Երեկվա ասուլիսում քաղաքագետ Իգոր Մուրադյանն անդրադառնալով ԱՄՆ նախագահ Բարաք Օբամայի Մոսկվա կատարած այցին եւ ՌԴ նախագահ Դմիտրի Մեդվեդեւի հետ ստորագրած համատեղ համաձայնագրերին՝ ասել է, թե Հայաստանի համար նպաստավոր երկու համաձայնագիր է ստորագրվել: Առաջինն, ըստ նրա` հարձակողական սպառազինման կրճատման մասին պայմանագիրն է, իսկ երկրորդը` Աֆղանստանի օպերացիայի համար ՌԴ տարանցիկ ենթակառուցվածքների օգտագործման մասին համաձայնագիրը: «Դա մեզ համար չափազանց կարեւոր է, քանի որ, այսպես թե այնպես, Հարավային Կովկասի նշանակությունը, որպես տարանցիկ տարածաշրջան, նվազում է: Մենք այդ խնդրում որեւէ դեր չէինք կատարում, այդ դերը կատարում էին Վրաստանն ու Ադրբեջանը: Իհարկե, Հարավային Կովկասը կմնա կարեւոր տարանցիկ տարածաշրջան: Բայց, ես կարծում եմ, որ եթե այդ պայմանագիրը Ռուսաստանի հետ իրականացվի եւ կայուն զարգացում ունենա, ապա, այսպես թե այնպես, Կովկասը կդառնա պահեստային տարբերակ: Այսինքն՝ նա կօգտագործվի, բայց կլինի պահեստային տարբերակ»,- ասել է Ի. Մուրադյանը` հավելելով, թե Հայաստանը կշահի, եթե Հարավային Կովկասը չլինի ենթակառուցվածքների հիմնական տարանցիկ ճանապարհ, որովհետեւ այդ առումով Հայաստանը որեւէ դերակատարում չունի: Ըստ նրա` եթե Կովկասը լինում է «պահեստային ճանապարհ», ապա նվազում է Կովկասի նշանակությունը տարանցիկության առումով, հետեւաբար այդ հարցում նվազում է նաեւ Վրաստանի ու Ադրբեջանի առավելությունը մեր հանդեպ:
