ՀՀ վարչապետ Սերժ Սարգսյանի նախաձեռնությամբ եւ կառավարության որոշմամբ՝ ՀՀ բոլոր այն քաղաքացիները, ովքեր տասնամյակներ շարունակ իրենց կողմից օգտագործվող գույքի նկատմամբ սեփականության իրավունք չունեին, այժմ ստանում են դրա հնարավորությունը:
Երեկ քաղաքապետարանում կայացած ճեպազրույցի ժամանակ Երեւանի քաղաքապետ Երվանդ Զախարյանն ամփոփել է 2007թ. կատարված աշխատանքները. «Երեւանի քաղաքապետարանի 2007թ. կատարած աշխատանքներում ՀՀ վարչապետ Սերժ Սարգսյանի մասնակցությունն ակնհայտ է հատկապես վերջին շրջանի աշխատանքներում` ինչպես ծավալային, այնպես էլ՝ ժամկետային առումով, որովհետեւ առկա է վարչապետի մշտական վերահսկողությունն ու պահանջները: Դրանով էր պայմանավորված նաեւ այն հանգամանքը, որ ժամանակին կարողացանք ավարտել բոլոր աշխատանքները: Այն աշխատանքները, որոնք կկատարվեն համապատասխան ժամանակացույցում` շենքերի վերելակների վերանորոգում, կաթսայատների վերականգնման աշխատանքներ, ինչպես նաեւ՝ սեփականության իրավունքների վերականգնման կարեւորագույն ծրագրերը` դրանք ՀՀ վարչապետի անմիջական նախաձեռնությունը, աջակցությունը եւ հանձնարարությունն են»: Դեռեւս 2003թ. հաստատված Երեւանի սոցիալ-տնտեսական զարգացման ծրագրերը կատարվել են 100%-ով: Երեկ քաղաքապետը տեղեկացրեց նաեւ, որ ՀՀ վարչապետ Ս. Սարգսյանի հանձնարարությամբ՝ մայրաքաղաքում իրականացվում են բնակչության համար առաջնային նշանակություն ունեցող սոցիալական երեք կարեւոր ծրագրեր: Դրանցից երկուսն առնչվում են քաղաքացիների` անշարժ գույքի նկատմամբ սեփականության իրավունքների ճանաչմանը, իսկ մյուսը` բարոյապես եւ ֆիզիկապես մաշված վերելակային տնտեսության վերականգնմանը: Այդպիսով, ՀՀ այն բոլոր քաղաքացիները, ովքեր տարբեր պատճառներով իրենց կողմից տասնամյակներ շարունակ օգտագործվող գույքի նկատմամբ սեփականության իրավունք չունեին, այժմ, կառավարության որոշմամբ, ստանում են դրա հնարավորությունը: Սերժ Սարգսյանի հանձնարարությամբ` Երեւանի քաղաքապետարանում ժամանակացույց է կազմվել` մայրաքաղաքի առանձին թաղամասերում բնակիչների սեփականության իրավունքների վերականգնման համար: Համաձայն Երեւանի վարչական տարածքում քաղաքացիների կողմից մշտապես փաստացի զբաղեցրած շենք-շինությունների (եւ հողամասերի) իրավական հիմքերի ուսումնասիրության, դրանց հաշվառման, չափագրման եւ սեփականության իրավունքի վերականգնման աշխատանքների ժամանակացույցի` 2008թ. 1-ին եռամսյակում սեփականության իրավունք կստանան Ավան եւ Նորք-Մարաշ համայնքների բնակիչները, 2-րդ եռամսյակում` Կենտրոն, 3-րդ եռամսյակում` Շենգավիթ, 4-րդ եռամսյակում` Մալաթիա-Սեբաստիա համայնքների բնակիչները: Իսկ 2009թ. 1-ին եւ 2-րդ եռամսյակներում սեփականության իրավունք կստանան Էրեբունի, 3-րդ եռամսյակում` Աջափնյակ, Դավիթաշեն, Արաբկիր, իսկ 4-րդ եռամսյակում` Քանաքեռ-Զեյթուն, Նուբարաշեն համայնքների բնակիչները: Ե. Զախարյանը երեկ նաեւ ընդգծեց, որ ՀՀ վարչապետի հանձնարարությամբ` Երեւանի քաղաքապետարանում 2009թ. ճանաչվելու են նաեւ իրացման գոտի համարվող մի շարք տարածքներում ապրող քաղաքացիների սեփականության իրավունքները: Հետեւաբար, ՀՀ կառավարության որոշմամբ` հասարակության եւ պետության կարիքների համար սեփականության օտարման ենթակա տարածքներում քաղաքացիների կողմից տիրապետվող հողը եւ ինքնակամ կառույցներն օտարվելու են այդ քաղաքացիներին: Ըստ Ե. Զախարյանի` «2007թ. ՀՀ վարչապետ Սերժ Սարգսյանի անմիջական նախաձեռնությամբ ՀՀ կառավարությունը 3 մլրդ դրամ հատկացրեց մայրաքաղաքի վերելակային տնտեսության հիմնանորոգման նպատակով»: Այդ միջոցներով նախատեսվում է մայրաքաղաքում վերանորոգել 2464 վերելակ, որից 400-ն արդեն անցյալ տարի հիմնովին վերանորոգվել են: Վերելակային տնտեսության վերականգնման ծրագիրն ավարտին կհասցվի այս տարի:
Անդրադառնալով մայրաքաղաքի 3-րդ եւ 4-րդ աստիճանի վթարայնության շենքերի աշխատանքներին, Ե. Զախարյանը նշեց, որ այս տարի նախատեսվում է 3-րդ աստիճանի վթարայնության 10 շենք ամրացնել, իսկ 4-րդ աստիճանի վթարայնության շենքերի բնակիչներին բնակարաններ տրամադրելու նպատակով նախատեսվում է կառուցել երկու շենք: «Ի ուրախություն բոլորիս, պետք է ասեմ, որ 4-րդ աստիճանի վթարայնության շենքերի բնակիչների խնդիրն այս տարի ամբողջովին լուծում ենք եւ 2009 թվականին չենք ունենալու բնակելի այնպիսի շենք, որը կունենա 4-րդ աստիճանի վթարայնություն»,- վստահեցրեց Ե. Զախարյանը: Քաղաքապետարանը ծրագրել է 2008 թվին եւս 100 հա-ով ավելացնել Երեւանի ընդհանուր օգտագործման կանաչ տարածքները, որից 60 հա-ն կլինի Շենգավիթ համայնքում, իսկ մնացած 30 հա-ն` այլ համայնքներում: Այս տարի նախատեսվում է Կորյուն-Հերացի-Նալբանդյան-Չարենց փողոցների հատման տրանսպորտային հանգույցի վերակառուցման աշխատանքներն ավարտին հասցնել, ինչը Գետառի վերակառուցման աշխատանքների շարունակությունն է: Այս տարի կավարտվի «Այրարատ» կինոթատրոնի հարեւանությամբ գտնվող Տիգրան Մեծ եւ Խանջյան փողոցների շինարարությունը: Նաեւ նախատեսվում է ավարտել Գետառի կառուցապատման աշխատանքները, Ալեք Մանուկյան փողոցի եւ Գետառի հատման մասում` կամրջի վերակառուցման աշխատանքները եւ համապատասխան ստորգետնյա հետիոտն անցումները, ինչպես նաեւ՝ Հերացի, Ավետիսյան փողոցների վերակառուցման աշխատանքները: Ըստ Ե. Զախարյանի` Արշակունյաց պողոտայում վերգետնյա անցում է կառուցվելու: Այս տարի կավարտվեն նաեւ մայրաքաղաքի ոռոգման ցանցի եւ արտաքին լուսավորության աշխատանքները: