«Այս օրերին քսանից ավելի կուսակցությունների ներկայացուցիչներ են մոտեցել մեզ` միասին նոր «կոնգրես» ստեղծելու առաջարկով, որոնք իրենց մարդկային ռեսուրսներով ու քաղաքական որակով չեն զիջում ՀԱԿ-ի անդամ կուսակցություններին»,- երեկ մեր թղթակցի հետ զրույցում ասել է «Ժառանգություն» կուսակցության փոխնախագահ Ռուբեն Հակոբյանը: Նա, սակայն, չի ցանկացել նշել, թե հատկապես որ կուսակցությունների ներկայացուցիչներն են նման առաջարկով դիմել իրենց: Ռ.Հակոբյանն ուղղակի ասել է, թե նման կառույց չի ստեղծվի. «Բայց արհեստական քանակ ձեւավորել ոմանց ինչ-որ բան ապացուցելու համար` մեր օրակարգում այդպիսի հարց չկա: Այնպես որ` արհեստական քանակ ձեւավորել եւ այն փորձել պարտադրել քաղաքական դաշտին որպես որակ` չեմ կարծում, որ դա լուրջ քաղաքականության հետ կապ ունի»:
