Վրաստանի ամենաազդեցիկ մարդը երկրի նախագահ Միխայիլ Սահակաշվիլին է: Ըստ վրացական «Կվիրիս պալիտրա» («Շաբաթվա ներկապնակ») շաբաթաթերթի կողմից անցկացված հարցման արդյունքների, այդպես է կարծում Վրաստանի քաղաքացիների մեծամասնությունը: Հարցման ենթարկված 542 մասնակիցների 90 տոկոսը հայտարարել է, որ հենց նախագահ Սահակաշվիլին է երկրի ամենաազդեցիկ մարդը: Երկրորդ տեղում հայտնվել է ներքին գործերի նախարար Վանո Մերաբիշվիլին: Նրան հաջորդում են վարչապետ Լադո Գուրգենիձեն, խորհրդարանի նորընտիր խոսնակ Դավիթ Բաքրաձեն եւ Թբիլիսիի քաղաքապետ Գիգի Ուգուլավան: Վրաստանի ամենաազդեցիկների ցանկում տեղ են գրավել նաեւ Ազգային անվտանգության խորհրդի քարտուղար Ալեքսանդր Լոմայան, խորհրդարանի Պաշտպանության եւ անվտանգության հանձնաժողովի նախագահ Գիվի Թարգամաձեն եւ պաշտպանության նախարար Դավիթ Կեզերաշվիլին:
