Հայաստանի նախկին արտգործնախարար, «Քաղաքացիական անհնազանդություն» շարժման նախաձեռնողներից Ալեքսանդր Արզումանյանի շահերի պաշտպան Հովիկ Արսենյանին նախօրեին հրավիրել են Ազգային անվտանգության ծառայություն՝ ծանոթացնելու նրա պաշտպանյալի կալանքի ժամկետը եւս երկու ամսով երկարաձգելու վերաբերյալ միջնորդությանը: Սեպտեմբերի 7-ին լրանում է Ա. Արզումանյանի կալանքի հերթական երկամսյա ժամկետը: Հ. Արսենյանն «Ազատությանն» ասել է, թե մինչեւ նոյեմբերի 7-ը կալանքը երկարացնելու համար քննչական խումբը ներկայացնում է այն հիմնավորումը, թե մոսկվաբնակ հայազգի գործարար Սաշիկ Աղազարյանը հաստատել է, որ ինքն է Արզումանյանին գումար փոխանցել, եւ քննչական խումբը միջնորդել է Ռուսաստանի Դաշնության Դատախազությանը՝ պարզել Աղազարյանի հայտարարության իսկությունը, ապա հարցաքննություններ, առերեսումներ անցկացնել, պարզել Աղազարյանի եկամուտների օրինականությունը, ինչպես նաեւ՝ թե որքանո՞վ է նա կատարել իր հարկային պարտավորությունները: Ըստ Հովիկ Արսենյանի, այս «հիմնավորումը» «ապօրինի եւ զավեշտալի» է: Փաստաբանը հիշեցրել է, որ ըստ Ալեքսանդր Արզումանյանին առաջադրված մեղադրանքի՝ նա եւ պաշտպանության նախկին փոխնախարար Վահան Շիրխանյանը 2007 թվականի ապրիլի 24-26-ը համաձայնության են եկել հետախուզման մեջ գտնվող մոսկվահայ գործարար Լեւոն Մարկոսի հետ՝ հանցավոր ճանապարհով ստացված եկամուտներն օրինականացնելու վերաբերյալ, իսկ Աղազարյանի անունն առհասարակ հիշատակված չէ: Դատարանի կողմից միջնորդությունը բավարարելու դեպքում փաստաբանը պատրաստվում է բողոքարկել առաջադրված մեղադրանքը: Ա. Արզումանյանը կալանվել էր մայիսի 7-ին:
