Անսովոր ցուրտը զգալի լարվածություն է առաջացրել Հայաստանի էներգահամակարգերի աշխատանքում, սակայն հաջողվել է զերծ մնալ լուրջ վթարներից: Այս մասին երեկ հայտնել է Հայաստանի էներգետիկայի նախարար Արմեն Մովսիսյանը նախագահ Ռոբերտ Քոչարյանի հետ հանդիպման ժամանակ: Նախարարի վկայությամբ՝ էլեկտրաէներգիայի սպառումը հանրապետությունում հասել է օրական 23,5 միլիոն կիլովատտ/ժամի: Ինչպես հաղորդում է նախագահի մամլո ծառայությունը, հանդիպման ընթացքում խոսվել է նաեւ Երեւանի ՋԷԿ-ում համակցված շոգեգազային տուրբինի տեղադրման ծրագրի մասին, որի աշխատանքները սկսվել են այս տարեսկզբին եւ կավարտվեն 2 տարվա ընթացքում: Նախարարն ասել է, որ նոր տուրբինը կունենա 245 մեգավատտ հզորություն եւ կնվազեցնի էլէներգիայի արտադրության ծախսը: Քննարկվել են նաեւ Արաքս գետի վրա կառուցվելիք ՀԷԿ-ի նախապատրաստական փուլի, Իրան-Հայաստան, Հայաստան-Վրաստան բարձրավոլտ էլեկտրական գծերի շինարարության, ատոմակայանի անվտանգ շահագործման եւ նոր ատոմային բլոկի կառուցման տեխնիկատնտեսական հիմնավորումների ուղղությամբ տարվող աշխատանքների վերաբերյալ հարցեր:
