«Բոլոր փաստերը գալիս են վկայելու, որ Հայաստանում իրադրությունն, ըստ էության, չի փոխվել, որովհետեւ մեզ առաջարկված բարեփոխումները յուրատեսակ պահանջ են՝ վերադառնալ ելման դրությանը թե՛ հանրահավաքների օրենքի առումով, եւ թե՛ կալանավորվածների առումով: Այս իմաստով արված են կիսաքայլեր` իմիտացիոն քայլեր: Ազատությունը կիսատ չի լինում: Ազատությունը լինում է ամբողջական, կամ չի լինում»,- երեկ «Հայելի» ակումբում ՀՅԴ նախկին անդամ Ռուբեն Հակոբյանի հետ բանավեճի ժամանակ հայտարարեց ՀՀ ԱԺ նախկին փոխխոսնակ Արա Սահակյանը:
«Իշխանությունը փորձում է ամեն ինչ անել` Եվրոպական խորհրդին ասելով` տեսեք, մենք ձեր բանաձեւն իրականացրել ենք: Ընդդիմության մի մասն ասում է՝ տեսեք, սիրելի եվրոպացիներ, իշխանությունը ոչինչ չի արել, մնացել է նույնը, եւ ձեր ասելիքը պետք է: Արանքում այս ընթացքում բավականին լարված մթնոլորտը լիցքաթափելու ժողովրդի ակնկալիքը պատասխան չի ստանում: Երկու բեւեռների կողմից էլ որոշակի իմիտացիոն քայլեր են ձեռնարկվում Եվրոպային ապացուցելուն կամ այոն, կամ ոչը»,- գնահատելով ներկա իրավիճակը` իր հերթին ասաց Ռուբեն Հակոբյանը:
Ա.Սահակյանի համոզմամբ՝ Ազգային ժողովում ստեղծված մարտի 1-ի դեպքերն ուսումնասիրող հանձնաժողովը չի կարող իրականացնել վստահելի ու անկախ քննություն: «Դա իշխանության հանձնաժողովն է լինելու, եւ որոշ ժամանակ հետո դրա նպատակը լինելու է արդարացնել իշխանության քայլերը որոշ բառակապակցությունների խառնաշփոթով: Հայաստանը սպասվող ԵԽ ԽՎ քննարկումից հետո կհայտնվի նույն վիճակում, ինչ դրանից առաջ էր: Այս իշխանությունները մեզ պարտադրում են երկար ու տառապալից ճանապարհ անցնել ամենատարրական դեմոկրատական ազատությունները երաշխավորելու եւ իրականացնելու հնարավորությունների առումով»,- համոզված է ԱԺ նախկին փոխխոսնակը: «Հայաստանում քաղաքական դաշտը բաժանված է երկու բեւեռի: Մեկում իշխանությունն է` նախագահի գլխավորությամբ, որը գործում է կոշտ ավտորիտար համակարգով, որն արմատական մոտեցում ունի իշխանությունը չհանձնելու համար: Հակառակ բեւեռում նախկին իշխանությունն է, որը հանդես է գալիս տոտալիտար ընդդիմության դիրքերից: Նա նույնպես արմատական է տրամադրված՝ շուտափույթ վերցնել իշխանությունն ամեն գնով, եւ խանդոտ է վերաբերվում այլ առաջ եկող ընդդիմությանը: Եթե շարունակվի այս հակադրությունը, պետությունը կանգնելու է նոր փորձությունների առաջ»,- հայտարարեց Ռ.Հակոբյանը, ինչին ի պատասխան՝ Ա. Սահակյանն ասաց. «Երրորդ ուժ չկա, հանգուցալուծումը լինելու է այս երկու ճամբարների առճակատման մեջ»: Բանախոսները երեկ անդրադարձան բազմաթիվ հարցերի, եւ, եթե Ա.Սահակյանը սուր քննադատության էր ենթարկում իշխանություններին, ապա Ռ.Հակոբյանի կարծիքով՝ այս իշխանությունները նախկինների շարունակությունն են եւ շարունակում են գործել նախկինների թույլ տված սխալները: «Միայն կենցաղային վեճերով կարելի է ասել` «բա դո՞ւ»: Եկեք խոսենք կոնկրետ պարտականությունների մասին, եկեք խոսենք այն մասին, որ մարդն, իբրեւ էակ, մշտապես ձգտում է պրոգրեսի, եւ նրան անընդհատ ետ տանել հինգ, տասը, տասներկու տարվա իրադարձությունները, դա շատ վատ, արատավոր ճանապարհ է: Մենք ուզում ենք այսօր ավելի լավ ընտրություն, քան
1996-ին էր, մենք վաղն ուզում ենք ավելի լավ Հայաստան, քան 20 տարի առաջվա Հայաստանն էր»,- կրկին հակադարձեց Ա. Սահակյանը: Բնականաբար, նրանք անդրադարձան իշխանության եւ ընդդիմության միջեւ երկար չարչրկված երկխոսության թեմային: «Ուրեմն մեկի աղջկան բռնությամբ, ծեծի ենթարկելով, եղբայրներին ու տան տղամարդկանց նվաստացնելով, մի երկուսին էլ սպանելով` փախցնում են, մի քանի օր հետո հորը հրավիրում են, թե՝ արի, աղջկադ հարսանիքին մասնակցի: Եվ մեղադրում են այդ մարդուն, որ չի գալիս: Մենք այդպիսի արյունոտ խրախճանքի չենք կարող մասնակցել: Երկխոսությունը ոչինչ չի տա թեկուզ այն պատճառով, որ երկխոսության մասնակիցների մի մասը բանտում նստած է: Թող Սերժ Սարգսյանը գնա Ալեքսանդր Արզումանյանի եւ Արարատ Զուրաբյանի հետ բանտում երկխոսի` ինչքան ուզում է»,- հայտարարեց Ա. Սահակյանը:
Մեր խնդրանքով բանախոսներն անդրադարձան նաեւ ԵԽ ԽՎ մոնիտորինգի համազեկուցողներ Ջոն Պրեսկոտի եւ Ժորժ Կոլոմբիեի Հայաստան կատարած այցին եւ այն հանգամանքին, որ նրանց ներկայությունն անգամ իշխանություններին չստիպեց չմերժել հունիսի 20-ի հանրահավաքը: Այս համատեքստում ի՞նչ ակնկալիքներ ունեն բանախոսները ԵԽ ԽՎ առաջիկա նստաշրջանից: «Դուք պայմանավորում եք նրանով, որ իշխանությունները պարտավոր էին հաշվի առնել Եվրոպայի ներկայացուցիչների ներկայությունը եւ մի քիչ ավելի մեղմ մոտեցում ցուցաբերեին: Մեր մեջ մտած է այն գիտակցությունը, որ, եթե դրսից մարդ կա, մենք մեզ պետք է ուրիշ ձեւով պահենք: Առանց ընդունելու այն փաստը, որ Եվրոպայի ներկայացուցիչները Հայաստանում են, ես ինքս գտնում եմ, որ սխալ են վարվում մեր իշխանությունները, որ թույլ չեն տալիս հանրահավաք կազմակերպել,- հայտարարեց Ռ. Հակոբյանը` ավելացնելով,- Իմ կարծիքով՝ Եվրոպան իր բանաձեւի իրականացման հետ կապված բացասական գնահատական կտա: Բայց ժողովրդավարության բանալին մեր հանրապետության ներսում է գտնվում»:
«Եվրոպական կառույցները եւ տվյալ դեպքում՝ ԵԽ-ն, մեզ հիշեցնում եւ հորդորում է՝ իրականացնել այդ կազմակերպությանն անդամագրվելիս ստանձնած պարտավորությունները: Հետեւաբար դա օժանդակ դեր կարող է կատարել, ես էլ շատերի նման կարող եմ կարծել, որ վերջնական որոշումներն ու դրանց իրականացումը մենք պետք է երկրի ներսում գտնենք: Եվ եթե նրանք խոսում են երկխոսության մասին, հասկանում են, որ դա լավագույն ճանապարհն է: Ես կողմ եմ այդ երկխոսությանը, բայց՝ եթե այդ երկխոսությանը խոչընդոտող գլխավոր խութերը վերանան: Խոսքը կալանավորներին ազատ արձակելու եւ մարտի 1-ի սպանդի անկողմնակալ քննության մասին է: Իսկ այս հանձնաժողովների գոյությունն ապացուցում է, որ մենք Հայաստանում արդարադատության համակարգ չունենք»,- ասաց Ա. Սահակյանը: