«Ազատությանը» տված հարցազրույցում ՀՅԴ Բյուրոյի ներկայացուցիչ Հրանտ Մարգարյանն ասել է, թե իրենք ՀՀ նախագահ Սերժ Սարգսյանին են փոխանցել ԼՂՀ բանակցությունների վերաբերյալ իրենց տեսակետը, վերապահումները եւ հիմա սպասում են նախագահի հետագա քայլերին: Նա ասել է, որ դեռեւս մեկ տարի առաջ ՀՅԴ-ին մտահոգել է Մադրիդյան սկզբունքներում ամրագրված այն կետը, համաձայն որի` հայկական ուժերի կողմից վերահսկվող 5 տարածքները պետք է վերադարձվեն նախքան ԼՂՀ կարգավիճակի որոշումը, իսկ Քելբաջարում եւ Լաչինում պետք է խաղաղապահ ուժեր տեղակայվեն: «Ես հույս ունեմ, որ այդ Մադրիդյան սկզբունքները Ռուսաստանում կայացած` նախագահների հռչակագրի մեջ մատնանշվել է իբրեւ բանակցությունների հիմք, բայց ոչ այդ սկզբունքների ամբողջությամբ որդեգրում: Սա ինձ նաեւ հույս է ներշնչում, որ հայկական կողմն առավելագույնը անելու է` այդ հիմնական թերությունները, որը կա այդ սկզբունքների մեջ, վերացնելու»,- ասել է նա: Հարցին էլ` «եթե թերությունները չվերացվեն, ՀՅԴ-ն դուրս կգա՞ կոալիցիայից», Հ. Մարգարյանը պատասխանել է. «Ինքնանպատակ չէ մեր` կոալիցիայի մեջ մնալը: Այսօր մեր` կոալիցիայի մեջ մնալը նաեւ բացատրվում է, հիմնականում բացատրվում է այն առումով, որ մենք կարողանում ենք մեր տեսակետն ասել, եւ հույս ունեմ, որ կկարողանանք նաեւ ազդել»: Նա անհիմն է համարել ընդդիմության պնդումները, թե մինչեւ տարեվերջ ԼՂՀ հակամարտությունը լուծում է ստանալու, եւ որ Ս. Սարգսյանի վրա մեծ ճնշումներ կան, որոնց այլընտրանք չունենալով` նախագահը ստիպված է լինելու գնալ զիջումների: «Ճնշումները` ընդհանրապես կան, բայց այդպես մասնակի, հատուկ, ինչ-որ մի ժամկետով կատարված ճնշում` ես նման ճնշումից տեղյակ չեմ եւ չեմ նկատել նախագահի մոտ, որ ինքն այդ տեսակ ճնշումի ենթակա է»,- ասել է նա: «Ընդդիմությունն ինչո՞ւ է այդպիսի բան ասում` չգիտեմ, հավանաբար սուրճի բաժակ են նայել,- հավելել է նա,- Կար մի պահ, որ բոլորս անհանգստացանք, երբ Ռուսաստանը որոշ ակտիվություն ցույց տվեց: Անշուշտ, Ռուսաստանը, հավանաբար, կուզեր, որ հարցը կայծակնային լուծում ստանա, եւ ինքը կարողանա Ադրբեջանն ունենալ վերջնականորեն իր ազդեցության դաշտում: Բայց կարծում եմ, որ նաեւ ինքը հանդիպեց որոշ դիմադրության եւ նահանջեց եւ բավարարվեց այնքանով, որ փաստեց իր «պապայության» հանգամանքը շրջանում, եւ այդքանը: Այդ առումով, մտահոգություններն ավելի նվազել են այս պահին»:
