– Սեպտեմբերի 28-ին կայանալիք Կենտրոն համայնքի ղեկավարի ընտրությունները փետրվարի 19-ի նախագահական ընտրություններից եւ մարտի 1-ի իրադարձություններից հետո, ըստ էության, առաջին մեծ քաղաքական միջոցառումն է, որին մասնակցելու են իշխանությունը եւ ընդդիմությունը: Ձեր կարծիքով, իշխանությունները հաղթահարե՞լ են նախորդ ընտրությունների «սինդրոմը» եւ թույլ կտա՞ն նորմալ ընտրություններ:
– Քանի որ մենք շատ լավ ենք ճանաչում իշխանություններին, նման հավատ երբեւէ չպետք է ունենանք: Չնայած, կարծում եմ` բանականությունը մի փոքր աշխատեցնելու պարագայում` նրանք պետք է փորձեն իրական գնահատական տալ ստեղծված իրավիճակին եւ իսկապես գոնե փորձեն անցկացնել նորմալ ընտրություններ: Սակայն հավատ, որպես այդպիսին` չունեմ: Ինձ ընդհանրապես չի մտահոգում, թե ինչպիսի ընտրություններ նրանք կացկացնեն, քանի որ նույնիսկ այդպիսի ընտրությունների դեպքում, ես համոզված եմ, որ հաղթելու եմ:
– Որոշ կարծիքների համաձայն, բացառված չէ, որ իշխանությունները ձեզ ընտրվելու հնարավորություն տան` այդպիսով փորձելով մեղմել ներքաղաքական լարվածությունը: Նույնիսկ խոսակցություններ կան, որ ձեր խափանման միջոցը փոխվեց հենց այդ նպատակով: Այսինքն` իշխանությունները ցանկանում են ձեզ տեսնել Կենտրոնի թաղապետի պաշտոնում: Ինչպե՞ս եք վերաբերվում նման խոսակցություններին:
– Իմ գնահատմամբ` դրանք անլուրջ խոսակցություններ են: Հիմա նաեւ լուրեր են տարածում, թե Լեւոն Տեր-Պետրոսյանի եւ Սերժ Սարգսյանի միջեւ ինչ-ինչ պայմանավորվածություններ, համաձայնություններ կան: Ես կարծում եմ, որ Ձեր վկայակոչած խոսակցությունները նույնպես այս շարքից են: Ակնհայտ է, որ իշխանությունները չեն ցանկանա զրկվել Կենտրոն համայնքից, քանի որ շատ կարեւորում են այս համայնքը: Սակայն ակնհայտ է մեկ այլ բան եւս. ես համոզված եմ, որ շատ դժվար ու բարդ ընտրություններ են լինելու սեպտեմբերի 28-ին: Իհարկե, կրկնում եմ, եթե իշխանությունների բանականությունը բավականացնի` նրանք չեն դիմի լուրջ սրացումների, որովհետեւ ես չեմ կարծում, թե մեկ համայնքում պարտվելը նրանց համար մեծ եւ կրիտիկական կորուստ է: Անկախ նրանից, թե ինչ տակտիկական քաղաքականություն նրանք կորդեգրեն այս ընտրություններում, միեւնույն է` Համաժողովրդական շարժումն ամբողջությամբ եւ շատ լուրջ է պայքարելու, եւ նաեւ անկախ նրանից, թե իշխանություններն ինչ քայլերի կդիմեն` ես հաղթելու եմ: Ոչ միայն ես եմ դրանում համոզված, այլեւ, թող անհամեստություն չթվա` Երեւանի ցանկացած քաղաքացի, որովհետեւ, եթե փորձեք մարդկանց հարցնել, թե նորմալ ընտրությունների պարագայում ո՞վ է հաղթելու` պատասխանն ակնհայտ կդառնա: Ինչ վերաբերում է Ձեր նշած` իշխանությունների հետ ձեռք բերված հնարավոր համաձայնություններին, համաձայն որի` իմ նկատմամբ խափանման միջոցը փոխել են հենց այս ընտրություններին մասնակցելու եւ հաղթելու նպատակով, ապա նախ ասեմ, որ ես երբեւէ իմ սկզբունքներին չեմ դավաճանել, եւ որեւէ մեկը չի կարող ինձ մեղադրել իմ դիրքորոշումներից շեղվելու մեջ: Ես երբեք որեւէ շեղում թույլ չեմ տվել: Իսկ 45 տարեկանում, հավատացնում եմ` այլեւս հնարավոր չէ փոխվել: Ակնհայտ է, որ ես առողջական խնդիրներ ունեմ եւ իրականում հենց դա էր իմ խափանման միջոցը փոխելու միակ պատճառը: Իմ այդ պրոբլեմին տեղյակ են իմ գրեթե բոլոր ընկերները: Հենց հանրահավաքների ժամանակ էլ եմ ես մեկ-երկու անգամ նման սրացումներ ունեցել: Այնպես որ` ինձ ազատ արձակելու միակ հիմքը հենց իմ առողջական վիճակն է եղել: Կարծում եմ, որ շատ աննորմալ կլիներ, եթե հիմա ինչ-որ ընտրությունների համար ինձ նորից տանեին ու փակեին մեկուսարանում: Կարծում եմ` իշխանությունները փորձելու են ամեն ինչ անել, որպեսզի իրենց թեկնածուն հասնի հաղթանակի: Դրա միակ հնարավորությունը համատարած ընտրակեղծիքներն են, սակայն մենք ամեն ինչ անելու ենք, որպեսզի կարողանանք առավելագույնս կանխենք դրանք: Բայց այն, ինչ նրանք արել են տարբեր ընտրություններում, եւ այն, ինչ փորձելու են անել սեպտեմբերի 28-ին` չի օգնելու այս անգամ:
– Վերջին ՏԻՄ ընտրությունները ցույց տվեցին, որ ընտրություններում ավելի շատ այժմ օգտագործում են քրեական տարրերին եւ համատարած փող են բաժանում: Ի՞նչ եք կարծում, Կենտրոնում կկրկնվի դա, եւ ինչպե՞ս եք պատրաստվում կանխել նման երեւույթները։
– Ի պատիվ Կենտրոնի բնակչության` պետք է նշեմ, որ Կենտրոնում փողը որպես գործոն չունի այն դերն ու նշանակությունը, ինչ այլ համայնքներում: Սովորաբար Կենտրոնում փողը, որպես այդպիսին, երբեք չի աշխատել այնպես, ինչպես Երեւանի այլ համայնքներում կամ գյուղական համայնքներում: Այնպես որ` այս անգամ էլ, կարծում եմ` դա էական գործոն չի լինելու: Ինչ վերաբերում է քրեական տարրերին, ապա ես չէի ասի, թե դրանք քրեական տարրեր են: Իրերին պետք է կոչել իրենց ճիշտ անուններով, որովհետեւ մեկուսարանում գոնե շփվելով մարդկանց հետ, ովքեր իսկապես քրեական աշխարհի ներկայացուցիչներ էին, մի բան ակնհայտ էր, որ նրանք չեն համագործակցում Ոստիկանության հետ: Այնպես որ` դրանք կիսաքրեական-կիսաոստիկանական տարրեր են, որովհետեւ հնարավոր չէ` քրեական աշխարհի ներկայացուցիչը ոստիկանի հետ համագործակցելով ինչ-որ գործողություն իրականացնի: Դա աննորմալ երեւույթ է: Թե ո՞ւմ եւ ի՞նչ են օգտագործելու սեպտեմբերի 28-ին` դա ինձ ընդհանրապես ոչ մտահոգում է, ոչ էլ` վախեցնում: Վստահեցնում եմ, որ մեր թիմն անցել է այդ ամբողջ փորձությունների միջով, եւ նման հնարավոր գործողությունների դեպքում կտա թե համարժեք պատասխան, թե գնահատական: Սակայն բնական է նաեւ, որ պետք է յուրաքանչյուր ոք գիտակցի, որ իշխանության պատասխանատվությունն այստեղ հսկայական է. եթե նրանք ցանկանում են լարել իրավիճակն ու սրացումների գնալ՝ կարող են դիմել նման մեթոդների: Այդ մեթոդները հղի են նման վտանգներում, սակայն, իմ կարծիքով` դա քիչ հավանական է: Ինձ թվում է` իշխանությունները պետք է ամեն ինչ անեն, որպեսզի Կենտրոնի ընտրություններն անցնեն խաղաղ ու հանգիստ պայմաններում: Մի օր պիտի հասկանան, որ կարելի է մի տեղ գոնե նորմալ ընտրություններ անցկացնել, որտեղ հաղթող է լինելու նա, ում ժողովուրդն է ընտրել: Հակառակ պարագայում, ցանկացած աբսուրդի կարող ենք հանգել, որովհետեւ միշտ ելնել նրանից, որ լինելու է այն, ինչ սովորաբար մեզ մոտ լինում է` նշանակում է՝ ընդհանրապես Հայաստանը տանել դեպի կործանում: Ի վերջո, այս երկիրը մի օր մի տեղ ինչ-որ ժամանակ պետք է փորձի անցնել ընտրությունների մի այլ որակի: Հույս ունեմ, որ դրա սկիզբը լինելու է Կենտրոն համայնքը:
– Ասացիք, որ իշխանությունների համար Կենտրոն համայնքը լուրջ նշանակություն ունի, եւ որ նրանք այն պահելու համար կդիմեն ցանկացած միջոցի: Կարելի՞ է Ձեր ասածից ենթադրել, որ ընտրությունների օրը լուրջ բախումներ են լինելու:
– 1999թ.` լինելով ընդդիմադիր, ես կարողացել եմ այդ բոլոր միջոցները հաղթահարել եւ ընտրվել Կենտրոն համայնքի ղեկավար: Դա ինձ հաջողվել է մեկ անգամ եւ վստահ եմ՝ երկրորդ անգամ էլ է հաջողվելու։ Հիշեցնեմ, որ 1999թ. ես կամ այն կուսակցությունը, որի ղեկավարն եմ ես այսօր, այն համակրանքը չէր վայելում հասարակության, ընտրողի շրջանում, ինչ` այսօր: Ես համոզված եմ, որ սա եւս նպաստելու է, որպեսզի մենք հասնենք այդ արդյունքին: Հավատացեք` 1999թ. էլ շատ դժվար էր իշխանությունների հետ մտնել նման մրցավազքի մեջ, բայց մենք կարողացանք հասնել դրական արդյունքի եւ հաղթել: Համոզված եմ, որ մենք հաղթելու ենք, որովհետեւ, ի վերջո, գործընթացներն ինչ-որ մի տեղ ունենում են սկիզբ եւ ավարտ: Ես վստահ եմ, որ սա հաղթանակների սկիզբն է լինելու: Ես կարծում եմ, իշխանությունները կդիմեն ինչ-որ քայլերի, բայց դրանց կտրուկության աստիճանը չեմ կարծում, թե կլինի այն աստիճանի, ինչ եղավ նախագահական ընտրությունների ժամանակ, որովհետեւ մի բան է՝ նախագահի ընտրությունները, մեկ այլ բան` համայնքի ղեկավարի ընտրությունները: Դրանք տարբեր տրամաչափերի գործընթացներ են, եւ չեմ կարծում, թե իշխանություններն ուզում են, ենթադրենք, մարտի 1 կազմակերպել Կենտրոն համայնքի ընտրությունների համար: Ինքս լավատես եմ եւ կարծում եմ, մեր իշխանություններն էլ շատ ավելի լուրջ կմոտենան այս ընտրություններին:
– Դուք եւ ընդդիմության առաջնորդները վերջին հանրահավաքում հայտարարեցիք, որ Կենտրոն համայնքի ղեկավարի ընտրություններին մասնակցելով՝ լուծում եք ոչ թե թաղապետի պաշտոն ունենալու խնդիր, այլ այս ընտրությունները համարում եք որպես համաժողովրդական պայքարի մաս: Չե՞ք կարծում, որ եթե Ձեր հաղթանակը զգալիորեն կոգեւորի հասարակության ընդդիմադիր տրամադրված հատվածին, ապա պարտությունը` լուրջ հիասթափություն կլինի:
– Նախ՝ այլեւս որեւէ բան չի կարող կոտրել մեր ժողովրդին: Հակառակը` մեր ժողովուրդը շատ ավելի զգացմունքային եւ պատրաստակամ է, քան Համաժողովրդական շարժման լիդերները, որոնք ինչ-որ տեղ ժամանակ առ ժամանակ փորձում են չգնալ սրացման այն աստիճանին, որը կարող է իր մեջ վտանգ պարունակել հասարակության համար: Համոզված եմ, որ Կենտրոնի ընտրությունները լուրջ լիցք են հաղորդելու մեր համախոհներին, որովհետեւ այստեղ նույնիսկ ոչ թե արդյունքն է կարեւոր լինելու, այլ` ինքը՝ գործընթացը: Բայց… դժվար է ասել, թե ինչո՞ւ, բայց ես շատ խիստ համոզված եմ, որ մենք հաղթելու ենք եւ մեծ լիցք ենք տալու մեր հասարակությանը:
– Ճիշտ է` Ձեր անունն արդեն իսկ ասոցիացվում է Լեւոն Տեր-Պետրոսյանի հետ, բայց ընտրողների հետ Ձեր առաջիկա հանդիպումների ժամանակ Լ. Տեր-Պետրոսյանը մասնակցելո՞ւ է:
– Լ. Տեր-Պետրոսյանը, բնականաբար, ամենալուրջ ձեւով այս ընտրություններին իր մասնակցությունն ունենում է, եւ ակնհայտ է, որ նման հանդիպումների դեպքում կլինի նաեւ նրա մասնակցությունը: Առ այս պահը ես կարող եմ ասել, որ այն, ինչ անում է Լ. Տեր-Պետրոսյանը, խիստ նպաստում է այս գործընթացին, եւ ինքն անձամբ շատ է կարեւորում այս ընտրությունները: