Երեկ առավոտյան կյանքի 73-րդ տարում մահացել է Ռուսաստանի նախագահի խորհրդական, ԱՊՀ-ի երկրների հետ տնտեսական համագործակցության հարցերով նախագահի հատուկ ներկայացուցիչ, նախկին վարչապետ Վիկտոր Չեռնոմիրդինը: Ինչպես ԻՏԱՌ-ՏԱՍՍ լրատվական գործակալությանը հայտնել են Չեռնոմիրդինի քարտուղարությունից, նա տառապում էր քրոնիկ հիվանդությամբ եւ անցած գիշեր պետք է վերադառնար արտասահմանից, ուր բուժման կուրս էր անցել: ՌԴ կառավարությունը 1992-98թթ. ղեկավարած Վիկտոր Չեռնոմիրդինը ռուսաստանցի առավել հեղինակավոր եւ ճանաչված քաղաքական գործիչներից էր: Նա 8 տարի պաշտոնավարել էր որպես Ուկրաինայում Ռուսաստանի դեսպան, ինչից հետո 2009թ. վերադառնալով Ռուսաստան` զբաղեցնում էր նախագահի խորհրդականի պաշտոնը:
