– Հիմնավորումը, թե ինչու հատկապես Ձեր թեկնածությունն առաջադրվեց ԲՀԿ-ի կողմից, այն էր, որ Դուք «քաղաքի տղա» եք, եւ լավ կհասկանաք` ի՞նչ է քաղաքի կառավարումը: Արդյո՞ք իրականում միայն դա էր Ձեր թեկնածության պատճառը, թե՞ այլ պատճառներ եւս կային:
– Մեր կուսակցության առաջնորդը բազմիցս նշել է, թե ինչից է բխել իր այդ որոշումը: Պատճառն այն է, որ ես երկար տարիներ որպես կազմակերպիչ աշխատել եմ առողջապահական համակարգում, բայց հնարավորություն եմ ունեցել նաեւ ապացուցելու, որ կարող եմ տարբեր ոլորտներում եւս դրսեւորել կազմակերպչի իմ ունակությունները։ Եվ երեւի հաշվի առնելով իմ անցած ուղին, իմ հաջողված ծրագրերի իրականացումը, ինչպիսիք են` «Էրեբունի», «Նաիրի» բժշկական կենտրոնները, կուսակցությունը հարմար գտավ, որ այս ընտրություններում ես գլխավորեմ ԲՀԿ համամասնական ցուցակը։ Ի դեպ, պիտի ասեմ, որ կոնկրետ առողջապահական համակարգում իրականացված տարբեր բարեփոխումներ հենց իմ առաջարկություններով են ընդունվել, որոնք դրական ազդեցություն են ունեցել թե՛ համակարգի, թե՛ ընդհանրապես ազգաբնակչության համար: Այնպես որ, կարծում եմ, համադրելով թե՛ իմ աշխատանքի ոճը, թե՛ այն, որ ինձ վրա դրված ցանկացած խնդրի ես վերաբերվում եմ լրջագույն պատասխանատվությամբ, Գագիկ Ծառուկյանը կայացրել է այդ որոշումը։
– Դուք կարծես թե կայացման խնդիր չունեք: Ունեք ոչ թե մեկ, այլ մի քանի բիզնեսներ, այսինքն` Ձեր կյանքը բարեկեցիկ դարձնելու խնդիր էլ չունեք: Հետեւաբար, ի՞նչը ստիպեց Ձեզ մտնել քաղաքականություն:
– Գիտեք, ես այն կարծիքին չեմ, թե մարդը պետք է պաշտոն ստանձնի՝ իր կյանքը բարեկեցիկ դարձնելու համար։ Ստանձնելով այդ պատասխանատվությունը, մեր կուսակցությունն առաջնորդվում է բացառապես եւ միմիայն ժողովրդի շահով։ Իհարկե, ես կայացման խնդիր չունեմ, եւ այս դեպքում դժվարն այն է, որ շատ ավելի պատասխանատու ոլորտ ես մտնում: Բայց դա մեր կուսակցության քաղխորհրդի եւ անձամբ պարոն Ծառուկյանի որոշումն էր, ինչն ինձ համար իսկապես մեծ վստահություն է, եւ քարոզարշավի այս շաբաթներին, կարծում եմ, մեզ հաջողվեց երեւանցիներին համալիր կերպով ներկայացնել մեր ծրագիրն ու, դատելով արձագանքներից, պիտի ասեմ, որ վստահությունը մեր կուսակցության հանդեպ օր օրի մեծանում է։ Քարոզչական փուլն արդեն մոտենում է ավարտին, եւ ես այն գնահատում եմ բավականին արդյունավետ։
– Երբ հայտնի դարձավ, որ ԲՀԿ-ն առանձին է մասնակցելու այս ընտրություններին, այսինքն` առանց կոալիցիոն ուժերի հետ դաշինք կազմելու, խոսակցություններ եղան, որ ԲՀԿ-ի մասնակցությունն այս ընտրություններին ֆարս է եւ միտված է զուտ ՀՀԿ թեկնածուին աջակցելուն: Սակայն վերջին շրջանում ՀՀԿ-ի եւ ԲՀԿ-ի համակիրների միջեւ տեղի ունեցած միջադեպերը, կարծես թե, փոխում են այդ տեսակետը: Ձեր կարծիքով` ինչո՞ւ նման զարգացումներ եղան, եւ ինչո՞ւ հենց ՀՀԿ-ի եւ ԲՀԿ-ի միջեւ ծագեցին այդ ընդհարումները:
– Կոալիցիոն ուժերի միջեւ ոչ թե հակամարտություն կա, այլ` մրցակցություն, ինչը միանգամայն բնական եւ նորմալ է: Պիտի ասեմ, որ ընդհանուր առմամբ քարոզարշավն ընթանում է բավականաչափ կոռեկտ. համենայնդեպս, մենք կոռեկտության եւ հանդուրժողականության այն մարտավարությունը, ինչով սկսել ենք քարոզարշավը, այդպես էլ այն ավարտելու ենք։ Իհարկե, ցավալի է, որ չհաջողվեց խուսափել որոշ տհաճ միջադեպերից, սակայն լուրջ չէ փորձել դրանք ներկայացնելը որպես երկու կուսակցությունների միջեւ առճակատում։ Մեր ընտրական մշակույթը, ցավոք, դեռ այնպիսին է, որ ներքին օղակներում երբեմն հնարավոր չի լինում խուսափել տհաճ միջադեպերից։ Այդուհանդերձ, վստահ եմ, որ գնալով անպայմանորեն հղկվելու է ընտրական մեր մշակույթը, եւ հետագայում նման երեւույթներն ուղղակի բացառվելու են։ Ի դեպ, երեւի թե մեր տաքարյունությունն է նաեւ պատճառը, որ որոշ վրիպումներ լինում են: Ինչ վերաբերում է մեր մասնակցությանը, ապա իր գործունեության ընթացքում ԲՀԿ-ն ապացուցել է, որ երկրի հիմնական, առանցքային դերակատարներից է, որի ղեկավարն այսօր լուրջ հեղինակություն է ոչ միայն մեր երկրի ներսում, այլ նաեւ նրա սահմաններից դուրս։ Մեր կուսակցությունը Գագիկ Ծառուկյանի գլխավորությամբ ունի իր ճանապարհը, իր ծրագրերը, եւ ես վստահ հայտարարում եմ, որ մեր քվեները միայն մերն են լինելու: Մենք մեր ծրագիրը, համամասնական ցուցակի մեր անդամներին, որոնք ի զորու են կյանքի կոչել այդ ծրագիրը՝ ներկայացրել ենք ժողովրդին, ու ես չեմ կասկածում, որ մայիսի 31-ին ժողովուրդը վստահության լուրջ քվե է տալու մեզ։ Մեր կուսակցության նախագահը բազմիցս ասել է, այժմ էլ պիտի կրկնեմ նաեւ ես՝ մենք տեր ենք լինելու մեզ տրված յուրաքանչյուր քվեին. դրանում որեւէ մեկը թող չկասկածի։
– Քարոզարշավի ընթացքում` դիմելով ժողովրդին, ասում եք` ձայն տվեք Գագիկ Ծառուկյանին: Ինչո՞ւ Գ. Ծառուկյանին, երբ Դուք եք թեկնածուն: Թե՞ գտնում եք, որ այն ձայները, որ պիտի ստանաք` իսկապես ոչ թե Ձերն են, այլ` Գ. Ծառուկյանինը:
– Ճիշտ եք նկատել, ես իմ խոսքի վերջում միշտ ասում եմ` վստահեք մեզ, վստահեք մեր թիմին, մեր կուսակցությանը, մեր կուսակցության առաջնորդ Գագիկ Ծառուկյանին, որովհետեւ, այո, ես գտնում եմ, որ մեր կուսակցության հեղինակության հիմնական եւ առանցքային գործոնը դա Գ. Ծառուկյանի կերպարն է, նրա անցած ուղին եւ այն հեղինակությունը, որ նա այսօր ունի մեր ժողովրդի մեջ։ Եվ մեր կուսակցության թե՛ դեմքը, թե՛ հզորությունն առաջին հերթին պայմանավորված է մեր առաջնորդով: Այո, մենք այսօր ունենք բավականին հզոր, մեծ կուսակցություն` կադրային լուրջ պոտենցիալով, բայց շատ կարեւոր է հենց կուսակցության առաջնորդի դերը, եւ ինքը, ինչպես տեսնում եք, անձամբ է մասնակցում քարոզարշավին, ու միշտ մեր կողքին է: Ուստի այդ պատճառով էլ ես կոչ եմ անում եւ միշտ էլ կոչ եմ անելու, որպեսզի առաջին հերթին վստահեն մեր կուսակցության առաջնորդին, քանզի գաղտնիք չէ, որ ասելով «Բարգավաճ Հայաստան», ժողովուրդն առաջին հերթին տեսնում է Գագիկ Ծառուկյանին, որի խոսքին եւ գործին վստահում է անվերապահ։ Իսկ հաջողության մեր բանաձեւը միշտ եղել է՝ «Միասնական թիմ, միասնական պատասխանատվություն»։
– Իշխանական քաղաքական ուժերը պարբերաբար կրկնում են, թե պետք է բացառել ընտրակեղծիքները եւ այլն: Սակայն իրականում այսօր տեղի է ունենում հակառակը: Օրինակ, Ձեզ մեղադրում են, որ զբաղեցնելով Առողջապահության նախարարի պաշտոնը՝ առողջապահական հիմնարկներում վարչական ռեսուրսն օգտագործում եք ընտրություններին Ձեր ձայները ավելացնելու համար: Ի՞նչ կասեք այս մասին:
– Համոզված եմ, որ վաղ թե ուշ ընտրակեղծիքներն էլ են արմատախիլ արվելու շատ պարզ պատճառով` դա մեզ ուղղակի հարիր չէ: Բացի այդ, ես չեմ պատկերացնում որեւէ թեկնածուի, ով կցանկանա ընտրվել ընտրակեղծիքներով, քանզի հետագայում իր համար է դժվար լինելու աշխատելը: Երբ վստահ ես, որ քեզ ընտրել են, վստահ ես, որ ունես վստահության այդ քվեն, ապա դու ոգեւորված ու պատասխանատու աշխատում ես: Իսկ եթե չունես ընտրողի վստահությունը, այլ ինչ-որ կերպ հայտնվել ես այդ պաշտոնում, ապա դու արդեն որպես մարդ հոգեբանորեն շատ ծանր վիճակում ես հայտնվում։ Ինչ վերաբերում է ձեր հարցադրմանը՝ ընդամենը կարող եմ ասել, որ ես այսօր կարիք չունեմ բուժհիմնարկներում իմ քարոզարշավը կազմակերպելու, քանի որ բժշկական աշխարհն ինձ հրաշալի ճանաչում է. ես, արդեն 30 տարի է, այս համակարգում եմ: Այնպես որ՝ ես որեւէ լծակ օգտագործելու կարիք պարզապես չունեմ: Ես անգամ նպատակահարմար չեմ գտել մտնել բուժհիմնարկներ եւ հանդիպել կոլեկտիվների հետ, որովհետեւ գտնում եմ, որ բուժաշխատողների շրջանում ես իմ գործունեությամբ շուրջ 20 տարի արդեն քարոզարշավ եմ անցկացնում:
– Արդյոք ընտրակեղծիք չէ՞ այն փաստը, որ ԲՀԿ-ն ընտրություններից առաջ համաքաղաքային անվճար ստոմատոլոգիական կամ` անվճար դիագնոստիկ եւ այլ ծառայություններ է մատուցում ժողովրդին:
– Նման ծառայությունները ոչ թե քարոզարշավի փուլում են իրականացվել, այլ` մեկ, մեկուկես ամիս առաջ: Ի դեպ, այդօրինակ միջոցառումներն ավանդույթ են դարձել. մենք միշտ նմանատիպ ակցիաներ անում ենք, ուստի այս տարի եւս որոշեցինք շարունակել ժողովրդանպաստ այդ ավանդույթը։ Կրկնեմ՝ դա քարոզարշավի մեկնարկից առաջ էր, եւ հնչող մեղադրանքները բնավ տեղին չեն։ Միգուցե դա պետք է այլ ժամկետներում իրականացնել, որպեսզի նախընտրական հնչերանգ չստանա եւ չշահարկվի, բայց այն, որ այդ միջոցառումներով մենք կարողանում ենք սոցիալապես անապահով, խոցելի խավին անվճար բուժծառայություն մատուցել` ես դա դրական եմ համարում։ Եվ, պիտի ասեմ, որ հանրության շրջանում եւս այն մեծ ոգեւորությամբ է ընդունվում։
– Ձեր կոալիցիոն գործընկեր, ՕԵԿ ցուցակի երկրորդ հորիզոնականը զբաղեցնող Հենրի Բակունցի գնահատմամբ` Հյուսիսային պողոտան «քարուբետոնե սառնություն» ունի, որտեղ պակասում է կանաչ տարածություն: Դուք ի՞նչ կփոխեիք քաղաքում` ընտրվելու դեպքում, կամ` Հյուսիսային պողոտայից Ձեր տպավորությունն ինչպիսի՞ն է:
– Հյուսիսային պողոտայից իմ տպավորությունն ընդհանուր առմամբ դրական է, որովհետեւ այն, ինչ կար, եւ այն, ինչ իրականացվեց` համեմատության եզրեր չունի: Դա ժամանակակից պողոտա է` ժամանակակից շինություններով: Իհարկե, ցանկալի կլիներ, որ կանաչ տարածքները շատ ավելին լինեին, որպեսզի պողոտան շնչեր։ Բայց պողոտան, որպես ճարտարապետական համալիր` հաջողված է: Ինչ վերաբերում է նրան, թե ի՞նչ կփոխեի Երեւանում ընտրվելու դեպքում, ապա իմ առաջնահերթ խնդիրը կլինի քաղաքացի-քաղաքապետարան հարաբերությունները նոր որակի վրա դնելը։ Երեւանցին պիտի վստահ լինի, որ քաղաքային իշխանությունն իր գործընկերն է։ Եվ եթե մենք կարողանանք ահա ա՛յդ որակի հարաբերություններ հաստատել՝ մնացած խնդիրները լուծելի են, եթե կա կամք, աշխատասիրությունը ու նաեւ, որ շատ կարեւոր է՝ նվիրում այն գործին, ինչով զբաղվում ես։