Ֆոտոլրագրող Գագիկ Շամշյանի հաղորդմամբ` երեկ ժամը 17:30-ի սահմաններում Երեւանի Տիգրան Մեծ պողոտայի թիվ 76 շենքի մոտ կրակոցներ են հնչել: Դեպքի վայր են ժամանել Էրեբունու ոստիկանության աշխատակիցները՝ ոստիկանապետ Ավետիք Աբրահամյանի, օպեր գծով տեղակալ Միհրան Քեշիշյանի գլխավորությամբ, Երեւանի ոստիկանության Քրեական հետաքննությունների բաժնի պետ Եգոր Անտոնյանը, ՀՀ ոստիկանության Փորձաքրեագիտական կենտրոնի փորձագետները, ովքեր դեպքի վայրում առգրավել են 4 կրակված պարկուճ:
Պարկուճների փորձաքննության արդյունքում պարզ կլինի, թե ինչ զենքից են դրանք արձակվել: Ըստ Գ. Շամշյանի` երեկ երեկոյան Երեւանի որեւէ հիվանդանոցից դեռեւս ահազանգ չէր ստացվել հրազենային վնասվածության վերաբերյալ: