«Ոսկե գլոբուս»

Երեքշաբթի Լոս-Անջելեսում Արտասահմանյան մամուլի հոլիվուդյան ընկերակցության կողմից հրապարակվեց «Ոսկե գլոբուս» ամենամյա կինոմրցանակների հավակնորդների ցուցակը: Առաջատարը Էնգ Լիի «Կոտրված լեռը» ֆիլմն է, որը ներկայացված է 7 անվանակարգերում, այդ թվում՝ «Լավագույն ռեժիսոր», «Լավագույն գլխավոր դերակատար» (Հիթ Լեջեր) եւ «Լավագույն դրամատիկական ֆիլմ»: Չորսական անվանակարգերում ներկայացված են «Բարի գիշեր եւ հաջողություն», «Պրոդյուսերները» եւ «Մատչ-Փոյնթ» ֆիլմերը: 2005թ. լավագույն դրամատիկական դերասան ճանաչվելու համար Հիթ Լեջերի հետ մրցում են Ռասել Քրոուն («Նոկդաուն»), Ֆիլիպ Սեյմուր Հոֆմանը («Կապոտե»), Դեւիդ Ստրետեյրնը («Բարի գիշեր եւ հաջողություն») եւ Թերենս Հովարդը («Գողացիր եւ վաճառիր»): «Լավագույն դրամատիկական դերասանուհի» տիտղոսի համար պայքարելու են Մարիա Բելոն («Արդարացված դաժանություն»), Գվինետ Պելտրոուն («Ապացույց»), Շարլիզ Թերոնը («Հյուսիսային երկիր»), Չժան Ցզիին («Հեյշայի օրագրերը») եւ Ֆելիսիտա Հաֆմանը («Տրանսամերիկա»): Մյուզիքլ-կատակերգություններում լավագույն դերասան (դերասանուհիներ) կարող են ճանաչվել Պիրս Բրոսնանը, Ջոնի Դեպը, Խոակին Ֆենիքսը, Ջուդի Դենչը, Սառա Ջեսիկա Պարկերը, Ռիզ Ուիզերսպոունը: Ռեժիսոր Էնգ Լիի մրցակիցներն են Վուդի Ալենը, Ստիվեն Սպիլբերգը, Պիտեր Ջեքսոնը, Ջորջ Քլունին, Ֆերնանդո Մեյերլեսը: Օտարալեզու ֆիլմերի ցուցակում պայքարում են ֆրանսիական, պաղեստինյան, հարավաֆրիկյան եւ 2 չինական ժապավեններ: «Ոսկե գլոբուս» մրցանակաբաշխությունը տեղի կունենա 2006թ. հունվարի 16-ին, իսկ «Օսկարի» հավակնորդների ցուցակը կհրապարակվի հունվարի 31-ին:

Կ. Թ.