Շենգավիթ համայնքի թիվ 79 դպրոցի տնօրեն Արամ Սարգսյանը չարաշահել է պաշտոնեական լիազորությունները: ՀՀ կրթության եւ գիտության նախարարության պետական տեսչության կողմից թիվ 79 միջնակարգ դպրոցում իրականացված ուսումնասիրության արդյունքների վերաբերյալ կազմված տեղեկանքի հիման վրա Շենգավիթ համայնքի դատախազությունում նախապատրաստված նյութերով պարզվել է, որ նշված դպրոցի տնօրեն Արամ Սարգսյանը չարաշահելով պաշտոնեական լիազորությունները` դրանք ծառայության շահերին հակառակ օգտագործելով, շահադիտական դրդումներից ելնելով, հիմնական կրթության վկայականների բաշխման մատյաններում, ավարտական քննական արձանագրություններում եւ 9-րդ դասարանների դասամատյաններում ակնհայտ կեղծ տեղեկություններ եւ գրառումներ մտցնելով, առանց կրթություն ստանալու եւ ավարտական քննություններ հանձնելու, դպրոցում ապօրինի հաշվառված 53 աշակերտների անվամբ կազմել եւ հանձնել է հիմնական կրթության կեղծ վկայականներ, որով էական վնաս է պատճառել պետության օրինական շահերին: Ոստիկանության լրատվական ծառայության հաղորդագրության համաձայն` նշված փաստի կապակցությամբ հունիսի 14-ին Շենգավիթ համայնքի դատախազությունում Ա. Սարգսյանի նկատմամբ ՀՀ քր. օր.-ի 308 հոդվածի 1-ին մասի եւ 314 հոդվածի 1-ին մասի մեղադրանքներով հարուցվել է քրեական գործ եւ ուղարկվել Ոստիկանության Շենգավիթի քննչական բաժին: Կատարվում է նախաքննություն:
