ՀՀ պաշտպանության նախարարությունն արձագանքել է վերջին օրերին Ադրբեջանի ՊՆ մամուլի ծառայության ղեկավար Սաբիրօղլուի եւ որոշ քաղաքագետների հայտարարություններին` դրանք որակելով «վայրահաչություն եւ քարոզչական հիստերիա»:
Ըստ ՊՆ տարածած հաղորդագրության` Ադրբեջանի քարոզչամեքենայի այս հերթական «ոգեւորության» առիթը ՀՀ պաշտպանության նախարարի հայտարարությունն էր այն մասին, որ հայկական Զինված ուժերը պետք է հասնեն աշխարհի ուժեղագույն բանակների մակարդակին: «Ադրբեջանի ՊՆ «ագիտպրոպի» աշխատակիցներին եւ նրանց հրահանգիչներին այս արտահայտությունը տարօրինակ է թվացել, թերեւս այն պատճառով, որ սեփական բանակի մարտունակության մասին ադրբեջանցիները կարողանում են դատել միմիայն ռազմական բյուջեի մեծությամբ, ձեռք բերված հնամաշ սպառազինությամբ եւ սեփական բանակում տիրող ամենաթողությամբ: Ադրբեջանական բանակում պարբերաբար տեղի ունեցող զանգվածային սպանություններից, ինքնասպանություններից, ինքնախեղումներից ու բռնաբարություններից սեփական ժողովրդի ուշադրությունը շեղելու նպատակով, Ադրբեջանի քարոզչության «բանակային կոմիսարները» սփոփվում են հայկական ԶՈՒ ստորաբաժանումներից մեկում տեղի ունեցած դեպքը օրեր շարունակ շահարկելով: Դա ինքնին հասկանալի է. Ադրբեջանի ռազմաքաղաքական վերնախավը չի կարողանում ձերբազատվել պարտվածի բարդույթից: Պատերազմի տարիներին, առնվազն երեք անգամ գերազանցելով սպառազինությամբ ու մարդկային ռեսուրսով, օգտագործելով թուրք, ուկրաինացի, աֆղան, չեչեն եւ այլ վարձկանների, ադրբեջանական բանակը ծանր պարտություն կրեց եւ ստիպված եղավ ստորագրել պարտադրված հրադադարը: Արագորեն միմյանց հաջորդող Ադրբեջանի նախագահները այն ժամանակ եւս ամպագոռգոռ հայտարարություններ էին անում եւ իրենց ժողովրդին խոստանում գրավել ոչ միայն Լեռնային Ղարաբաղը, այլեւ Հայաստանի մի շարք շրջաններ: Անցյալից դասեր քաղելու փոխարեն` Ադրբեջանը շարունակում է խոսել սպառնալիքների, վիրավորանքների եւ զրպարտության լեզվով: Մեկ անգամ եւս հայտարարում ենք. հայկական բանակը ամուր կանգնած է մեր պետության սահմաններին եւ պատրաստ է ցանկացած պահի դիմագրավելու եւ արժանի հակահարված տալու հակառակորդին»,- ասված է ՀՀ ՊՆ տարածած հաղորդագրությունում: