«Եկեք մազոխիզմով չտառապենք. ոչ թե ձեւակերպումների հետեւում ինչ-որ վատ բաներ որոնենք, այլ մեր բոլոր ջանքերը, հնարավորությունները, եռանդն ուղղենք նրան, որ ընտրություններն իսկապես լինեն անհրաժեշտ մակարդակի, իսկ դրա համար բոլոր հնարավորությունները կան»,- «Ազատություն» ռ/կ-ին տված հարցազրույցում ասել է ԵԽ ԽՎ-ում Հայաստանի պատվիրակության ղեկավար, ԱԺ նախագահ Տիգրան Թորոսյանը՝ ի պատասխան հարցին, թե արդյո՞ք ԵԽ ԽՎ-ի երեկ ընդունած բանաձեւը նախազգուշացնող դեղին քարտ չէ Հայաստանին: ԵԽ ԽՎ-ի՝ նախօրեին ընդունած բանաձեւում մասնավորապես ասվում է. «Վեհաժողովը հատուկ նշանակություն է տալիս 2007-ին՝ խորհրդարանի եւ 2008-ին՝ նախագահի ընտրությունների անցկացմանը: Հիասթափեցնող է, որ Եվրախորհրդին անդամակցումից ի վեր Հայաստանում որեւէ ընտրություն չի ճանաչվել լիովին ազատ ու արդար: Կարեւոր է, որ առաջիկա ընտրությունները վերջապես անցնեն ազատ ու արդար ընտրությունների եվրոպական չափանիշներով` որպես ապացույց, որ Հայաստանը շարժվում է ժողովրդավարության ու եվրաինտեգրման ճանապարհով»:
