Գործարար եւ մեկենաս Բիդզին Իվանիշվիլին մտադիր է ստեղծել քաղաքական կուսակցություն` Վրաստանի խորհրդարանական ընտրություններին մասնակցելու համար: Այս մասին հաղորդում է «Գրուզիա Online»-ը` վկայակոչելով «Պոլիտրա-TV»-ին: «Ես որոշել եմ ստեղծել քաղաքական կուսակցություն եւ մասնակցել 2012թ. կայանալիք խորհրդարանական ընտրություններին»,- ասված է Բիդզին Իվանիշվիլիի հայտարարության մեջ: Պարբերականն ընդգծում է, որ մինչ այժմ Բիդզին Իվանիշվիլին գրեթե չի հայտնվել մարդկանց շրջանում։ «Շատ քչերը գիտեն, թե ինչ տեսք ունի այդ գործարարը»,- գրում է պարբերականը: «Նա բազմիցս նշել է, որ մտադիր է քաղաքական դաշտ մտնել, սակայն ընթացիկ տարվա մայիսին նրա մամուլի ծառայությունը տարածել էր գործարարի տարօրինակ հայտարարությունը, որտեղ նա քննադատում է գործող իշխանություններին: Իվանիշվիլին հաճախ է հայտնվում Ռուսաստանի ամենահարուստ հարյուր մարդկանց ցուցակում, որտեղ նա բիզնես ունի: Նրա կարողությունը գնահատվում է 4,8 միլիարդ դոլար: Վրաստանում նա զբաղվում է գործարարությամբ»,- գրում է «Գրուզիա online»-ը:
