– Լեւոն Տեր-Պետրոսյանը հրապարակեց Հատուկ քննչական ծառայության քննիչ Վահագն Հարությունյանի ստորագրությամբ փաստաթուղթը, որում նշված է, որ մարտի 1-ին« ժամը 6-ի սահմաններում է Ոստիկանությունը սկսել իր գործողությունները Ազատության հրապարակում: Ծանո՞թ եք այդ փաստաթղթին:
– Հանձնաժողովն ունի Լ.Տեր-Պետրոսյանի կողմից հրապարակված փաստաթուղթը, դրան զուգահեռ՝ շատ ավելի փաստաթղթեր էլ ունի, որոնց իրենք չեն տիրապետում: Հանձնաժողովն իր համար արդեն հստակեցրել է օպերացիայի սկսման ժամկետը: Մենք դրա համար 1 ամիս չենք չարչարվել, ինչպես ինքն է ասում, գլուխ չենք ջարդել դրա վրա, պարզապես, բազմաթիվ փաստերի համադրումից հետո, ունենք մեր տեսակետը, որը կներկայացնենք հանրությանը:
– Սպասվում էր, որ Ձեր` այսպես ասած, արտահերթ զեկույցը պետք է հրապարակվեր այս շաբաթվա սկզբին, բայց դա տեղի չունեցավ: Ինչո՞վ էր դա պայմանավորված եւ ե՞րբ կհրապարակվի:
– Նախ՝ ասեմ, որ դա իմ զեկույցն է հանձնաժողովին: Մի խնդիր կա, որը ձգձգում է իմ զեկույցը: Որպեսզի կարողանամ Ազատության հրապարակում մարտի 1-ի առավոտյան Ոստիկանության իրականացրած գործողությունների համաչափության հստակ գնահատականը տալ, ես դիմել եմ Լեւոն Տեր-Պետրոսյանին: Միակ մարդը, ով կարող է ճիշտ ասել ցուցարարների մոտավոր թվաքանակը, ինքն է: Ոստիկանությունը ներկայացրել է մի տվյալ, «Չորրորդ իշխանություն» թերթի ականատես լրագրողներ Գոհար Վեզիրյանն ու Գագիկ Շամշյանն այլ թվեր են ներկայացրել, Լ.Տեր-Պետրոսյանն ինչ-որ ասուլիսում ներկայացրել է լրիվ ուրիշ թիվ: Քանի որ այդ թվերը շատ են տարբերվում` սկսած 500-ից մինչեւ 4000, հանձնաժողովը պետք է կողմնորոշվի, թե ի վերջո որքա՞ն ցուցարար է եղել Ազատության հրապարակում: Համաչափության գնահատման տեսակետից՝ դա շատ կարեւոր է: Եթե 200 ցուցարար է եղել, ապա Ոստիկանությունն ինչո՞ւ է 700-ից ավելի ծառայող տարել: Իսկ եթե 4000 ցուցարար է եղել, ապա ինչո՞ւ են այդքան փոքրաթիվ կազմով գնացել: Ամենաճիշտ թիվը Տեր-Պետրոսյանը կարող է ասել: Եթե ես ցուցարարների թիվն իմանամ, իմ գնահատականը շատ ավելի հստակ կլինի: Հնարավոր է նաեւ` մեկ այլ աղբյուրից ճշտվի այդ տվյալը:
– ՀՀՇ փոխնախագահ Արամ Մանուկյանը մեզ հետ զրույցում ասաց, թե ոստիկանների գալու պահին ինքն է միացրել բարձրախոսը, որպեսզի Լ.Տեր-Պետրոսյանը ժողովրդին հանդարտության կոչ անի: Մարտի 1-ից հետո Ա.Մանուկյանը նաեւ բավականին ծավալուն հոդված էր հրապարակել եւ նկարագրել էր այդ դեպքերի մանրամասները: Դուք փորձե՞լ եք նրանից եւս տեղեկություններ ստանալ:
– Մեզ շատ է հետաքրքրում, թե ո՞վ է անջատել բարձրախոսը, ո՞վ է անջատել լույսը: Ես կհրավիրեմ պարոն Մանուկյանին, եթե գա, շատ լավ կլինի հանձնաժողովի համար: Կփորձեմ:
– Մամուլում հրապարակում եղավ, թե նախագահի նստավայրից նկատողություն եք ստացել այն բանի համար, որ հանձնաժողովի վերջին նիստի ժամանակ դժգոհել եք Ոստիկանության պահվածքից: Ճի՞շտ է:
– Ես նման տեղեկատվության չեմ տիրապետում, որ նախագահականը դժգոհ կամ գոհ լինի իմ աշխատանքից: Ես սկզբից էլ ասել եմ, որ հանձնաժողովի աշխատանքների գնահատականը պետք է տա հասարակության մեծամասնությունը, եւ պետք է ընդունելի լինի հասարակության կողմից: Եթե Ոստիկանության նկատմամբ դժգոհություն եմ արտահայտել, դրա մեջ չպետք է սարսափելի բաներ տեսնել: Կոնկրետ այդ հարցում հանձնաժողովը գտնում է, որ Ոստիկանությունը պատշաճ պատասխան չի տվել: Թեպետ հետո հեռախոսազրույցի ժամանակ պնդում են, թե մեր ուզած տեղեկատվությունը նախաքննական գաղտնիք է: Իհարկե, ես դրա հետ համաձայն չեմ, բայց ավելի լավ է՝ դիմեմ նախաքննական մարմնին, քան անիմաստ քննադատության, բանավեճի մեջ մտնեմ: Եվ այդ բոլոր տվյալները ստանալու համար ես միանգամից դիմեցի նախաքննության մարմնին:
– Անցած շաբաթ դուք հայտարարեցիք նաեւ մարտի 1-ի իրադարձություններն ուսումնասիրող փաստահավաք խումբ ստեղծելու անհրաժեշտության մասին: Այդ ուղղությամբ որեւէ քայլ արվե՞լ է:
– Այդ ուղղությամբ դեռ քննարկումներ են ընթանում: Եթե փաստահավաք խումբն Ազգային ժողովի որոշմամբ է ստեղծվում, ապա նրա ներկայացրած փաստերը մեզ համար կլինեն պարտադիր: Մեկ այլ մարմնի որոշումը չի կարող ԱԺ մարմնի համար լինել պարտադիր օգտագործման ենթակա: Բայց եթե խումբը ստեղծվի, ասենք, կառավարության որոշմամբ, նրա նյութերը կլինեն օժանդակող, եւ հանձնաժողովը կօգտվի դրանցից: Ես չեմ կարող ասել, թե ե՞րբ եւ ինչպե՞ս կստեղծվի այդ խումբը: Ես գտնում եմ, որ դա անհրաժեշտ է:
– Հնարավո՞ր է, որ ԱԺ առաջիկա նիստի ժամանակ այդ հարցը քննարկվի:
– Եթե մինչ այդ ինչ-որ կերպ չստեղծվի, ապա հնարավոր է: Ես ասել եմ, որ այդ փաստահավաք խմբում պետք է ընդգրկվեն միայն մասնագետներ: Չլինեն կուսակցության անդամներ, լինեն իրավական ոլորտում փորձ ունեցող մարդիկ, ովքեր անկախ կլինեն: Անկախ կլինեն նաեւ հանձնաժողովից: Ովքեր փաստերը կուսումնասիրեն եւ կտրամադրեն հանձնաժողովին: Ինձ համար բացարձակապես միեւնույն է, թե ում որոշումով կստեղծվի այդ խումբը, կարեւորն այն է, որ այդ խումբը ստեղծվի եւ մեր աշխատանքներին օգնի: Ես հասկանում եմ, թե ինչ հսկայական ծավալի աշխատանք է նրանց սպասվում: Եվ դա զուտ նեղ մասնագիտական գործողություններ են, որը նմանատիպ խումբը կարող է մեզանից շատ ավելի լավ անել:
– Եթե դեռ այդքան հսկայածավալ գործ կա անելու, հնարավո՞ր է, որ հանձնաժողովը մինչեւ սահմանված ժամկետը` հոկտեմբերի 25-ը, չկարողանա ավարտել իր աշխատանքը:
– Այս պահին չեմ կարող ասել: Եթե այդ օժանդակությունը լինի, կարծում եմ, կհասցնենք: