Մուրաբա եփում են հիմնականում սեխի այն տեսակներից, որոնք ունեն համեմատաբար ամուր պտղամիս, եւ ձմերուկի այն տեսակներից, որոնք հաստակեղեւ են: Սեխը կամ ձմերուկը բաժանում են շերտերի, նրանցից անջատում են կեղեւը, պտղամսի փափուկ մասն ու միջուկը: Այնուհետեւ կտրում են 2-3 սմ երկարությամբ եւ 1 սմ հաստությամբ կտորներով, որից հետո 1 ժամ պահում են կրաջրի մեջ: Կրաջուրը պատրաստում են հետեւյալ կերպ. կիրը լցնում են էմալապատ ամանի մեջ, ավելացնում այնքան ջուր, որ կրի բոլոր կտորները թրջվեն: Մի քանի րոպեից հետո կիրը սկսում է թշշալով եւ գոլորշի արձակելով բացվել սպիտակ փաթիլների նման: Եթե կիրը չի թշշում, գոլորշի չի արձակում, ուրեմն` այն փչացած է (հանգած կիր է) եւ պիտանի չէ օգտագործման: Երբ կիրն ամբողջովին բացվում է, ավելացնում են ջուր (յուրաքանչյուր 0,5 կգ կրին` 4 լիտր ջուր) լավ խառնում են ու թողնում 5-8 րոպե, որպեսզի այն հանգստանա եւ նրա մեջ եղած մանր հատիկները նստեն հատակին: Այնուհետեւ երեսից վերցնում են կրաջուրը եւ լցնում նախապատրաստած պտղի վրա: Ոչ մի կտոր պիտի դուրս չմնա կրաջրից: Կրաջրից հանելուց հետո մի քանի անգամ սառը ջրով լավ լվանում են: Ավելի լավ կլինի, եթե 1 ժամ էլ մնա սառը ջրի մեջ, որպեսզի հետագայում կիրը մուրաբայի մեջ սպիտակ մանր բյուրեղիկների ձեւով նստվածք չտա: Ապա 5 րոպե խաշում են եռջրի մեջ եւ անմիջապես սառեցնում սառը ջրով: Այնուհետեւ պատրաստում են շաքարաջուր. յուրաքանչյուր 1 կգ մաքրած պտղի համար` 1,2 կգ շաքարավազ, 2 լիտր ջուր: Շաքարաջուրը թանզիֆով քամում են, տաք վիճակում լցնում նախապատրաստած սեխի կամ ձմերուկի վրա եւ եփում մարմանդ կրակին: Նպատակահարմար է եփել 2 անգամ: Երկու անգամ եփելուց հետո մոտ 1 ժամ եռացնելուց հետո մուրաբան կրակի վրայից վերցնում են եւ թողնում, որ մնա 5-6 ժամ, ապա նորից եփում մինչեւ պատրաստ լինելը: Շաքարակալում թույլ չտալու համար եփելու վերջում` կրակի վրայից վերցնելուց 4-5 րոպե առաջ, ավելացնում են մի քիչ լիմոնաթթու կամ քացախ` 1 կգ-ին` 2 գր չափով:
