Դարչինի պատմությունը
Դարչինն իր անվանումը ստացել է լատիներեն «cinnamon» բառից: Այս բույսի օգտակար հատկությունների մասին մարդկությանը հայտնի է եղել հազարավոր տարիներ առաջ: Մարդիկ պնդում էին, որ դարչինն իրենց է ուղարկված Աստծո կողմից: Ժամանակին նավաստիներն էին հաճախ դիմում դարչինի օգնությանը` դրանով պայքարելով ծովային հիվանդությունների դեմ: Այսօր արդեն դարչինը մեծ կիրառում ունի կոսմետոլոգիայի, բժշկության, արոմաթերապիայի, խոհարարության մեջ: Ի դեպ, դարչինի մասին առաջին հիշատակումներն, ըստ որոշ աղբյուրների, Ք. Կոլումբոսի օրագրից են` 1492թ.: Դարչինի փնտրտուքները նրան հասցրել են Հնդկաստան: 16-րդ դարում Ցեյլոնը, որտեղ աճում էր եւ այժմ էլ տարածված է դարչինը` գրավում են պորտուգալացիները: Եվ Ցեյլոնի ղեկավարին պորտուգալացիները ստիպում էին իրենց հասանելիք ամենամյա տուրքերը վճարել ոչ թե ոսկով, այլ դարչինով: Հետագայում դարչինը տարածվել է Ֆրանսիայում, ուր հսկայական պլանտացիաներ էին աճեցվում, եւ Եգիպտոսում, Չինաստանում, Ֆիլիպիններում: Եգիպտացիները դարչինն օգտագործում էին բոլոր ճաշատեսակների, բալզամների մեջ: Բժշկության մեջ նրանք դարչինն օգտագործում էին ոչ միայն փորլուծության` դիարեայի դեպքում, այլեւ տենդի, դողէրոցքի, գինեկոլոգիական հիվանդությունների դեպքերում: Տարբեր աղբյուրների վկայությամբ, ժամանակին դարչինը օգտագործում էին միայն կայսրերը եւ թագավորները: Այսօր տանտիրուհիները այն օգտագործում են հիմնականում որոշ ճաշատեսակների մեջ` չիմանալով այս բույսի անգնահատելի օգտակարության մասին:
Դարչինի փոշին եւ եթերայուղը
Հսկայածավալ օգտակար հատկություններով է օժտված այս եթերայուղը: Ի դեպ, 50կգ դարչինի եթերայուղ ստանալու համար պահանջվում է 1 տոննա դարչին: Դարչինն օգտակար է արյան շրջանառության եւ նյութափոխանակության կարգավորման համար: Եթերայուղը նաեւ օգտագործում են աղեստամոքսային տրակտի վերականգնման, հարբուխի, մրսածությունների դեմ պայքարելու համար: Գլխապտույտի եւ սրտխառնուքի, ուշագնացության դեպքում օգնում է եթերայուղի բույրը: Դարչինի եթերայուղը շատ օգտակար է թունավոր միջատների կծոցների դեմ, այն հեռացնում է թույնը: Դարչինը օգնում է բերանի տհաճ հոտի վերացմանը: Կանանց մոտ այն կարգավորում է դաշտանային ցիկլը: Լավ միջոց է դեպրեսիայից, տարբեր վախերից ձերբազատվելու համար: Դարչինի եթերայուղը խորհուրդ է տրվում նաեւ բրոնխիտի, լարինգիտի, ռեւմատիզմի, շնչափողի բորբոքման դեպքում, ինչպես նաեւ` օրգանիզմի տոնուսի բարձրացման համար: Դարչինի եթերայուղը գործածում են մաշկային տարբեր` սնկային հիվանդությունների, գորտնուկների, բշտիկացանի դեպքում: Այս եթերայուղը հրաշալի միջոց է աղիքային թուլությունների` ատոնիայի, փորլուծության, մարսողության խանգարումների, փորափքանքների դեմ:
Դարչինը անկրկնելի միջոց է արյան ճնշման բարձրացման դեմ: Արյան բարձր ճնշմամբ տառապում են շատ-շատերը: Դեղերի շուկան ողողված է տարբեր դեղամիջոցներով, որոնցից շատերը նաեւ տարբեր վնասներ են հասցնում օրգանիզմին: Այնինչ, դրա լավագույն միջոցը դարչինն է, որի համեմունքային` մանրացված եւ չորացրած տարբերակները վաճառվում են մթերային գրեթե բոլոր խանութներում: Արյան ճնշումն իջեցնելու համար օրական 1 թեյի գդալի չափով կերեք այն (կարող եք նաեւ 1թ/գ դարչինի համեմունքը բաժանել 4 մասի եւ ուտել օրվա մեջ 4 անգամ): Դարչինը նաեւ կարող եք ուտել կեֆիրով, յոգուրտով, մսի հետ, մածունով: Հետեւողական գործածության դեպքում ճնշումը կկարգավորվի:
Դարչինի եթերայուղը շատ օգտակար է մարմնի մաշկի համար, քանի որ այն լավագույնս կարգավորում է արյան շրջանառությունը: Այն երիտասարդացնում, փափկեցնում է մաշկը, ազատում է ձեզ օրվա հոգնածությունից եւ լարվածությունից: Մարմնի եւ ոտքերի մերսումների ժամանակ մերսման համար նախատեսված յուղի մեջ մի քանի կաթիլ դարչինի յուղ լցրեք: Այն ունի նաեւ հակաբացիլային, հակաբորբոքային, հակասեպտիկ հատկություն: Հաշված րոպեների ընթացքում այն տաքացնում է մարմինը, ոտքերը: Կարող եք նաեւ ավելացնել ժենշենի եւ քնջութի (կունժուտ) եթերայուղերը, որոնք թարմացնում, վերականգնում են մաշկը:
Դարչինը` նիհարեցնող միջոց
Դարչինը ոչ միայն բուժիչ հատկություններ ունի, այլեւ էմոցիոնալ հրաշալի ներգործություն է ունենում մարդու ներքին հոգեվիճակի վրա: Շատերի համար այն վաղուց գտնված միջոց է նիհարելու համար: Հաճելին` օգտակարի հետ: Իհարկե, քաշ գցելու հազարավոր միջոցներ կան, սակայն դրանցից քչերն են իսկապես ազդեցություն ունենում եւ գործածվում: Հեշտ եւ չափազանց օգտակար է դարչինի օգնությամբ նիհարելը: Դարչինն, ի դեպ, հաճախ է հիշատակվում նիհարեցնող դիետաներում, քանի որ այն չափազանց օգտակար է տարբեր օրգանների աշխատանքի համար, եւ հրաշալիորեն մաքրում է օրգանիզմը կուտակված տարբեր շլակներից եւ թունավոր նյութերից: Չմոռանանք նաեւ, որ այն լավագույնս նպաստում է աղեստամոքսային տրակտի աշխատանքին, նյութափոխանակությանը: Եվ այսպես. 1 թեյի բաժակի մեջ կեֆիր եք լցնում (ցանկալի է` քիչ յուղայնությամբ), ավելացնում եք կես ճաշի գդալ դարչինի փոշի, կես ճաշի գդալ մանրացված կոճապղպեղ (իմբիր) կամ կոճապղպեղի քամած հյութը, այնուհետեւ ավելացնում եք մեկ պտղունց կարմիր պղպեղ: Խառնում եք բոլորը միասին եւ քնելուց առաջ կամ առավոտյան քաղցած ստամոքսին խմում եք: Հիշեք միայն, որ պետք է բոլոր բաղադրիչները լինեն: Այսպիսով դուք կարագացնեք նյութափոխանակությունը, որն էլ կօգնի ազատվել ավելորդ քաշից, եւ ամենակարեւորը` կառողջացնի ձեր օրգանիզմը: Նաեւ կարող եք օրվա ընթացքում սուրճի մեջ դարչինի համեմունք ավելացնել: Մի քանի շաբաթից ցանկալի արդյունքը ակնհայտ կդառնա: Այս ընթացքում պետք է հետեւել սննդակարգին` հնարավորինս խուսափելով արհեստական եւ յուղային սննդատեսակներից:
Շատ կանայք են դարչինը գործածում դեմքի մաշկի խնամքի համար: Դարչինի եթերայուղի 1 կաթիլ լցրեք ձիթապտղի մաքուր յուղի մեջ, լավ խառնեք եւ քսեք մաքուր դեմքին եւ գլխի, պարանոցի մաշկին: 15-20 րոպե պահելուց հետո լվացեք գլուխը շամպունով, իսկ դեմքը մաքրեք լոսյոնով: Այս դիմակը լավացնում է դեմքի մաշկի գույնը եւ սնուցում է: Իսկ դարչինի եթերայուղով լոգանքներն օգնում են օրգանիզմից ճարպային շերտերի, ցելյուլիտի հեռացմանը:
Մեղրը եւ դարչինը
Այս համադրությունը հայտնի է ամբողջ աշխարհում: Միայն թե պետք է օգտագործել մաքուր մեղրը, չպաստերիզացված վիճակում: Եթե մեղրի վրա գրված է՝ Row, ուրեմն այն չպաստերիզացված է: Հնդկաստանում եւ Ճապոնիայում արված հետազոտությունների համաձայն՝ մեղրի եւ դարչինի խառնուրդի օգտագործումն օգնում է ստամոքսի փքվածությանը, նպաստում գազերի հեռացմանը: Հյուսիսային Ամերիկայի բնակիչները առավոտյան բերանը ողողում են այս խառնուրդով պատրաստված թուրմով: Օգնում է լնդերի առողջացմանը եւ օրվա ընթացքում լավ հոտ է պարգեւում: 1թ/գ դարչինով եւ 5թ/գ մեղրով պատրաստված խառնուրդը օգնում է ատամնացավին:
– 3ճ/գ մեղրը եւ 1թ/գ դարչինը խառնել եւ քնելուց առաջ քսել դեմքի բշտիկավոր ցանի վրա: Առավոտյան գոլ ջրով լվանալ դեմքը: 2 շաբաթից բշտիկները, նույնիսկ` թարախակալ, կանհետանան:
– 1ճ/գ մեղրը, 2 ճ/գ տաք ջուրը եւ 1 փոքրիկ թ/գ դարչինը խառնել եւ դրանով մաքրել թունավոր միջատների կծած տեղերը: 1-2 րոպեից արդեն ցավը կանհետանա:
– Ստամոքսի թթվայնությունը նվազեցնելու համար ուտելուց առաջ 2ճ/գ մեղր ուտել` վրան դարչինի 1 պտղունց փոշի լցնելով: Այս խառնուրդը օգնում է նաեւ ստամոքսի գրգռվածությանը եւ խոցին: Օգնում է նաեւ լսողությանը եւ տեսողությանը:
– Մրսածության դեպքում 1ճ/գ տաք մեղրը, 1թ/գ դարչինի փոշու 1/4-ը խառնել եւ օրը 3 անգամ կուլ տալ: Օգնում է շնչառությանը եւ քրոնիկ հազին:
– Ճապոնիայի եւ Ավստրալիայի որոշ գիտնականների համոզմամբ՝ օրական 1ճ/գ մեղրից եւ 1թ/գ դարչինի փոշուց պատրաստված խառնուրդը օգնում է ստամոքսի եւ ոսկրերի քաղցկեղի բուժմանը:
– Մեղրով եւ դարչինով պատրաստված թեյը երկարակեցություն է պարգեւում եւ երիտասարդացնում է: 1թ/գ դարչինն ավելացնել 3 թեյի բաժակ եռացրած-սառեցրած ջրի մեջ, եւ ավելացնել 3ճ/գ մեղր: Այս 3 բաժակ թեյը պետք է խմել օրը 4 անգամ` բաժանելով հավասար մասերի: Այս թեյի օգտագործումը նվազեցնում է ինֆարկտի ռիսկը, սնուցում է սրտամկանները, արյան անոթները: Ընդ որում, փորձեք հրաժարվել շաքարից` այն փոխարինելով բնական մեղրով:
– Արտրիտով` հոդերի բորբոքմամբ տառապողներին խորհուրդ է տրվում ամեն օր առավոտյան եւ երեկոյան` քնելուց առաջ, խմել 1 թեյի բաժակ եռացրած ջուրը 2 ճ/գ մեղրով եւ 1 թ/գ դարչինով: Հետեւողական օգտագործումը բուժում է քրոնիկ արտրիտը: Կոպենհագենի ինստիտուտի հետազոտությունները ցույց են տվել, որ երբ բժիշկները արտրիտով տառապող հիվանդներին խորհուրդ են տվել նախաճաշից առաջ ուտել 1ճ/գ մեղրը 0,5 թ/գ դարչինի հետ, մեկ շաբաթ անց 200-ից 73 հիվանդների մոտ ցավը լրիվ անցել է, իսկ 1 ամսվա ընթացքում հիվանդներից շատերը, որոնք ընդհանրապես չեն կարողացել քայլել` սկսել են քայլել` առանց որեւէ ցավ զգալու:
– 2ճ/գ մեղրը խառնել 3թ/գ դարչինի հետ եւ ավելացնել 2 թեյի բաժակ եռացրած ջրի մեջ: Բաժանել 3 մասի եւ խմել օրը 3 անգամ: Կարգավորում է օրգանիզմում խոլեստերինի քանակությունը: Մի մոռացեք, որ մեղրը եւ դարչինը բարձրացնում են նաեւ օրգանիզմի դիմադրողականությունը, պաշտպանում են բազմաթիվ վիրուսներից: Այս խառնուրդը նաեւ օգտագործվում է միզապարկի բորբոքումների դեպքում: Դրա համար պետք է 2 ճ/գ դարչինը խառնել 1 թ/գ մեղրի հետ եւ բացել այն 1 թեյի բաժակ եռացրած եւ փոքր-ինչ սառեցրած ջրի մեջ: Խմել անոթի ստամոքսին:
– Մազաթափության դեպքում գոլորշու վրա տաքացված ձիթապտղի յուղի մեջ ավելացնել 1ճ/գ մեղր եւ 1թ/գ դարչին, խառնել եւ քսել մազարմատներին: Պահել 15 րոպե: Նույնիսկ 5 րոպե պահելը բավարար է արդյունքը տեսնելու համար: Կրկնել շաբաթը 2 անգամ:
– Հավասար քանակությամբ մեղրի եւ դարչինի խառնուրդը լավագույնս օգնում է մաշկային հիվանդություններին` էկզեմային, սնկային հիվանդություններին, եւ այլն: Խառնուրդը պետք է քսել հիվանդ հատվածներին:
– Եվս մեկ հրաշալի միջոց նիհարելու համար: Վերցնել 0,5 թ/գ դարչինը եւ 1-2 թ/գ մեղրը: 1 թեյի բաժակ ջուրը եռացնել: Ավելացնել դարչինը եւ պահել 1-2 ժամ, որպեսզի սառչի: Սառչելուց հետո ավելացնել մեղրը: Եռացրած ջրի բարձր ջերմաստիճանը վնասում է մեղրի օգտակար հատկություններին, այդ պատճառով մեղրը ջրի եւ դարչինի խառնուրդին պետք է ավելացնել սառած վիճակում: Ստացված խառնուրդի կեսը խմել քնելուց առաջ, մյուս կեսը պահել սառնարանում` փակ վիճակում, եւ խմել առավոտյան` սոված ստամոքսին: Այս խառնուրդին ոչինչ պետք չէ ավելացնել: Հավասարաչափ նիհարում եք եւ բուժում ձեր օրգանիզմը: Արդյունքը մի քանի շաբաթից ակնհայտ է դառնում: Մաքրվում է օրգանիզմը, կարգավորվում է տարբեր օրգանների աշխատանքը, եւ նիհարում եք:
Հակացուցված է
Դարչինը հակացուցված է հատկապես մեծ քանակությամբ օգտագործել այն մարդկանց, ովքեր ունեն տարբեր տեսակի ներքին արյունահոսություններ: Հղի կանանց եւս խորհուրդ չի տրվում մեծ քանակությամբ օգտագործել, քանի որ դարչինին բնորոշ է արգանդի կրճատումը: Նաեւ խորհուրդ չի տրվում շատ օգտագործել այն մարդկանց, ովքեր այս համեմունք-բույսի օգտագործումից վատ են զգում, կամ ալերգիկ դրսեւորումներ են ունենում:
Դարչինի հրաշագործություններին մենք դեռ կանդրադառնանք մեր շարքում: Առայժմ այսքանը:
Առողջ եղեք: