Երեկ «ՀՀ քաղաքական բանտարկյալների եւ հալածյալների պաշտպանության կոմիտեն» բաց նամակ է հղել Եվրոպայի խորհրդի Խորհրդարանական վեհաժողովին: Դրանում, մասնավորապես, ասված է. «ՀՀ քաղաքական բանտարկյալների եւ հալածյալների պաշտպանության կոմիտեն դիմում է ԵԽ ԽՎ-ին` կոչ անելով իր հունվարյան լիագումար նիստի ընթացքում զրկել ՀՀ խորհրդարանական պատվիրակությանը ձայնի իրավունքից: Պատճառն այն է, որ ՀՀ-ում չկա Հայաստանի ժողովրդի ազատ կամաարտահայտմամբ ընտրված խորհրդարան, եւ այդ պատվիրակությունը չի ներկայացնում մեր ժողովրդի շահերը: Հայոց խորհրդարանն այսօր ընդամենը սեփական ժողովրդի վրա կրակող, բանտերը քաղաքական հակառակորդներով լցրած, ՀՀ գործադիր իշխանության կցորդն ու շահերի արտահայտիչն է: Սեփական ապօրինի իշխանությունը երկարաձգելու նպատակով ՀՀ գործող իշխանությունները ընտրությունները բացահայտորեն կեղծելուց հետո ձեռնամուխ եղան ժողովրդի արդար բողոքը բռնությամբ ու զենքի ուժով ճնշելու գործին, ինչի ընթացքում, ըստ պաշտոնական տվյալների, զոհվեց տասը մարդ, եղան բազմաթիվ վիրավորներ, իսկ հարյուրավոր ակտիվիստներ եւ ընդդիմադիր թեկնածուի վստահված անձինք բանտեր նետվեցին, որոնցից վաթսունը անազատության մեջ են մինչ օրս: Չնայած ԵԽ ԽՎ ընդունած 1609 եւ 1620 բանաձեւերին, ՀՀ իշխանությունները վերջին տասը ամիսների ընթացքում քաղբանտարկյալներին ազատելու եւ երկրում հանդուրժողականության մթնոլորտ ստեղծելու ոչ մի իրական քայլ չեն կատարել, բացի ոչինչ չասող եւ ձեւական խոստումներից: Մենք վստահ ենք, որ միայն Ձեր կողմից ցուցաբերված սկզբունքային մոտեցումներն ու գնահատականները, ներառյալ՝ ՀՀ պատվիրակության ձայնի իրավունքից զրկումը, կսթափեցնեն ՀՀ իշխանություններին, կնպաստեն ՀՀ-ում լարված մթնոլորտի թուլացմանն ու քաղբանտարկյալների շուտափույթ ազատ արձակմանը»:
