ԵՊՀ 37 դասախոսներ, որոնց թվում կան գիտությունների դոկտորներ, դոցենտներ, երեկ հանդես են եկել հայտարարությամբ, որում մասնավորապես ասված է. «Մենք մեր մտահոգությունն ենք հայտնում նախագահի թեկնածու, ՀՀ առաջին նախագահ Լեւոն Տեր-Պետրոսյանի՝ փետրվարի 6-ին Արտաշատում ընտրողների հետ հանդիպման ժամանակ տեղի ունեցած միջադեպի առթիվ: Խուլիգանների մի խմբի կատարած գործողությունները ըստ էության եղել են կյանքի համար վտանգավոր արարքներ ինչպես հրապարակում հավաքվածների, այնպես էլ նախագահի թեկնածուի ու նրա համախոհների համար: Անհանգստացնող է հատկապես այն, որ իրավապահ մարմինները չեն կատարել իրենց պարտքը եւ ոչ մի կերպ չեն փորձել կանխել ահաբեկչությունը ո՛չ կազմակերպման փուլում, ո՛չ էլ իրականացման: ՀՀ ոստիկանության պաշտոնական հայտարարությունը սեփական անգործությունը կոծկելուն է միտված, մակերեսային է եւ խեղաթյուրելով իրականությունը չի արտացոլում միջադեպի բուն էությունը եւ վտանգավորությունը: Մտահոգիչ է նաեւ այն փաստը, որ Հանրային հեռուստատեսությունը շարունակում է երկրում կատարվող ու հասարակական մեծ հնչեղություն ունեցող իրադարձությունները ներկայացնել աղավաղված ու աղճատված: Ավելին, որոշ դեպքերում Հ1-ը իր եթերը ամենեւին չի խնայում այնպիսի լրատվական նյութերի վրա, որոնք կողմնակալորեն լուսաբանելով իրադարձությունները՝ արհեստականորեն սրում են առանց այն էլ լարված նախընտրական մթնոլորտը, ինչը խիստ վտանգավոր է: Արտահայտելով մեր վրդովմունքը ստեղծված իրավիճակի կապակցությամբ, իշխանություններից պահանջում ենք խստագույնս պատժել նման սադրանքների կազմակերպիչներին ու կատարողներին, ինչպես նաեւ՝ ապահովել նախընտրական քարոզարշավի անվտանգությունը, նորմալ ընթացքը եւ անաչառ լուսաբանումը»:
