Էրմիտաժի տնօրեն Միխայիլ Պիոտրովսկին ԱՊՀ երկրների ստեղծագործական եւ գիտական մտավորականության առաջին ֆորումի նախապատրաստման հետ կապված ճեպազրույցի ժամանակ ասել է, որ նախօրեին Էրմիտաժում բացված ԱՊՀ երկրների երիտասարդ լրագրողների համաժողովը, որ կոչվում է «15 տարի անց», հետաքրքիր է անցել: «Այժմ այնտեղ Կովկասի հիմնախնդիրներին նվիրված կլոր սեղան է անցկացվում, որի նախաձեռնողները Հայաստանի եւ Ադրբեջանի լրագրողներն են: Երիտասարդները լրիվ ուրիշ ձեւով են տեսնում աշխարհը»,- ասել է Պիոտրովսկին: Նրա խոսքերով, այսօր մի շարք խնդիրներ կան, որոնք կարեւոր են ԱՊՀ երկրների մշակույթի գործիչների համար: «Բոլոր երկրներում մշակութային ժառանգության հուշարձանները վտանգված են: Պետք է սրա լուծման համար ընդհանուր մոտեցում փնտրել: Շատ կարեւոր է նաեւ մարդկանց տեղաշարժը: Առաջվա նման մեզ անհրաժեշտ են ուսանողների հաճախակի փոխանակումներ, վերապատրաստումներ: Իսկ դա հնարավոր կլինի միայն անհրաժեշտ ֆինանսավորման դեպքում: Պետք է ստիպենք կառավարություններին՝ այս խնդրին լուծում տալ»,- նշել է Պիոտրովսկին: Նրա կարծիքով, մշակույթի զարգացման համար մեծ խոչընդոտ են մաքսադրույքները: Նրա հավաստմամբ, եթե, օրինակ, օրենսդրությունը թույլ տար, ապա հնարավոր կլիներ Էրմիտաժի որոշ գործեր վերականգնել Հայաստանում: «Ռուսաստանին պետք են Հայաստանը, Վրաստանը, Ղազախստանը, Ադրբեջանը, Տաջիկստանը, իսկ Ռուսաստանն էլ այդ երկրներին է պետք»,- ասել է Պիոտրովսկին՝ հույս հայտնելով, որ իրենց կհաջողվի այս եւ այլ խնդիրների համար լուծումներ առաջարկել կառավարություններին:
