Ինչպես արդեն տեղեկացրել էինք, ամիսներ առաջ ՀՀԿ վերնախավն անստորագիր դիմումներ էր բաժանել դեռեւս անկուսակցական եւ անկախ մնացած մի քանի պատգամավորների, որպեսզի վերջիններս ստորագրեն դրանք եւ դառնան ՀՀԿ խմբակցության փաստացի անդամներ: Նման դիմումներ են ստացել անկախ պատգամավորներ Սամվել Ալեքսանյանը, Լյովա Խաչատրյանը, Միքայել Վարդանյանը, նախկին ՕԵԿ-ականներ Հակոբ Հակոբյանը եւ Սամվել Բալասանյանը: Հասկանալի պատճառներով, ՀՀԿ-ից նման դիմումներ չեն ստացել անկախ պատգամավորներից Խաչատուր Սուքիասյանն ու Տիգրան Թորոսյանը: Վերջինս մեկ տարի առաջ ԱԺ նախագահի պաշտոնը թողնելուց հետո դուրս է եկել այդ կուսակցությունից ու, բնականաբար, նաեւ խմբակցությունից: Նման դիմում չի ստացել նաեւ Վիկտոր Դալլաքյանը: Այդ դիմումների տակ ստորագրել են դեռեւս միայն Մ.Վարդանյանը, Լ.Խաչատրյանն ու Ս.Ալեքսանյանը: Իրենց անկախությունն են դեռեւս վայելում Հ.Հակոբյանն ու Ս.Բալասանյանը, որոնց ՀՀԿ-ականացման գործընթացը, մեր տեղեկություններով, ամբողջ թափով սկսվելու է ԱԺ աշնանային նստաշրջանի մեկնարկից հետո: ՀՀԿ մամուլի քարտուղար, պատգամավոր Էդուարդ Շարմազանովը երեկ հերքեց, թե իրենք ստիպում են, որ անկախ պատգամավորները համագործակցեն ՀՀԿ-ի հետ կամ փաստացի անդամակցեն իրենց խմբակցությանը: «Եթե ես այդ մանրամասների մեջ մտնեմ, արդեն նշանակում է, որ մամուլի ասուլիս եմ տալիս: Ես չեմ կարծում, որ ԱԺ-ում կա որեւէ պատգամավոր, որի կամքի վրա կարող են բռնանալ: Փաստն այն է, որ այդ պատգամավորներից շատերը ցանկանում են համագործակցել ՀՀԿ խմբակցության հետ»,- հեռախոսով ասաց Է.Շարմազանովը: Այդ դեպքում ինչո՞ւ ՀՀԿ-ն ինքը չի հայտարարում, թե կուսակցության հետ կոնկրետ որ պատգամավորներն են ցանկանում համագործակցել: «Քանի դեռ այդ պատգամավորներից որեւէ մեկը պաշտոնական հայտարարություն չի արել, կարծում եմ, որ ճիշտ չէ որեւէ հայտարարություն անել: Կարծում եմ, որ ժամանակը կգա, եւ նրանք արդեն այդ մասին հայտարարությունը կանեն»,- ասաց նա: Իսկ դիմումները ստորագրած եւ չստորագրած պատգամավորները ոչ միայն մինչեւ հիմա այդ մասին չեն բարձրաձայնում, այլեւ ընդհանրապես խուսափում են անդրադառնալ այդ թեմային: Հիշեցնենք, որ անկախներից երկուսը` Մարտուն Գրիգորյանն ու Ռուստամ Գասպարյանը դեռեւս ձմռանն էին դարձել «Բարգավաճ Հայաստան» խմբակցության դե ֆակտո անդամներ: Այնպես որ, աշնանն ԱԺ-ն կունենա ընդամենը երեք անկախ պատգամավորներ` Խ.Սուքիասյանը, Տ.Թորոսյանն ու Վ.Դալլաքյանը: Մինչդեռ 2008թ. ԱԺ ընտրություններից հետո նրանք տասնմեկն էին: Թեեւ չի բացառվում, որ Հ.Հակոբյանին ու Ս.Բալասանյանին այնուամենայնիվ ինչ-որ կերպ հաջողվի խուսափել ՀՀԿ-ականացումից:
