Ադրբեջանի իշխանությունները պետք է ազատ արձակեն բոլոր ձերբակալված լրագրողներին եւ կարճեն նրանց դեմ հարուցված շինծու քրեական գործերը: Այս մասին երեկ հայտարարել է Եվրոպայում անվտանգության եւ համագործակցության կազմակերպության (ԵԱՀԿ) մամուլի ազատության գծով ներկայացուցիչ Միկլոշ Հարաշտին:
Նա մասնավորապես կոչ է արել ազատ արձակել «Գյունդելիկ Ազերբայջան» թերթի գլխավոր խմբագիր Էյնուլլա Ֆատուլաեւին, որին ադրբեջանական դատարանն անցած տարի երկարատեւ ազատազրկման է դատապարտել ահաբեկչության մեղադրանքով: Հարաշտին նաեւ հիշատակել է ընդդիմադիր մեկ այլ պարբերականի`«Ազադլըղ» թերթի լրագրողներ Միրզա Սաքիտի եւ Գանիմատ Զահիդովի դեմ հարուցված դատական գործերը: «Ես խնդրում եմ նախագահ Իլհամ Ալիեւին, որպեսզի նա ներում շնորհի բոլոր լրագրողներին` հաշվի չառնելով` դիմե՞լ են նրանք իրեն այդպիսի խնդրանքով, թե՞ ոչ»,- ասել է Հարաշտին: