Աղանդերի համար սովորաբար հատուկ դանակ, պատառաքաղ եւ գդալ է դրվում: Պատառաքաղով (այն սովորաբար երկու ատամ է ունենում) ուտում են տորթը, գդալով՝ պուդինգը, պաղպաղակը, իսկ դանակն ու պատառաքաղն օգտագործվում են մրգերի համար:
Խնձորը, տանձը կիսում են չորս մասի եւ հանում կորիզները: Նարինջը մաքրում են դանակի օգնությամբ, նարնջի շերտիկները կարելի է ուտել ձեռքով: Թուրինջը (գրեյպֆրուտ) ընդունված է մատուցել արդեն նախօրոք երկու կես արած: Ցանկալի է, որ դրա հետ սուր եզրերով գդալ մատուցեն, քանի որ սովորական փոքր գդալով դժվար է թուրինջի միջուկը հանել: Անանասը մատուցվում է արդեն կտրատված: Այն հարկ է ուտել աղանդերի համար նախատեսված պատառաքաղով ու դանակով: Սեխի հետ նույն կերպ պետք է վարվել, սակայն եթե սեխը լցոնված է, պետք է օգտագործել ոչ թե պատառաքաղ, այլ գդալ: Ձմերուկը նույպես կտրատված է մատուցվում եւ այն հանգիստ կարելի է ուտել դանակ-պատառաքաղի օգնությամբ: Շերտերի բաժանված կիտրոնը կարելի է գցել թեյի, սուրճի եւն մեջ, սակայն հիշեցնենք, որ թեյը խմելուց հետո պետք է կիտրոնի շերտիկը թողնել բաժակի մեջ:
Խաղողի հատիկները ձեռքով պոկում են եւ տանում բերանը, իսկ կորիզները զգուշությամբ գդալով հանում են բերանից եւ դնում հատուկ փոքրիկ ափսեի մեջ: Թեեւ նախընտրելի է սեղանին մատուցել առանց կորիզի խաղողի տեսակները: Կորիզով մրգերը` բալը, կեռասը եւն, նույնպես հարկ է ուտել` գդալի օգնությամբ կորիզները բերանից զգուշությամբ հանելով եւ դնելով հատուկ դրա համար նախատեսված փոքրիկ ափսեի մեջ:
Տորթն ուտում են աղանդերի համար նախատեսված պատառաքաղով, թեեւ Ռուսաստանում ընդունված է տորթն ուտել գդալով: Մյուս թխվածքները կարելի է ուտել ձեռքով, բայց հետեւեք, որ փշրանքները չմնան հագուստին կամ շրթունքներին:
Գործնական ընդունելության ժամանակ մատուցվում են նաեւ զանազան խմիչքներ:
Հանքային ջուրը միշտ պետք է գտնվի սեղանին: Հյութերը նույնպես կարող են սեղանին դրված լինել ընդունելության ողջ ընթացքում: Դրանք մատուցվում են բյուրեղապակե գրաֆիններով, որպեսզի երեւա, թե ինչի հյութ է:
Ինչ վերաբերում է ոգելից խմիչքներին, ապա դրանց համար տարբեր կանոններ կան:
Ուտելուց առաջ ընդունված է հյուրերին ապերատիվ առաջարկել ախորժակը բացելու համար: Դա կարող է լինել կոնյակ, օղի, վիսկի, պորտվեյն, չոր գինիներ եւն: Ապերատիվը մատուցվում է սկուտեղի վրա շարված մեծ կամ փոքր բաժակներով` կախված խմիչքից:
Շամպայնը կամ փրփրուն գինիները մատուցվում են ցանկացած ճաշատեսակի հետ` բացի ապուրներից: Սառը խորտիկների, օրինակ` ապխտած ձկան, սալաթների, պանրի եւն հետ, ընդունված է մատուցել սեղանի սպիտակ գինիներ: Պաշտետի, ապխտած մսի հետ մատուցվում է սեղանի կարմիր գինի: Ապուրից հետո մատուցվող ձկնեղենի հետ ընդունված է մատուցել սպիտակ թունդ գինիներ` խերես, մադերա, սպիտակ պորտվեյն, կամ էլ սեղանի սպիտակ գինիներ:
Ձկնեղենից հետո մատուցվող մսեղեն ճաշատեսակների` տավարի մսի, որսամսի, սագի հետ մատուցում են կարմիր գինիներ, իսկ սպիտակ մսի, օրինակ` հնդուհավի հետ` սպիտակ գինիներ:
Աղանդերի հետ սովորաբար մատուցվում են շամպայն կամ աղանդերային գինիներ` մուսկատ, կագոր եւն: Սուրճի հետ մատուցվում է փոքրիկ բաժակների մեջ լցված կոնյակ եւ լիկյոր: Դրանք պետք է խմել փոքր կումերով:
Հյութերն ու հանքային ջուրը պետք է լինեն սառեցված, շամպայնը` շատ սառը (6-8 աստիճան), լիկյորն ու կոնյակը` սենյակային ջերմաստիճանի, օղին, սպիտակ գինիները, կիսաքաղցր գինիները` 8-10 աստիճան, իսկ վիսկին հարկ է մատուցել սառույցով: