Ըստ ՀՀ Փրկարար ծառայության տրամադրած տեղեկատվության, հուլիսի 3-ին, ժամը 18։10-18։20-ը տեղացած ուժեղ կարկուտի հետեւանքով վնասվել են Արագածոտնի մարզի Ապարան քաղաքի, Ծաղկահովիտ, Նիգավան, Լուսագյուղ եւ Սարալանջ գյուղերի ցանքատարածքները, կոտրվել են բնակիչների տների ապակիները: Հասցված վնասի չափերը ճշտվում են: Կարկուտի հետեւանքով գլխին ստացած վնասվածքներով Ծաղկահովիտի հիվանդանոց է տեղափոխվել Արմավիրի մարզի Երասխավան գյուղի բնակիչ, 1966 թ. ծնված Գոգո Շամոյանը, որը ստանալով առաջին բուժօգնություն` դուրս է գրվել հիվանդանոցից: Հուլիսի 3-ին, ժամը 17։25-ի սահմաններում տեղացած կարկուտի հետեւանքով վնասվել են Շիրակի մարզի Արթիկ քաղաքի, Նոր Կյանք, Սարալանջ, Հառիճ, Նահապետավան, Պեմզաշեն, Մեծ Մանթաշ, Փոքր Մանթաշ, Արեւշատ, Անուշավան եւ Փանիկ գյուղերի ցանքատարածքները: Վնասի չափերը ճշտվում են:
