանող թեկնածուները կհրավիրվեն հարցազրույցի դեսպանատան Ֆուլբրայթ կրթաթոշակի ընտրական հանձնաժողովի կողմից, իսկ հաղթողների դիմումները` վերջնական հաստատման նպատակով, 2010թ. հունվարի 10-ին կներկայացվեն Ֆուլբրայթ օտարերկրյա կրթաթոշակային խորհրդի քննությանը ԱՄՆ-ում: Վերջնական հաղթողների անունները պարզ կդառնան 2010թ. ապրիլին, երբ ստացվի համապատասխան հաստատում հյուրընկալող համալսարանների կողմից:
Լրացուցիչ տեղեկությունների համար կարող եք զանգահարել ԱՄՆ դեսպանատան Հասարակայնության հետ կապերի բաժնի մշակութային/փոխանակման ծրագրերի պատասխանատու Անահիտ Խաչատրյանին հետեւյալ հեռախոսահամարով՝ 464700, այնուհետեւ ներքին համարը՝ 4310: