Ռեալիստական, իլյուստրատիվ գովազդն անցյալ է: Գովազդը կարող է իսկական
արվեստ լինել: Այդ միտքն է փորձում ապացուցել արդեն 53-րդ անգամ Կաննում
անցկացվող գովազդների միջազգային մրցույթը:
Արվեստը կոմերցիոն հոլովակում պետք է լինի այնքան, որ գովազդվող ապրանքը
հասկացվի, բայցեւ՝ լինի ինքնուրույն արվեստի գործ: Յուրաքանչյուր մարդ
կարող է իր հոլովակը Կանն ուղարկել: Օրիգինալ մտահղացում եւ գեղեցիկ
կատարում է հարկավոր: Մասնակցությունն այդ մրցույթին արդեն հաջողության
գրավական է, քանի որ տեսնողները կտեսնեն, իսկ գնահատողները՝ կգնահատեն:
Ինչպես կինոռեժիսորները, այդպես էլ՝ գովազդային հոլովակներ նկարահանող
ռեժիսորները ստանում են «Ոսկե առյուծներ»:
«Ատիր, որպեսզի կարողանաս փոխել»,- սա է «Հեռուստատեսային գովազդ»
ամենահեղինակավոր անվանակարգում հաղթող հոլովակի նշանաբանը: Ատիր հին ու
կեղտոտ դիզելային շարժիչները, որպեսզի հասկանաս «Հոնդա» ավտոմեքենայի նոր
շարժիչի գեղեցկությունն ու էկոլոգիապես մաքուր լինելը: Հին գովազդային
«տրյուկներն» արդեն չեն աշխատում. գովազդում պետք է թարմություն լինի:
Հաղթող հոլովակի պրովոկացիոն սլոգանը համատեղված էր նուրբ ու անսպասելի
էսթետիկական լուծումներով՝ մուլտֆիլմային նապաստակներով ու կարապներով: Եվ
այդ ամենն ուղեկցվում է հիթային մեղեդիով:
Գեղեցիկ մոդելային արտաքինով կանայք չեն գրավում հեռուստադիտողի
ուշադրությունը, այդ պատճառով էլ փառատոնին ներկայացված հոլովակներում շատ
էին գեր, այսինքն՝ սովորական կանայք, եւ շատ էր ինքնահեգնանքը: «Գովազդ
դիտողին սկզբում պետք է զարմացնել, տխրեցնել, ստիպել ժպտալ, հետո միայն
որեւէ բան առաջարկել»,- ասում էին գովազդի հսկա ինդուստրիայի
ներկայացուցիչները: Այս տարի Կաննում նոր մրցանակ էր սահմանվել՝
«Տիտանիում», որը պետք է հանձնվեր ոչ թե կոնկրետ որեւէ գովազդի, այլ՝
ընդհանուր գովազդային գաղափարին, որը հանրությանն է հասնում տարբեր
ուղիներով՝ եւ հեռուստատեսությամբ, եւ փողոցային վահանակների, եւ տպագիր
մամուլի միջոցով, այսինքն՝ մասսայական հարձակման է նման: Մրցում էին եւ
քաղաքական, եւ կոմերցիոն, եւ սոցիալական գովազդները:
Ժամանակակից գովազդը հանդիսատեսի նկատմամբ շատ նրբանկատ է դառնում,
գովազդային հոլովակի վերջնամասում միայն կարելի է հասկանալ՝ ի՞նչ ապրանք է
առաջարկվում: Գովազդը դուրս է գալիս ի սկզբանե իր համար նախատեսված
տարածքից եւ ավելի գլոբալ սոցիալական նշանակություն ստանում: Մարդկանց եւ
իրերի աշխարհի միջեւ գովազդը փորձում է կամուրջներ կառուցել: Դառնում է
բարի դրացիական հարաբերությունների ստեղծող: Ագրեսիվ, պարտադրող գովազդը
սկսել է կորցնել իր արդյունավետությունը: Գովազդը կարող է եւ սպառողական
ու թշնամական հասարակություն ձեւավորել, եւ շրջապատի մասին լավատեսական
տպավորություն թողնել: Կաննում նախապատվությունը տրվեց երկրորդ ուղուն:
Ն.Հ.