Դյուսելդորֆի դատախազության աշխատակիցները ներկա կգտնվեն հայտնի երգչուհի Մադոննայի համերգին՝ ականատես լինելու, թե ինչպես է երգչուհին իրեն գամելու խաչին։ Հազարավոր հավատացյալներ, իմանալով Մադոննայի «համերգային այս հնարքի մասին», բողոքել են տեղական իշխանություններին։ Այդ պատճառով Դյուսելդորֆի դատախազության աշխատակիցները որոշել են սեփական աչքերով տեսնել «Մադոննայի խաչագամումը», որպեսզի կարողանան ճիշտ գնահատել՝ արդյոք վիրավորո՞ւմ է երգչուհին հավատացյալների զգացմունքները։ Օգոստոսի 6-ին Հռոմում Confessions երաժշտական տուրնեի շրջանակում «Live to tell» երգի կատարման ժամանակ Մադոննան խաչագամվել է ապակե լուսավոր խաչին։ Իտալացի կաթոլիկները նախօրոք իմանալով այդ մասին՝ իտալացիներին կոչ էին արել չգնալ Մադոննայի համերգին։ Նրանք Մադոննային մեղադրում էին «աստվածանարգության» մեջ։ Չնայած կաթոլիկ եկեղեցու կոչին՝ Հռոմում Մադոննայի համերգին ներկա գտնվեց 70 հազար հանդիսատես։ Դյուսելդորֆում Մադոննայի համերգը կկայանա օգոստոսի 20-ին։
